މޭ 2021 ގެ އޭލެވެލް އިމްތިހާނުގެ ނަތީޖާތައް ކެނޑިޑޭޓުންނަށް މާދަމާ ދޫކުރަން ހަމަޖެހިފައިވާ ކަމަށް ޑިޕާޓްމަންޓް އޮފް ޕަބްލިކް އެގްޒޭމިނޭޝަން (ޑީޕީއީ) އިން ބުނެފިއެވެ.
ޑީޕީއީ އިން ބުނީ ކެމްބްރިޖް އޭއެސް/އޭއެލް 2021 މޭ/ޖޫން ގެ ނަތީޖާ މިއަދު ހެނދުނު 10:00 ގެ ފަހުން ސެންޓަރުތަކަށް ފެންނާނެ ކަމަށެވެ. އަދި ކެމްބްރިޖް އޭއެސް/އޭއެލް 2021 މޭ/ޖޫން ގެ ނަތީޖާ ސެންޓަރުތަކުން ކެނޑިޑޭޓުންނަށް ދޫކުރުމަށް ހަމަޖެހިފައިވަނީ އޮގަސްޓް 11، 2021 ގައި ކަމަށް ވެސް ޑީޕީއީ އިން ބުނެފައިވެއެވެ.
ރާއްޖޭގައި މިފަހަރު މޭ/ޖޫން ގައި ހެދި އޭލެވެލް އިމްތިހާނުގެ ޕޭޕަރުތައް ލީކުވެ އެޑިއުކޭޝަން މިނިސްޓްރީން ވަނީ އިމްތިހާނު ކުރިޔަށް ނުގެންދިއުމަށް ނިންމާ މެދުކަނޑާލާފައެވެ. މި އިމްތިހާނުގައި 5 ޕޭޕަރެއް ލީކުވިއިރު އޭގެތެރޭގައި ހިމެނެނީ ބަޔޮލޮޖީ ޔުނިޓް ފަހެއްގެ ޕޭޕަރާއި ކެމިސްޓްރީ ޕޭޕަރުތަކެއްގެ އިތުރުން ފިޒިކްސް ޕޭޕަރުތަކެކެވެ.
ޕޭޕަރުތައް ލީކުވުމާ ގުޅިގެން އެޑެކްސެލްއާ މަޝްވަރާކުރުމަށްފަހު އެޑިއުކޭޝަން މިނިސްޓްރީން ވަނީ ދަރިވަރުންނަށް 2 ގޮތެއް ހުށަހަޅާފައެވެ. އެއް ގޮތަކީ ދަރިވަރުން ބޭނުންނަމަ އޭޕްރިލް/މެއި އިމްތިހާނުން ވަކިވެ އޮކްޓޯބަރު/ނޮވެމްބަރުގެ އިމްތިހާނަށް ބަދަލުވުމެވެ. ދެވަނަ ގޮތަކަށް ދަރިވަރުންނަށް ހުށައަޅާފައި ވަނީ ޓީޗާ ބޭސްޑް އެސެސްމެންޓަކުން ގްރޭޑްތައް ކަނޑައަޅާ ކިޔެވުން ނިންމާލުމެވެ.
އެޑިއުކޭޝަން މިނިސްޓްރީން ވަނީ ޖޫންމަހުގެ 13 އިން 17 އަށް އޭލެވެލް ނިންމާ ކުދިންގެ އެޗްއެޗްސީ އިމްތިހާނު ކުރިޔަށް ގެންގޮސްފައެވެ. އެޗްއެސްސީ އިމްތިހާނު ކުރިޔަށް ގެންދިޔަ ސަބަބެއްކަމަށް އެޑިއުކޭޝަން މިނިސްޓަރު ޑރ. އައިޝަތް އަލީ ވިދާޅުވެފައިވަނީ ކަނޑައަޅާފައިވާ ތާރީހުގައި އެޗްއެޗްސީ އިމްތިހާނު ކުރިޔަށް ގެންދިއުމުން އޮކްޓޯބަރު/ނޮވެމްބަރުގައި ކުރިޔަށް ގެންދާ އިމްތިހާނަށް ދަރިވަރުންނަށް ލުޔެއް ދިނުމުގެ ގޮތުން ކަމަށެވެ.
