ޔޫރޯ 2020 ފުޓްބޯޅަ މުބާރާތުގެ ގްރޫޕް ޑީގެ އެއްވަނަ ޓީމުގެ ގޮތުގައި އިންގްލޭންޑް ދެވަނަ ބުރަށް ހިނގައްޖެއެވެ. އިންގްލޭންޑަށް ގްރޫޕްގެ އެއްވަނަ ކަށަވަރުވީ ރޭ ޗެކް ރިޕަބްލިކްއާ ދެކޮޅަށް ކުޅުނު މެޗު 1-0 އަކުން ކާމިޔާބުކުރުމުންނެވެ.
ރޭގެ މެޗުގައި އިންގްލޭންޑުން ޖެހި ހަމައެކަނި ލަނޑު އެޓީމަށް ކާމިޔާބުކޮށް ދިނީ ރަހީމް ސްޓާލިންގެވެ. މިލަނޑު އޭނާ ޖެހީ މެޗުގެ 12 ވަނަ މިނެޓްގައެވެ.
އިންގްލޭންޑަށް ލަނޑު ޖަހާނެ އިތުރު ފުރުސަތުތައް ލިބުނު ނަމަވެސް އެޓީމުން މެޗު ނިންމާލާފައިވަނީ މުބާރާތުގައި އެޓީމުން ކުޅުނު ފުރަތަމަ މެޗުގެ ވެސް ސްކޯލައިނާއެކުއެވެ.
ގްރޫޕް ސްޓޭޖުގައި ކުޅުނު ތިން މެޗުގެ ތެރެއިން ދެ މެޗުން އިންގްލޭންޑް މޮޅުވި އިރު އެޓީމުން ވަނީ އެއް މެޗުން އެއްވަރުވެފައެވެ. އެހެން ނަމަވެސް ކުޅުނު ތިން މެޗުގައި ވެސް އިންގްލޭންޑްގެ ބައިކޮޅަށް އެންމެ ލަނޑެއް ވެސް ވަދެފައެއް ނުވެއެވެ.
ދެވަނަ ބުރުގައި އިންގްލޭންޑުން ވާދަކުރަން ޖެހޭނީ މުބާރާތުގެ މަރުގެ ގްރޫޕް ކަމަށް ބުނާ ގްރޫޕްގެ އެފްގެ ދެވަނައަށް ދާ ޓީމާއެވެ. އެގްރޫޕްގެ ދެވަނަ ޓީމު އެނގޭނީ އެންމެ ފަހު މެޗުތައް ކުޅުމުންނެވެ. އެގްރޫޕްގައި ހިމެނެނީ ފްރާންސް، ޖާމަނީ، ޕޯޗުގަލް އަދި ހަންގެރީއެވެ.
