ބަރަކާތްތެރި ރަމަޟާން މަހުގެ އަޅުކަމާ ވިދިގެން މުސްލިމުންނާ ބައްދަލުކޮށްފައިވާ ފިތުރު އީދަކީ ސައުދީ އަރަބިއްޔާގެ ޙިޖާޒުގެ ރަށްވެހިންނަށް އިތުރު އުފާވެރިކަމެއްވެސް ގެނެސްދޭ އީދެކެވެ. ޙިޖާޒުގެ ރަށްވެހިންނަށް ފިތުރު އީދުގެ އުފާ އެތައް ގުނައެއް އިތުރުވެގެންދާ އެންމެ ބޮޑު އެއް ސަބަބަކީ، އެތައް އަހަރަކަށް ދިގުލައިގެން ގޮސްފައިވާ ޒަމާނީ އާދަކާދައެކެވެ. އެއް ޖީލުން އަނެއް ޖީލަށް ވާރުތަވަމުން ގޮސް ޙިޖާޒުން ފެނިގެންދާ މި ރީތި އާދައަކީ، ފިތުރު އީދު ބަންދާ ދިމާކޮށް އާއިލާތަކުގެ ހުރިހާ މެމްބަރުން އެއްތަންވެ، އީދުގެ އުފާފާޅުކުރުމުގެ އާދައެވެ.
އާއިލާގެ މެމްބަރުންނަށް މަރުހަބާ ކިއުމަށް ގޭގެ ހުރިހާ ތަނެއް ފޮޅާ ސާފުކުރެއެވެ. އެންމެ ހިރަފުސްކޮޅެއްވެސް ނުހުންނަ ވަރަށެވެ. މެހެމާނުންނަށް ހާއްސަކުރެވިފައިވާ ސަރަހައްދުގައި ކެނޑިނޭޅި މަޢްމޫލް ލިބެން ހުރެއެވެ. މިއީ ކަދުރު އަޅައިގެން ތައްޔާރުކުރާ އަރަބި ކުކީއެކެވެ. މިތަންތަނުން ޗޮކްލެޓުވެސް ލިބެން ހުރެއެވެ.
އީދު ދުވަހާ ވިދިގެން އަންނަ 3 ދުވަސްވެސް ހޭދަވެގެންދަނީ މިފަދަ އުފާވެރި ގޮތަކަށެވެ. އީދުގެ ދުވަހުގެ ހެނދުނުގެ ނާސްތާ ފުރިހަމައެވެ. ރޭގަނޑުގެ ކެއުން އެއަށްވުރެ ފުރިހަމައެވެ. ގިނަ އާއިލާތަކުން ބާއްވަނީ ބާބަކިއުއެކެވެ. އެކުއްޖަކަށް ލިބުނު އެންމެ ރީތި އަދި އެންމެ އާ ހެދުން ލައިގެން އާއިލާގެ މެމްބަރުންގެ ތެރޭގައި ކުޑަކުދިންތައް ކޮޅުކޮޅަށް ދުވެ، އުފާފާޅުކުރަމުންދަނީ އާއިލާގެ އެކި މެމްބަރުންގެ ފަރާތުން ލިބެމުންދާ އީދު ހަދިޔާތަކާވެސް އެކުގައެވެ.
އީދު ކޭމުގެ ސުފުރާވެސް އިންތިހާއަށް މުއްސަންޖެވެ. ޑެޒާޓް ޓޭބަލްތައްވެސް ހުރެއެވެ. ސުފުރާތައް ފަޅުފިލުވަމުންދަނީ އެކި ބާވަތްތަކުގެ ޗީޒްއާއި ޕާނާ ޖޭމުތަކާ ޒައިތޫނިންނެވެ. އެންމެ ހިނގާ އެކައްޗަކީ ދިބްޔާޒާއެވެ. މިއީ އެޕްރިކޮޓްގެ އިތުރުން ޕީޗްއާއި ކަދުރު އަދި ވައްތީންޏާ އެކިކަހަލަ ނަޓްސް ބޭނުންކޮށްގެން ތައްޔާރުކޮށްފައި ހުންނަ އެއްޗެކެވެ.
އީދާ ދިމާކޮށް ދިގު މުއްދަތަކަށް އެއްތަން ނުވެވޭ އާއިލާތަކުންވެސް، މެމްބަރުންގެ ގޭގެއަށް ޒިޔާރަތް ކުރެއެވެ. ގޭގެއަށް ޒިޔާރަތް ނުކުރެވޭ މެމްބަރުން އީދު ނަމާދުގެ މައިދާނުން އެކަކު އަނެކަކާ ބައްދަލުކޮށް ތަހުނިޔާއާއި ހެޔޮ އެދުންތައް ބަދަލުކޮށްހަދައެވެ.
