7 ކިލޯގެ މަސްތުވާތަކެއްޗާއެކު ހައްޔަރުކުރި މަޝްހޫރު ބޮޑީ ބިލްޑަރު، ޝާހީން އިބްރާހިމް ދީދީ (ޝާންޓޭ) އުމުރަށް ޖަލަށް ލުމަށް ކްރިމިނަލް ކޯޓުން ހުކުމް ކޮށްފިއެވެ.
ޝާންޓޭ ހައްޔަރުކޮށްފައި ވަނީ 2018 ވަނަ އަހަރުގެ ޑިސެމްބަރު ދެވަނަ ދުވަހުގެ ރޭ 22:30 އެހައިކަން ހާއިރު ހ. ސާމަރާގޭގައި މަސްތުވާތަކެތީގެ ވިޔަފާރި ކުރަމުންދާ ކަމަށް ފުލުހުންނަށް ލިބުނު މައުލޫމާތަކާ ގުޅިގެންނެވެ. އެ ތަކެތި ހުރީ އެ ކޮޓަރީގެ ސްޓޮކް ރޫމް ތެރޭގައި ޓޭޕްއަޅައި ބަންދުކޮށްފައި ހުރި ކަރުދާސް ފޮށިގަނޑެއްގެ ތެރޭގައި އޮތް ޑަސްބިން ކޮތަޅެއްގައެވެ.
މި މައްސަލައިގައި ޝާންޓޭގެ މައްޗަށް ދައުލަތުން އުފުލީ ޑައިމޯފިން ޓްރެފިކް ކުރުމުގެ ދައުވާއެވެ.
ޝާންޓޭގެ މައްސަލަ އެ މައްސަލަ ސާބިތުވެ ޖަލަށް ލުމަށް ހުކުމްކޮށް، ފަސް ލައްކަ ރުފިޔާއިން ޖޫރިމަނާކުރީ މިދިޔަ އަހަރުގެ ނޮވެންބަރު މަހުގެ 26 ވަނަ ދުވަހުއެވެ. އަދި ޖޫރިމަނާގެ ފައިސާ އެއް މަސް ދުވަހުގެ ތެރޭގައި މީރާއަށް ދެއްކުމަށް ކްރިމިނަލް ކޯޓުން ކުރި ހުކުމްގައިވެއެވެ.
ކްރިމިނަލް ކޯޓުގެ ހުކުމްގައިވާ ގޮތުން ޝާންޓޭގެ ކޮޓަރިތެރެއިން ފުނުނު ޑަސްބިން ކޮތަޅު ތެރެއިން ފެނުނު ހަތް ޕެކެޓުގައި 6924.800 ގްރާމް ޑައިމޯފިން ހުރި ކަމަށް އެތަކެތީގެ ތަހުލީލު ރިޕޯޓުން ދައްކައެވެ.
މި ދައުވާއަށް ޝާންޓޭ ވަނީ އިންކާރުކުރި ނަމަވެސް ހުކުމްގައި ބުނީ ދައުލަތުން ހުށަހެޅި ހެކި ގަރީނާއިން ގާނޫނު އަސާސީގެ 51 ވަނަ މާއްދާގެ (އ) ގައި ބަޔާންކުރާ އެކަށީގެންވާ މިންވަރެއްގެ ޝައްކެއް ނެތް މިންވަރަށް އެ ދައުވާ ޝާންޓޭގެ މައްޗަށް ސާބިތުވާ ކަމަށެވެ.
ޝާންޓޭއަކީ އޭޝިއަން ގޭމްސްގައި 55 ކިލޯގެ ކެޓަގަރީން ރާއްޖެ އަށް ރަން މެޑެލް ހޯދައިދިން އެތުލީޓެވެ. އަދި އޭނާއަކީ ރާއްޖޭގައި ބާއްވާ ބޮޑީ ބިލްޑިން މުބާރާތް "މިސްޓަ މޯލްޑިވްސް" ގައި ވެސް ކާމިޔާބު ވަނަ ތައް ހޯދާފައެވެ.
