ހަލުވިކަމާއެކު ފެތުރެމުން އަންނަ ކޮރޯނާވައިރަސް ޑިޒީޒް (ކޮވުޑް-19)ގެ ޝިކާރައަކަށްވެ، އަވަށްޓެރި ސްރީލަންކާއިން މަރުވާ މީހުންގެ ގަބުރު އެންދުން ހުއްޓާލުމަށް، އދއިން ސްރީލަންކާގެ ސަރުކާރަށް ގޮވާލައިފިއެވެ.
މަރުވާ މީހުންގެ ހަށިގަނޑު އަންދައިގެން ނައްތާލުމަކީ އިސްލާމް ދީނުގެ އިތުރުން، ލަންކާގެ އާބާދީގެ ނިސްބަތުން ބައިމަދު އެހެން ދީންތަކުގެ އަހުލުވެރިންގެ ގަބޫލު ކުރުންތަކާވެސް ތައާރަޒުވާ އަމަލެއް ކަން އދއިން ވަނީ ފާހަގަ ކޮށްފައެވެ.
ފަރުވާއެއް ހޯދިފައި ނުވާ ކޮވިޑް-19 ޖެހިގެން މަރުވާ މީހުން ވަޅުލުމުގައި މައްސަލައެއް ނެތް ކަމަށް ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިންވެސް ކަނޑައަޅާފައި ވާއިރު، އެކަމަށް ބެލުމެއް ނެތި، ކޮވިޑް ޖެހިގެން މަރުވާ ހުރިހާ އެންމެންގެ ހަށިގަނޑުން އަންދައިގެން ނައްތާލުމަށް ލަންކާއިން ފާސްކޮށް، ތަންފީޒު ކުރަން ފެށީ މިދިޔަ މާޗް މަހުގެ ތެރޭގައެވެ. ކޮވިޑް ކަމަށް ޝައްކު ކުރެވޭ މަރުގެ ކޭސްތަކުގައި އަމަލު ކުރަނީ މި އުސޫލުންނެވެ.
އިންސާނީ ހައްގުތަކާ ބެހޭ އދގެ ތަޖުރިބާކާރުން ވިދާޅުވީ، މިފަދަ އުސޫލަކުން ކަން ކުރުމަކީ ލަންކާގައި މިހާރުވެސް އޮތް ތަފާތު ކުރުންތަކާއި، އެއް ބަޔަކު އަނެއް ބަޔަކު ބަލައިނުގަތުމުގެ ނުރަނގަޅު އާދައާއި ހަމަނުޖެހުންގަނޑު އިތުރަށް ގަދަވެ ދިއުމަށް ހިތްވަރު ދެނިވި ކަމެއް ކަމަށެވެ.
ކޮވިޑް-19 ޖެހިގެން މަރުވާ މީހުންނާ، ކޮވިޑް މަރެއް ކަމަށް ޝައްކުވާ ކޭސްތަކާ ގުޅިގެން ގަބުރު ނައްތާލުމަށް އޮތް ހަމައެކަނި ގޮތަކީ އަންދާލުން ކަމަށް ކަނޑައަޅާ، އެކަން ތަންފީޒު ކުރުމަކީ، އިންސާނީ ހައްގުތަކަށް އަރައިގަތުން ކަމަށްވެސް އދގެ ތަޖުރިބާކާރުންގެ ޕެނަލުން އާންމު ކުރި ބަޔާނެއްގައި ވަނީ ފާހަގަ ކުރައްވާފައެވެ.
އދގެ ތަޖުރިބާކާރުން ވިދާޅުވީ، ބަލީގެ އަސަރު ކޮށްފައިވާ މީހަކު ވަޅުލަމަކީ އެފަދަ ބައްޔެއް ފެތުރިގެން ދިއުމަށް މަގުފަހި ކުރާ ކަމެއް ކަމަށް ބާރުދޭ ސިއްހީ އަދި ސައެންޓިފިކް އެއްވެސް ހެއްކެއް އަދި މިހާތަނަށް ފެނިފައި ނުވާ ކަމަށެވެ.
ކޮވިޑްއާ ގުޅޭ މަރުގެ ކޭސްތަކާ ގުޅުންހުރި ގަބުރުތައް ނައްތާލާނެ ގޮތެއް ބެލުމަށް ދާއިރާގެ ތަޖުރިބާކާރުންނަށް ލަންކާ ސަރުކާރުން އަންގާފައި ވާ އިރު، މިފަދަ ގަބުރުތައް ނައްތާލުމަށް އެންދުން ނުވަތަ ވަޅުލުން، އިހުތިޔާރެއްގެ ގޮތުގައި ބޭއްވުމަށް، އދގެ ތަޖުރިބާކާރުން ވަނީ ގޮވާލައްވާފައެވެ.
ކޮވިޑާ ގުޅޭ މަރުގެ ކޭސްތަކަށް ހާއްސަކޮށްގެން ވަޅުލުމުގެ އިންތިޒާމް ހަމަޖެއްސިދާނެތޯ ބެލުމަށް ލަންކާގެ ކޮމިޓީއަކަށް އެ ގައުމުގެ ސަރުކާރުން އިރުޝާދު ދީފައި ވާއިރު، ވީ އެންމެ އަވަހަކަށް އެކަމަށް ހައްލު ހޯދުމަށާ، ބޭރު ގައުމެއްގައި ގަބުރު ވަޅުލުމުގެ ހިޔާރު ދޫކޮށްލުމަށްވެސް އދގެ ތަޖުރިބާކާރުން ވަނީ ގޮވާލައްވާފައެވެ.
ދިވެހި ހާރިޖިއްޔާއިން ވަނީ، ކޮވިޑްގައި ލަންކާއިން މަރުވާ މުސްލިމުންގެ ޖަނާޒާގެ ކަންތައްތައް ފުރިހަމަކުރުމަށް ސްރީލަންކާ ސަރުކާރަށް ދަތިތަކެއް ކުރިމަތިވެފައިވާކަމަށާއި، ދިވެހިރާއްޖޭގައި ސްރީލަންކާގެ މިފަދަ މުސްލިމުންނަށް އިސްލާމީ އުސޫލުތަކާ އެއްގޮތަށް ޖަނާޒާގެ ކަންތައްތައް ހަމަޖައްސައިދިނުމަށް އެހީތެރިކަން ހޯއްދެވުމަށް އެދިވަޑައިގެން ސްރީލަންކާގެ ރައީސް ގޯތާބަޔަ ރާޖަޕަކްސަ، ރާއްޖޭގެ ރައީސުލްޖުމްހޫރިއްޔާ އިބްރާހީމް މުހައްމަދު ސާލިހަށް ސިޓީފުޅެއް ފޮނުއްވާފައި ވާ ކަން ހާމަކޮށްފައެވެ.
އިސްލާމީ އަހުވަންތަކަން ދެމެހެއްޓުމުގެ މަތިވެރި ނިޔަތާއި މަގުސަދުގައި، އަދި ދިވެހިރާއްޖެއާ ސްރީލަންކާއާ ދެމެދު އޮތް ޒަމާންވީ ގުޅުމުގެ މައްޗަށް ރިއާޔަތް ކުރައްވާ، ސްރީލަންކާގެ މުސްލިމުންނަށް ފޯރުކޮށްދޭ ހާއްސަ އެހީތެރިކަމެއްގެ ގޮތުގައި، ސްރީލަންކާގެ ރައީސްގެ މި ހުށަހެޅުއްވުމުގައި އެދިވަޑައިގެންފައިވާ ކަންކަން އިންތިޒާމް ކުރެވޭނެ ގޮތެއް އޮތްތޯ ބެލުމަށް، ރައީސުލްޖުމްހޫރިއްޔާ ގެންދަވަނީ ސަރުކާރުގެ ކަމާ ބެހޭ އިދާރާތަކުގެ މެދުގައި މަޝްވަރާކުރައްވަމުން ކަންވެސް ދިވެހި ހާރިޖިއްޔާއިން ވަނީ ކަށަވަރު ކޮށްދީފައެވެ.
ލަންކާގައި ކޮވިޑާ ގުޅޭ މަރުގެ ކޭސްތަކަށް އެންދުން ނޫން ގޮތެއް ނެތުމަކީ، ސިއްހީ ފަރުވާ ހޯދުމަށްވެސް ބައެއް ފަރާތްތަކުން ފަސްޖެހޭނެ ސަބަބެއް ކަން އދއިން ފާހަގަ ކުރެއެވެ.
