މާލޭގެ މަގުތަކުގެ ޓްރެފިކް ތޮއްޖެހުން ކުޑަކޮށް، އަމާންކަން ގާއިމުކުރުމަށް ދިވެހި ފުލުހުންގެ ހިދުމަތުން ކުރިއަށްގެންދާ ހާއްސަ މަސައްކަތްތަކުގެ ތެރެއިން، މިރޭ މާލޭގެ ބައެއް ސަރަހައްދުތައް ބަންދުކުރުމަށް ނިންމައިފިއެވެ.
ފުލުހުން ބުނީ މިރޭ 20:00 އިން ފެށިގެން ދަންވަރު 00:00 އާ ހަމައަށް މާލޭގެ އެކި ސަރަހައްދުތަކުގެ މަގުތައް އާންމު ދަތުރުފަތުރަށް ބަންދުކުރެވޭނެކަމަށެވެ.
މިރޭގެ ވަގުތުތަކުގައި ބަންދުކުރުމަށް ހަމަޖެހިފައިވާ ސީދާ މަގުތަކުގެ ތަފްސީލު ފުލުހުން އަދި ހާމަކޮށްފައެއް ނުވެއެވެ.
މިރޭ އިދިކޮޅު އެމްޑީޕީން އަންނަނީ "ވަޒީފާ ބުރާސްފަތި" ނަމުގައި ބޮޑު އިހުތިޖާޖެއް ބޭއްވުމަށް ތައްޔާރުވަމުންނެވެ. މިފަދަ އިހުތިޖާޖުތަކުގައި މީގެ ކުރިން ވެސް ފުލުހުން ވަނީ މަގުތަކުގެ ޓްރެފިކް ކޮންޓްރޯލްކޮށްފައެވެ.
މީގެއިތުރުން މާލޭގެ ޓްރެފިކް ބާރުބޮޑުވާ ވަގުތުތަކުގައި، ހާއްސަކޮށް މަޖީދީ މަގާއި ބޮޑުތަކުރުފާނު މަގު ފަދަ މައި މަގުތަކުގެ ބައެއް ސަރަހައްދުތައް ބަންދުކޮށްގެން ފުލުހުން ވަނީ ޓްރެފިކް ކޮންޓްރޯލްކޮށްފައެވެ.
މި ބަދަލުތަކާ ގުޅިގެން އާންމު ރައްޔިތުންގެ ފަރާތުން ފުރިހަމަ އެއްބާރުލުން ދިނުމަށް ފުލުހުން ވަނީ އިލްތިމާސްކޮށްފައެވެ.
އޮޕަރޭޝަން ނިމުމާއެކު ދަންވަރު 00:00 ގެ ފަހުން މާލޭގެ ހުރިހާ މަގުތަކެއް އާންމު ހާލަތަށް ގެނެވި، އާންމުކޮށް ދަތުރުފަތުރު ކުރެވޭނެ ގޮތަށް ހުޅުވާލާނެ ކަމަށް ވެސް ފުލުހުން ވަނީ ހާމަކޮށްފައެވެ.
