އެމްޑީޕީގެ އެތެރޭގެ އިންތިހާބުތަކަށް ބޭރުން ނުފޫޒު ފޯރުވުން ކުޑަކުރުމަށް، އިބްރާހިމް ނާޒިލް ޕާޓީގެ އަސާސީ ގަވައިދަށް ބައެއް އިސްލާހުތައް ހުށަހަޅައިފިއެވެ.
ނާޒިލް ހުށަހެޅި އިސްލާހުން، ޕާޓީގެ އެތެރޭގެ އިންތިހާބުތަކުގައި ވޯޓު ދިނުމުގެ ހައްގު ލިބޭނީ ވޯޓުލާ ދުވަހުގެ 90 ދުވަސް ކުރިން ޕާޓީގެ ރަސްމީ ދަފްތަރުގައި ރަޖިސްޓްރީ ވެފައިވާ މެމްބަރުންނަށެވެ. އަދި ޕާޓީގެ ހުރިހާ މެންބަރުން ވޯޓުލާ އިންތިހާބުތައް 120 ދުވަސް ކުރިން އިއުލާނު ކުރަންވާނެ ކަމަށްވެސް ނާޒިލްގެ އިސްލާހުގައި ބަޔާން ކުރެވިފައިވެއެވެ.
ނާޒިލް ހުށަހެޅުއްވި އިސްލާހުގައި އިތުރަށް ވިދާޅުވީ ޕާޓީގެ މަގާމަށް ކުރިމަތިލުމަށް ކުރެވޭ އިއުލާނުގައި ވާދަކުރުމުގެ ޝަރުތުތަކާ، ހުށައެޅުމުގެ މުއްދަތުތަކާއި ވޯޓުލާ ތާރީހު އެނގޭނެ ގޮތަށް ބަޔާން ކުރަންޖެހޭނެއެވެ.
ނާޒިލް ވިދާޅުވީ، މި އިސްލާހު ހުށަހެޅި މައިގަނޑު ސަބަބަކީ ޕާޓީގެ އެތެރޭގެ އިންތިހާބުތައް ބާއްވާ ވަގުތު، ގިނަ ބަޔަކު ޕާޓީއަށް ވަދެ ނިކުމެ ވޯޓުގެ އަދަދު ބޮޑުތަނުން ބަދަލުވާތީ، އެކަން ހުއްޓުވުމަށް ކަމަށެވެ. އަދި މި ބަދަލުތަކުން ޕާޓީގެ އެތެރޭގެ އިންތިހާބުތައް އިންސާފުވެރި ގޮތެއްގައި ބޭއްވުމަށް ފުރުސަތު ލިބޭނެ ކަމަށް ނާޒިލް ވިދާޅުވިއެވެ.
