ރައްޔިތުންގެ މަޖިލީހުގެ މެމްބަރުންގެ މާލީ ބަޔާން މިއަދު އާއްމުކޮށްފައިވާއިރު، ޕީއެންސީގެ ޕީޖީ ލީޑަރު އަދި އިނގުރައިދޫ ދާއިރާގެ މެންބަރު އިބްރާހީމް ފަލާހުއަށް އާމްދަނީއަށް 5.5 މިލިއަން ރުފިޔާ ލިބިފައިވާކަމަށް ހާމަކޮށްފިއެވެ.
މިއީ 20 ވަނަ ރައްޔިތުންގެ މަޖިލީހުގެ މެންބަރުންގެ މާލީ ބަޔާންތައް ހާމަކުރުމުގެ ސިޔާސަތުގެ ދަށުން އާންމުކުރި ބަޔާނެކެވެ.
ފަލާހުގެ މާލީ ބަޔާނުން ދައްކާ ގޮތުގައި، ފާއިތުވި އަހަރު އޭނާއަށް މަޖިލިސް މެންބަރެއްގެ މުސާރައިގެ ގޮތުގައި 990،000 ރުފިޔާ ލިބިފައިވެއެވެ. މީގެ އިތުރުން ވިޔަފާރީގެ ފައިދާގެ ގޮތުގައި 1.8 މިލިއަން ރުފިޔާ އަދި ކުލީގެ ގޮތުގައި 2.8 މިލިއަން ރުފިޔާ ލިބިފައިވާ ކަމަށް ބަޔާނުގައިވެއެވެ.
މީގެއިތުރުން މާލީ ބަޔާނުން ދައްކާ ގޮތުގައި ފާއިތުވި އަހަރުގެ ތެރޭގައި ފަލާހު ވަނީ އަލަށް ދެ ކުންފުންޏެއް ރަޖިސްޓްރީކޮށްފައެވެ. އެއީ ބޭރު ފައިސާ ގަނެވިއްކުމަށް އުފެއްދި "ސަން ކަރަންސީ އެކްސްޗޭންޖް" އާއި އިމާރާތްކުރުމުގެ ދާއިރާއަށް ހާއްސަ "ސަން ކްރަފްޓް ކޮންސްޓްރަކްޝަން" އެވެ. މި ދެ ކުންފުނީގެ ވެސް 90 ޕަސެންޓް ހިއްސާ އޮންނަނީ ފަލާހުގެ ނަމުގައެވެ.
މީގެ އިތުރުން ވެސް އޭނާގެ ހިއްސާ އޮންނަ އިތުރު ތިން ކުންފުންޏެއް އޮންނަ ކަމަށް ބަޔާނުގައި ހިމަނާފައިވެއެވެ. އެ ތިން ކުންފުންޏަކީ:
- މެރިންގ ޑިޒައިން މޯލްޑިވްސްް
- ސަންހޮލިޑޭސް ޕްރައިވެޓް ލިމިޓެޑް
- އައިލެންޑް ޓްރޭޑް ޕްރައިވެޓް ލިމިޓެޑް
މުދަލާއި ފައިސާގެ ތަފްސީލަށް ބަލާއިރު، ފަލާހުގެ ނަމުގައި ޖުމްލަ ފަސް ބިމެއް އޮވެއެވެ. އޭގެ ތެރޭގައި މާލެއިން ހަތަރު މިލިއަން ރުފިޔާއަށް ގަނެފައިވާ 1،000 އަކަފޫޓުގެ ގޯއްޗަކާއި، ހުޅުމާލެއިން ގަނެފައިވާ ގޯއްޗެއްގެ އިތުރުން ރ. އިންނަމާދޫގައި އޮންނަ ތިން ގޯތި ހިމެނެއެވެ.
މާލީ ބަޔާން ހުށަހެޅި ތާރީހާ ހަމައަށް އޭނާގެ ބޭންކް އެކައުންޓުތަކުގައި ހުރީ 111،074.84 ރުފިޔާއާއި 300.75 ޑޮލަރެވެ. ދަރަނީގެ ގޮތުގައި ބޮޑު އަދަދެއް ބަޔާންކޮށްފައިވާއިރު، މި އަހަރުގެ ފެބްރުއަރީ މަހުގެ 20 ވަނަ ދުވަހު ބޭންކް އޮފް މޯލްޑިވްސް (ބީއެމްއެލް) އިން 15.7 މިލިއަން ރުފިޔާގެ ލޯނެއް ނަގާފައިވާކަން ހާމަވެއެވެ.
މި ލޯނަށް މި އަހަރު 887،413ރ ދައްކާފައިވާއިރު ލޯނުގައި ނުދައްކާ ބާކީ 14،342،682ރ ހުރިކަމަށް މާލީ ބަޔާނުން ހާމަވެއެވެ.
ގާނޫނުއަސާސީއާއި ރައްޔިތުންގެ މަޖިލީހުގެ ގަވާއިދު ބުނާ ގޮތުން، ކޮންމެ އަހަރަކުވެސް މަޖިލީހުގެ މެންބަރުން އެ މީހުންގެ އާމްދަނީއާއި މުދަލާއި ދަރަނީގެ ބަޔާން ތައްޔާރުކޮށް މަޖިލީހަށް ހުށަހަޅަން ޖެހެއެވެ. މިއީ ދައުލަތުގެ މަގާމުތަކުގައި ތިބޭ ފަރާތްތަކުގެ މާލީ ކަންކަން ހާމަކޮށް، ކޮރަޕްޝަނަށް މަގުފަހިނުވާނެ ގޮތަށް ނަޒާހަތްތެރިކަން ކަށަވަރުކުރުމަށް އޮންނަ އުސޫލެކެވެ.
