ނ.ޅޮހީ އިސް މެޖިސްޓްރޭޓް އަހުމަދު ހަސަން މަނިކުގެ ސުލޫކީ މައްސަލައެއް ބަލަން ފަށާފައިވާ ކަމަށް ޖުޑީޝަލް ސާވިސް ކޮމިޝަން (ޖޭއެސްސީ) އިން ބުނެފިއެވެ.
ޖޭއެސްސީން މިއަދު ބުނީ އެ މައްސަލައަކީ ނ. މަނަދޫ މެޖިސްޓްރޭޓް ކޯޓަށް ހުށަހެޅި ހަޟާނާތުގެ މައްސަލައެއްގައި ދައުވާކުރި ފަރާތާ ކުއްޖާ ހަވާލުކުރުމަށް ވަގުތީ އަމުރެއް ނެރެ އެ އަމުރު ހައިކޯޓުން ބާތިލް ކުރުމުން ވެސް، ކުއްޖާ ކުރިން ހުރި ހާލަތަށް ރުޖޫއަ ކުރުމެއް ނެތި، ދައުވާކުރި ފަރާތުން ބޭނުންވި މަގުސަދު ހާސިލްވާ ގޮތަށް މައްސަލައިގެ ހާލަތު ދަމަހައްޓާފައިވާ މައްސަލައެއް ކަމަށެވެ.
އެމައްސަލަ ތާވަލުނުކޮށް ގިނަ ދުވަސްތަކެއް ފާއިތު ވުމަށްފަހު ދައުވާ ކުރާ ފަރާތަށް އެކަނި ޗިޓް ފޮނުވާ، ދައުވާ ލިބޭ ފަރާތުގެ ބަހެއް ނެތި ދައުވާ ބާތިލް ކޮށްފައިވާ ކަމަށް ވެސް ޖޭއެސްސީން ވަނީ ބުނެފައެވެ.
އެގޮތުން އެމައްސަލައާ ގުޅިގެން ޅޮހީ އިސްމެޖިސްޓްރޭޓް އަހުމަދު ހަސަން މަނިކުގެ ސުލޫކީ މައްސަލައެއް ބެލުމަށް، މައްސަލަ ބެލުމާމެދު ގޮތެއް ނިންމުމަށް ތަހްގީގު ކޮމެޓީ އެކުލަވާލަން ނިންމާފައިވާ ކަމަށް ޖޭއެސްސީން ވަނީ ބުނެފައެވެ.
އެ ނިންމުން ނިންމާފައިވަނީ މިއަދު ބޭއްވި ޖޭއެސްސީގެ 98 ވަނަ ޖަލްސާގައި ކަމަށް ޖޭއެސްސީން ވަނީ ބުނެފައެވެ.
