މޯލްޑިވްސް ހައްޖު ކޯޕަރޭޝަން ލިމިޓެޑްގެ މެނޭޖިން ޑިރެކްޓަރުގެ މަގާމުންނާއި، އެ ކޯޕަރޭޝަންގެ ޑިރެކްޓަރުންގެ ބޯޑުގެ މެންބަރުކަމުން މުހައްމަދު ޝަކީލް (ރސ 13449) އިސްތިއުފާ ދެއްވައިފިއެވެ.
ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) އިން ހާމަކޮށްފައިވާ ގޮތުގައި، ޝަކީލް މަގާމުން އިސްތިއުފާ ދެއްވުމަށް ހުށަހެޅުއްވުމާ ގުޅިގެން، އޭނާގެ އިސްތިއުފާ މިހާރު ވަނީ ގަބޫލުކޮށްފައެވެ. ޝަކީލް މި މަގާމުން އިސްތިއުފާ ދެއްވާފައި ވަނީ، އިލެކްޝަންސް ކޮމިޝަނުން ހުސްވެފައިވާ މެންބަރުކަމުގެ މަގާމަށް އޭނާ އައްޔަންކުރުމަށް ރައްޔިތުންގެ މަޖިލީހުން މިއަދު ރުހުން ދިނުމަށް ފަހުއެވެ.
މުހައްމަދު ޝަކީލަކީ މީގެ ކުރިންވެސް އިލެކްޝަންސް ކޮމިޝަންގެ އިސް މަގާމުތަކެއް ފުރުއްވާފައިވާ ބޭފުޅެކެވެ. އެގޮތުން 2013 ވަނަ އަހަރުން ފެށިގެން އެއް އަހަރު ދުވަހު އެ ކޮމިޝަންގެ ޑިރެކްޓަރ ޖެނެރަލްގެ މަގާމު އަދާކުރެއްވުމަށްފަހު، 2014 އިން 2018 އަށް އެ ކޮމިޝަންގެ މެންބަރުކަންވެސް އޭނާ ވަނީ ކުރައްވާފައެވެ.
ރުހުން ހޯދުމަށް މަޖިލީހުގެ ކޮމިޓީގައި ވާހަކަދައްކަވަމުން ޝަކީލް ވިދާޅުވީ، މީގެ ކުރިން އޭނާ ކޮމިޝަނުން ވަކިވީ މިނިވަންކަމާއެކު މަސައްކަތް ކުރެވޭނެ މާހައުލެއް ނެތުމުން ކަމަށެވެ. ނަމަވެސް، ކުރިއަށް އޮތް ތަނުގައިވެސް އެއްވެސް ނުފޫޒެއްގެ ދަށުނުވެ، މިނިވަންކަމާއެކު މަސައްކަތް ކުރައްވާނެ ކަމުގެ ޔަގީންކަން އޭނާ ވަނީ ދެއްވާފައެވެ. މީގެ އިތުރުން، ހުރިހާ ސިޔާސީ ޕާޓީތަކެއްގެ ކަންބޮޑުވުންތަކަށް ހަމަހަމަ ފުރުސަތު ދެއްވާނެ ކަމަށްވެސް ޝަކީލް ވިދާޅުވިއެވެ.
ރައީސް ޑރ. މުހައްމަދު މުއިއްޒުގެ ސަރުކާރުގައި ހައްޖު ކޯޕަރޭޝަންގެ އެމްޑީގެ މަގާމުގައި ހުންނަވައި، ޝަކީލް ވަނީ އެ ކޯޕަރޭޝަންގެ ހިންގުން ހަރުދަނާކުރުމަށް މުހިންމު މަސައްކަތްތަކެއް ކުރައްވާފައެވެ.
