ކުރިއަށް އޮތް ފިނި މޫސުމުގެ ދުވަސްވަރަކީ ކޮރޯނާވައިރަސް ޑިޒީޒް (ކޮވިޑް-19) ގެ ބަލިމަޑުކަމުގެ މަސްރަހު އިތުރަށް ގޯސްވެގެންދާނެ ދުވަސްވަރެއް ކަމުގެ އިންޒާރު ސިއްހީ މާހިރުން ދީފައި ވާއިރު، އެމެރިކާގައި އުފެދިފައި ވާ ބައިބައިވުންތައް ނައްތާލާ، އެންމެން އެކަތިގަނޑަކަށް ވުމަށް، އެގައުމުގެ އިންތިހާބީ ރައީސް ޖޯ ބައިޑަން ގޮވާލައްވައިފިއެވެ.
ގައުމާ މުހާތަބު ކުރައްވާ ވާހަކަދައްކަވަމުން ބައިޑަން ވިދާލުވީ، އެމެރިކާއިން ހަނގުރާމަ ކުރަމުން ދަނީ ކޮރޯނާވައިރަހާ ދެކޮޅަށް ކަމަށާ، އެކަކު އަނެކަކާ ދެކޮޅަށް ނޫން ކަމަށެވެ. މި ދަނޑިވަޅަކީ އެމެރިކާގައި ޣައިރު-ދީނީ އުފާފާޅުކުރުމެއް ކުރިއަށް ދާ ދަނޑިވަޅަކަށް ވެފައި ކުރިއަށް އޮތީވެސް އެފަދަ ދުވަސްވަރެއް ކަމުން، ޒަމާނުއްސުރެ އެކަން ކުރަމުން އަންނަ ވައްޓަފާޅި ބަދަލު ކުރުމަށްވެސް ބައިޑަން ވަނީ އިލްތިމާސް ކުރައްވާފައެވެ.
ރައީސް ކަމުގައި ހުންނަވާ ބޭފުޅެއްގެ ކިބައިން ރައްޔިތުންނަށް ތެދުބަސްތަކެއް އިވެން ވާނެ ކަމަށް ގަބޫލު ކުރައްވާ ކަން ފާހަގަ ކުރައްވަމުން ބައިޑަން ވިދާޅުވީ، އެމެރިކާގައި ކޮވިޑް-19 ފެތުރެމުންދާ ދުވެލި މަޑުޖައްސާލަން ޖެހޭ ކަމަށެވެ. މިއީ ސިއްހީ ހިދުމަތްތެރިންނާ ފްރަންޓްލައުން ވޯކަރުންނަށް އަދާ ކޮށްދޭން ޖެހޭ ހައްގެއް ކަމަށްވެސް ބައިޑަން ވަނީ ވިދާޅުވެފައެވެ.
ކޮވިޑް-19އާ އެކު ގިނަ ތަކުލީފުތަކަކާ ކުރިމަތިލާން ޖެހިފައި ވާ ކަން ފާހަގަ ކުރައްވަމުން ބައިޑަން ވިދާލުވީ، މި ބަލިމަޑުކަމާއެކު މުޖުތަމައުގައި ރުޅިވެރިކަން އުފެދި، އެކަކު އަނެކަކާ ދެކޮޅުވެރި ވުމުގެ ރޫހެއް އުފެދިފައި ވާ ކަމަށެވެ. މި ވަގުތަކީ "ގުދާރަށް ދަގަނޑުލައްވައިގެން" ވިއަސް ތެދުވެ، އިހުނަށްވުރެ ދެގުނައަށް މަސައްކަތްތައް ވަރުގަދަ ކޮށް، ވައިރަހާ ދެކޮޅަށް ހަނގުރާމަ ކުރުމަށް އެއްބާރުލުން ދޭން ވީ ވަގުތު ކަމަށްވެސް ބައިޑަން ވިދާލުވިއެވެ.
ކަން މިހެން އޮތް އިރު، ނޮވެމްބަރު މަހުގެ 3 ވަނަ ދުވަހު އިންތިހާބުގައި، ވެރިކަމުގެ ދެވަނަ ދައުރެއް ކަށަވަރު ކުރައްވަން ފެއިލްވެވަޑައިގަންނެވި އަދުގެ ރައީސް ޑޮނާލްޑް ޓްރަމްޕް ގޮންޖެއްސެވީ، އިންތިހާބު ކާމިޔާބު ކުރެއްވުމަށް އޭނާ ހިއްޕަވާފައި އަމާޒު ކާމިޔާބު ކުރެއްވުމަށެވެ. އިންތިހާބުގެ ނަތީޖާ އަނބުރާލުމަށް މަސައްކަތް ކުރުމަށް ޓްރަމްޕް ވަނީ ގޮވާލައްވާފައެވެ.
ޓްރަމްޕްގެ ވާހަކަފުޅު މިފަދަ ރޫހެއްގައި ހުރި ނަމަވެސް، އެމެރިކާގެ ވެރިކަން ހިންގުމުގެ ބާރުތައް ބައިޑަންގެ ސަރުކާރާ ހަވާލު ކުރުމުގެ މަސައްކަތްތައް ކުރިއަށް ގެންދިއުމަށް ޓްރަމްޕް މިހާރު ވަނީ ރުހުން ދެއްވާފައެވެ. އަދި ޓްރަމްޕާއެކު މަސައްކަތްތަކެއް ކުރިއަށް ދާ ކަން، ހުދު ބައިޑަންވެސް ވަނީ ކަށަވަރު ކޮށްދެއްވާފައެވެ.
ބައިޑަން މިހާރު ގެންދަވަނީ އޭނާގެ ވަޒީރުންގެ މަޖިލީހާ، އިސް މަގާމުތަކުގައި ތިއްބަވާނެ ބޭފުޅުން ކަނޑައަޅުއްވަމުންނެވެ. އިންތިހާބުގެ ނަތީޖާއަށް ބޮޑު ބަދަލެއް ނައިސް، ރަސްމީ ނަތީޖާ އިއުލާން ކުރުމަށްފަހު، ބައިޑަން، އެމެރިކާގެ ރައީސް ކަމުގެ ހުވާ ކުރައްވާނީ 2021 ވަނަ އަހަރުގެ ޖަނަވަރީ މަހުގެ 20 ވަނަ ދުވަހުއެވެ.
