ހައި ކޯޓުގެ ދެ ފަނޑިޔާރުކަމުގެ މަގާމަށް މީހުން ހޯދަން ޖުޑީޝަލް ސާވިސް ކޮމިޝަން (ޖޭއެސްސީ)އިން އިއުލާންކޮށްފިއެވެ.
ޖޭއެސްސީން ކުރި އިއުލާނެއްގައި ބުނީ ހައިކޯޓުގެ ފަނޑިޔާރުކަމަށް ކުރިމަތިލުމުގެ ފުރުސަތުގައި "ފަނޑިޔާރުން ބޭނުންވާ އަދަދު" އިތުރު ކުރުމަށް ބޭނުންވާތީ އަދި އެކަށީގެންވާ ވަރަށް މީހުން ކުރިމަތިލާފައި ނުވާތީ، އެ އިއުލާނު ބާއިލް ކުރުމަށްފަހު، އަލުން ދެ ފަނޑިޔާރުންގެ މަގާމަށް ކުރިމަތިލުމުގެ ފުރުސަތު މިހާރު ހުޅުވާލާފައިވާ ކަމަށެވެ.
އެގޮތުން ކުރީގެ އިއުލާނުގެ ދަށުން ހައިކޯޓުގެ ފަނޑިޔާރުކަމަށް ކުރިމަތިލި ފަރާތްތަކުން އެޕްލިކޭޝަން ފޯމު ފިޔަވައިއިތުރުން އެހެން އެއްވެސް ލިޔެކިއުމެއް އެއިއުލާނުން ކޮށްފައިވާ މަގާމުތަކަށް ކުރިމަތިލާއިރު ހުށަހަޅަން ނުޖެހޭނެ ކަމަށް ޖޭއެސްސީން ވަނީ ބުނެފައެވެ.
އެ މަގާމަށް ޝަރުތު ފުރިހަމަވާ ފަރާތްތަކުން އަންނަ މަހު އަށް ވަނަ ދުވަހު، މެންދުރުފަހު 2:00ގެ ކުރިން، އެޕްލިކޭޝަން ފޯމު ހުށަހެޅުމަށް ޖޭއެސްސީން ވަނީ އެދިފައެވެ. އަދި ކަމާ ގުޅުންހުރި ލިޔެކިޔުންތައް ކޮމިޝަންގެ ރަސްމީ އީމެއިލް އަށް ފޮނުވަމަށް ޖޭއެސްސީން ވަނީ އެދިފައެވެ.
