ރައީސުލްޖުމްހޫރިއްޔާ ޑރ މުހައްމަދު މުއިއްޒު އިސްނަންގަވައިގެން ފެއްޓެވި "ދިވެހި ވަތަނީ ހިދުމަތް" ޕްރޮގްރާމަށް އެއް އަހަރު ފުރުނުއިރު، އެ ޕްރޮގްރާމްގެ ދަށުން 1000 އަށް ވުރެ ގިނަ ޒުވާނުން ތަމްރީނު ފުރިހަމަކޮށް، އޭގެ ތެރެއިން 400 އަށް ވުރެ ގިނަ ޒުވާނުންނަށް އެކި މުއައްސަސާތަކުން ވަޒީފާ ހަމަޖައްސައިދީފިއެވެ.
ދިވެހި ވަތަނީ ހިދުމަތުގެ އެއްވަނަ އަހަރީ ދުވަހާ ގުޅިގެން ޑިފެންސް މިނިސްޓްރީން އާންމުކޮށްފައިވާ ތަފާސްހިސާބުތަކުން ހާމަވާގޮތުގައި މިހާތަނަށް މި ޕްރޮގްރާމްގެ ދަށުން ޖުމުލަ 1،091 ދަރިވަރުން ވަނީ ދަސްވެނިވެފައެވެ.
މި ޕްރޮގްރާމްގެ ދަށުން މައިގަނޑު ދެ ތަމްރީނެއް ކުރިއަށް ގެންދެއެވެ. އެއީ ޅ. މާފިލާފުށީގައި ހުންނަ އެމްއެންޑީއެފް ކޮމްޕޮސިޓް ޓްރޭނިން ސެންޓަރުގައި ހިންގާ ނޭޝަނަލް ސާވިސް އިނީޝަލް ޓްރޭނިން (އެންއެސްއައިޓީ) އާއި، ބ. ކިހާދޫގައި ހުންނަ އެމްއެންޑީއެފް ސްކޫލް އޮފް އިންޖިނިއަރިން އެންޑް ލޮޖިސްޓިކްސްގައި ހިންގާ ނޭޝަނަލް ސާވިސް ސްކިލް ޓްރޭނިން (އެންއެސްއެސްޓީ) އެވެ.
ތަފާސްހިސާބުތައް ދައްކާ ގޮތުން، އިނީޝަލް ޓްރޭނިންގެ ތިން ބެޗެއް ނިންމައި 1،028 ދަރިވަރުން ވަނީ ދަސްވެނިވެފައެވެ. އޭގެ ތެރޭގައި ހިމެނެނީ 842 ފިރިހެނުންނާއި 186 އަންހެނުންނެވެ. އަދި ސްކިލް ޓްރޭނިންގެ ފުރަތަމަ ބެޗުން 63 ދަރިވަރުން ދަސްވެނިވެފައިވާއިރު، ދެވަނަ ބެޗުގައި ތަމްރީނު ފުރިހަމަކުރި 73 ދަރިވަރުން 2026 އޮކްޓޯބަރު 3 ވަނަ ދުވަހު ދަސްވެނިވުމަށް އަންނަނީ ތައްޔާރުވަމުންނެވެ.
މީގެ އިތުރުން، މި އަހަރުގެ ފަހުކޮޅު އިތުރު ތަމްރީނުތަކެއް ފެށުމަށް ވަނީ ރާވާފައެވެ. އެގޮތުން، އޮކްޓޯބަރު މަހުގެ ތެރޭގައި ސްކިލް ޓްރޭނިންގެ ތިންވަނަ ބެޗާއި އިނީޝަލް ޓްރޭނިންގެ ހަތަރުވަނަ ބެޗު ފެށުމަށް ހަމަޖެހިފައިވާއިރު، މި ދެ ޕްރޮގްރާމުގައި ޖުމުލަ 430 ދަރިވަރުން ބައިވެރިވާނެ ކަމަށް ޑިފެންސް މިނިސްޓްރީގެ ތަފާސްހިސާބުގައި ވަނީ ބަޔާންކޮށްފައެވެ.
ވަޠަނީ ހިދުމަތް ފުރިހަމަކުރި ޒުވާނުންނަށް ވަޒީފާގެ ފުރުސަތުތައް ފަހިކޮށްދިނުމަށް ސަރުކާރުން ކުރަމުންދާ މަސައްކަތުގެ ދަށުން، 2026 ސެޕްޓެމްބަރު 30 ގެ ނިޔަލަށް 402 ޒުވާނަކަށް ވަނީ ވަޒީފާ ހަމަޖެހިފައެވެ. ވަޒީފާއަށް އެދިފައިވާ 543 މީހުންގެ ތެރެއިން އެންމެ ގިނަ ބަޔަކަށް ވަޒީފާ ލިބިފައިވަނީ ސަލާމަތީ ބާރުތަކުންކަން ތަފާސްހިސާބުތަކުން ހާމަވެއެވެ.
މި ޕްރޮގްރާމުގައި ރާއްޖޭގެ ހުރިހާ އަތޮޅަކުން ވެސް ދަރިވަރުން ބައިވެރިވެފައިވާކަން ތަފާސްހިސާބުތަކުން ދައްކައެވެ. އެންމެ ގިނަ ދަރިވަރުން ނިސްބަތްވަނީ ކ. އަތޮޅަށެވެ. އެ އަތޮޅުން 155 ދަރިވަރުން ތަމްރީނު ފުރިހަމަކޮށްފައިވާއިރު، ލ. އަތޮޅުން 99 ދަރިވަރުން، ހދ. އަތޮޅުން 95 ދަރިވަރުން، ތ. އަތޮޅުން 73 ދަރިވަރުން އަދި ރ. އަތޮޅުން 69 ދަރިވަރުން ވަނީ ދަސްވެނިވެފައެވެ.
ދިވެހި ވަތަނީ ހިދުމަތަކީ 2025 އޮކްޓޯބަރު 1 ވަނަ ދުވަހު ޅ. މާފިލާފުށީގައި ހުންނަ އެމްއެންޑީއެފް ކޮމްޕޮސިޓް ޓްރޭނިން ސެންޓަރުގައި ބޭއްވި ހާއްސަ ރަސްމިއްޔާތެއްގައި ރައީސުލްޖުމްހޫރިއްޔާ ރަސްމީކޮށް އިފްތިތާހުކޮށްދެއްވި މަޝްރޫއެކެވެ. މި މަޝްރޫއުގެ މައިގަނޑު މަގުސަދަކީ ދިވެހި ގައުމިއްޔަތަށް ލޯބިކުރާ، އިސްލާމްދީނަށް ފަރުވާތެރި، އަދި ޖިސްމާނީ ގޮތުންނާއި ނަފްސާނީ ގޮތުން ދުޅަހެޔޮ ޒުވާން ޖީލެއް ބިނާކުރުމެވެ.
