މިއަދު ރަށްރަށުން 72 މީހަކާ އެކު ޖުމްލަ 110 މީހަކު ކޮވިޑަށް ޕޮޒިޓިވް ވެފައި ވާ ކަމަށް ހެލްތް ޕްރޮޓެކްޝަން އޭޖެންސީ (އެޗްޕީއޭ) އިން ބުނެފިއެވެ.
އެޗްޕީއޭ އިން ބުނީ، ވޭތުވެ ދިޔަ 24 ގަޑިއިރުގެ ތެރޭގައި ޕޮޒިޓިވް ވި މީހުންގެ ތެރޭގައި ހިމެނެނީ މާލެ ސަރަހައްދުން 25 މީހަކާއި އަތޮޅުތެރޭގެ ރަށްރަށުން 72 މީހަކާއި މިވަގުތު ހިންގަމުން ގެންދާ ރިސޯޓު ތަކުން 13 މީހެއް ކަމަށެވެ.
މިހާތަނަށް ބަލި ޖެހުނު ޖުމްލަ މީހުންގެ ތެރެއިން ޖުމްލަ 75،778 މީހަކު ވަނީ ބަލިން ރަނގަޅުވެފައެވެ. މިއަދު ޕޮޒިޓިވްވި މީހުންނާ އެކު ބަލިން ރަނގަޅު ވި މީހުން އުނި ކުރުމުން އެކްޓިވް ކޭސްގެ އަދަދު މިވަނީ 2562 އަށް ދަށްވެފައެވެ. އިއްޔެ އެކްޓިވް ކޭސްގެ ގޮތުގައި ތިބީ 2570 މީހުންނެވެ.
މިހާތަނަށް ރާއްޖެއިން ކޮވިޑް ޖެހުނު ޖުމްލަ އަދަދަކީ 78،578 އެވެ. މިވަގުތު ކޮވިޑް ޖެހިގެން ފަރުވާ ހޯދަމުން ދާ 19 މީހަކު ތިބި އިރު މިހާތަނަށް ބަލި ޖެހިގެން މަރުވި މީހުންގެ ޖުމްލަ އަދަދު ވަނީ 222 އަށް އަރާފައެވެ. މި މަހު ކޮވިޑް ބަލީގައި މަރުވެފައި ވަނީ އެންމެ މީހެކެވެ. އެއީ މި މަހުގެ ދެ ވަނަ ދުވަހު މަރުވި މީހެކެވެ.
ރާއްޖެއިން މި ބަލި ފެނުނުތާ މިއަދާ ހަމައަށް 521 ދުވަސް ވެފައި ވާއިރު، މި ދިޔަ އަހަރު ނިމުނު އިރު 13،757 ކޮވިޑް ޕޮޒިޓިވް ކޭސް ވަނީ ރިޕޯޓް ކޮށްފައެވެ. މިދިޔަ އަހަރުގެ ނިޔަލަށް 49 މީހަކު ވަނީ މަރުވެފައެވެ. މިއަހަރު މިހާތަނަށް 64،709 މީހަކު ޕޮޒިޓިވް ވެފައި ވާއިރު މި ބަލީގައި މި އަހަރު ވަނީ 173 މީހަކު މަރުވެފައެވެ.
110 މީހަކު މިއަދު ޕޮޒިޓިވް ވެފައިވާ އިރު އިއްޔެ ވަނީ ކޮވިޑް ޖެހިގެން 108 މީހަކު ޕޮޒިޓިވް ވެފައެވެ.
