ދިވެހިރާއްޖޭގެ ގާނޫނީ ދާއިރާއަށް ދިގު މުއްދަތަކަށް އަގުހުރި ހިދުމަތްތަކެއް ކޮށްދެއްވާފައިވާ އަދި ވަޒީފާއާ ބެހޭ ޓްރައިބިއުނަލްގެ މެންބަރެއްގެ މަގާމުގައި ހުންނެވި ފާތިމަތު ސައުސަން، އިންޑިއާގައި ފަރުވާ ހޯއްދަވަމުން ގެންދަވަނިކޮށް މިއަދު ފަތިހު ކުއްލި ގޮތަކަށް ނިޔާވެއްޖެއެވެ.
ސިއްހީ ފަރުވާއަކަށް އަވައްޓެރި އިންޑިއާއަށް ވަޑައިގެން އުޅުއްވަނިކޮށް ސައުސަން ނިޔާވިއިރު ހުންނެވީ ވަޒީފާއާ ބެހޭ ޓްރައިބިއުނަލްގެ އިންޑަސްޓްރިއަލް ރިލޭޝަންސް ޑިވިޝަންގެ މެންބަރުކަމުގެ މަގާމުގައެވެ. މި މަގާމަށް ސައުސަން އިސްކުރައްވާފައިވަނީ 2024 ވަނަ އަހަރުގެ އޮކްޓޫބަރު މަހުގެ 2 ވަނަ ދުވަހުއެވެ.
އަލްއުސްތާޛާ ފާތިމަތު ސައުސަން ފާހަގަކުރެވިފައިވަނީ ޝަރުއީ އަދި ގާނޫނީ ދާއިރާގައި ގިނަ ތަޖުރިބާތަކެއް ހޯއްދަވައި، ވަކީލެއްގެ ހައިސިއްޔަތުންނާއި އިސް މަގާމުތަކުގައި ފާހަގަކޮށްލެވޭ ފަދަ ހިދުމަތްތަކެއް ގައުމަށް ފޯރުކޮށްދެއްވި ފަރާތެއްގެ ގޮތުގައެވެ.
