ނޮވެމްބަރު މަހުގެ 3 ވަނަ ދުވަހު އެމެރިކާގައި ކުރިއަށް ގެންދާ ރިޔާސީ އިންތިހާބުގެ ވޯޓުގައި، ވެރިކަން ކުރާ ރިޕަބްލިކަންސް ޕާޓީގެ ފަރާތުން ވާދަކުރައްވާ ކެންޑިޑޭޓްގެ މަގާމަށް، މިހާރުގެ ރައީސް ޑޮނާލްޑް ޓްރަމްޕް، "ރަސްމީ" ކޮށް ނޮމިނޭޓް ކޮށްފިއެވެ.
ރިޕަބްލިކަންސްގެ ރިޔާސީ ކެންޑިޑޭޓްގެ މަގާމަށް ޓްރަމްޕް ނޮމިނޭޓް ކޮށްފައިވަނީ އިންތިހާބާ ދިމާކޮށް ލޯންޗުކުރި ރިޕަބްލިކަން ކޮންވެންޝަންގައެވެ.
ކުރީގެ ނައިބު ރައީސް އަދި ޑިމޮކްރަޓިކް ކެންޑިޑޭޓް، ޖޯ ބައިޑަން،77، އާ ދެކޮޅަށް، ދެވަނަ ދައުރެއް ކަށަވަރު ކުރައްވަން ނިކުމެވަޑައިގަންނަވާ ޓްރަމްޕް،74، ކެންޑިޑަސީ ނޮމިނޭޝަން ގަބޫލުކުރެއްވިކަން އިއުލާން ކުރައްވާނީ މިމަހުގެ 27 ވަނަ ދުވަހު ވައިޓް ހައުސްގައި ކުރިއަށް ގެންދާ ހާއްސަ އިވެންޓެއްގައި ކަމަށް މައުލޫމާތު ލިބެއެވެ.
ކޮރޯނާވައިރަސް ޑިޒީޒް (ކޮވިޑް-19) ގެ ބަލިމަޑުކަމާއެކު، ރިޕަބްލިކަން ޕާޓީއިންވެސް ރިޔާސީ އިންތިހާބުގެ ކޮންވެންޝަން ކުރިއަށް ގެންދަނީ ވާޗުއަލް ޕްލެޓްފޯމެއްގައެވެ. މިއީ މިފަދަ ގޮތަކަށް މި ކޮންވެންޝަން ކުރިއަށް ގެންދާ ފުރަތަމަ ފަހަރެވެ.
ވެރިކަމުގެ ދެވަނަ ދައުރަކަށް ކެމްޕޭން ކުރައްވަމުން ގެންދަވާ ޓްރަމްޕްގެ ރަނިންގް މޭޓަކީ، މިހާރުވެސް ނައިބު ރައީސް ކަމުގެ މަގާމުގައި ހުންނެވި މައިކް ޕެންސެވެ. ރަނިންގް މޭޓުގެ މަގާމަށް ޕެންސްވެސް ވަނީ ނޮމިނޭޓްކޮށްފައެވެ. ކެންޑިޑަސީ ބަލައިގެންނެވިކަން ޕެންސް އިއުލާން ކުރައްވާނީ މާދަމާގެ ވަގުތެއްގައެވެ.
