މާތް ﷲގެ ރަސޫލުންގެ ތެރެއިން ކީރިތި ޤުރުއާނުގައި އެބޭކަލެއްގެ ނަން އެންމެ ގިނައިން އައިސްފައިވާ މޫސާ އަލައިހިއްސަލާމް އުފަންވެވަޑައިގެންނެވީ މިސްރުގެ ބަނީ އިސްރާއީލު ބާގާއަށެވެ. އެޒަމާނަކީ މިސްރުގައި ވެރިކަން ކުރި ފިރައުނުގެ ފަރާތުން ބަނީ އިސްރާއީލުގެ މީހުންނަށް ގިނަ އަނިޔާތަކެއް ކުރި މަތިވަމުން އައި ޒަމާނަކެވެ. ބަނީ އިސްރާއީލުގެ ޒުވާނެއް އައިސް ފިރައުންގެ ވެރިކަން ވައްޓާލާތަން އަނިޔާވެރި ފިރައުނަށް ހުވަފެނުން ފެނުނު ދުވަހުން ފެށިގެން އެދަރިކޮޅުގެ ފިރިހެނުންނާ ފިރިހެން ކުދިން އެއަނިޔާވެރި ރަސްގެފާނު މަރަން ފެށިއެވެ. އަދި ކޮންމެ ދެ އަހަރަކުން އެއް އަހަރު ބަނީ އިސްރާއީލު ބާގާގެ އައިލާތަކަށް އުފަންވާ ތުއްތު ކުދިން ވެސް މަންމަގެ އުގުގައި އޮއްވާ ގަތުލުކުރެއެވެ.
މޫސާގެފާނު އުފަންވެވަޑައިގެންނެވީ އެގޮތަށް ބަނީ އިސްރާއީލުގެ ފިރިހެން ކުދިން ގަތުލުކުރަން ފިރައުން ކަނޑައަޅާފައިވާ އަހަރެއްގައެވެ. އެހެން ނަމަވެސް މޫސާގެފާނުގެ މަންމާފުޅާއި ދައްތާފުޅުގެ ހިތްވަރުގަދަކަމުން ތުޕުޅު މޫސާގެފާނު ސަލާމަތްކުރެވުނު އިރު ކަންކަން ދިމާކުރި ގޮތުން އެކަލޭނގެފާނަށް ހިމާޔަތް ލިބިވަޑައިގެންނެވީ ސީދާ ފިރައުންގެ ގަނޑުވަރުގެ ތެރޭގައެވެ.
އަނިޔާވެރި ފިރައުންގެ ގަނޑުވަރުގައި މޫސާގެފާނު ބޮޑުވެވަޑައިގެންނެވި އިރު އެކަލޭނގެފާނުގެ ނަސްލުގެ މީހުންނަށް ކުރިމަތިވަމުން ދިޔަ އަނިޔާތަކާ ތަފާތުކުރުންތައް އެކަލޭނގެފާނަށް ގާތުން ފެނިވަޑައިގެންނެވިއެވެ. އެހެން ކަމުން، އެކަލޭނގެފާނުގެ ނަސްލުގެ މީހުން ފިރައުންގެ ކިބައިން ސަލާމަތްކުރުމުގެ ހުވަފެން އެކަލޭނގެފާނު ދެކެންފެއްޓެވިއެވެ.
މި ހުވަފެން ސީދަލަކަށް ހެދުމަށް އެކަލޭނގެފާނަށް ހިތްވަރާ އިރުޝާދު ދެއްވީ އެންމެހާ ކައުނުތަކާ އުޑުތަކުގެ ވެރިޔާއެވެ. އެކަލޭނގެފާނުގެ ދަރިކޮޅުގެ މީހުންނަށް ރައްކާތެރިކަމާއެކު މިސްރުން ނިކުމެވޭނެ މަގު ފަހިކޮށް ދިނުމަށް ފިރައުނު ކައިރީގައި އެދުމަށް މާތް ﷲ އެކަލޭނގެފާނަށް އަމުރުކުރެއްވިއެވެ.
މި އަމުރާއެކު މޫސާގެފާނު ފިރައުންގެ ގާތަށް ވަޑައިގެންނެވީ ބޭބޭފުޅު ހާރޫންއާއެކުއެވެ. ބަނީ އިސްރާއީލު ބާގާގެ މީހުން ރައްކާތެރި ކަމާއެކު މިސްރުން ދެވޭނެ ގޮތް ހަމަ ޖައްސައިދިނުމަށް އެދެބޭކަލުން ފިރައުން ކައިރީގައި އަދަބުވެރިކަމާއެކު އެދުނެވެ.
އެހިނދު އެނިޔާވެރި ފިރުއަނު މޫސާގެފާނަށް ހަނދާންކޮށްދިންނެވެ.
قَالَ أَلَمْ نُرَبِّكَ فِينَا وَلِيدًۭا وَلَبِثْتَ فِينَا مِنْ عُمُرِكَ سِنِينَ
އޭނާ (އެބަހީ: ފިރުއަނު، މޫސާގެފާނަށް) ދެންނެވިއެވެ. ކަލޭނގެފާނު އުފަންވީއްސުރެ ފެށިގެން އަހަރުމެންގެ ތެރޭގައި ކަލޭނގެފާނު ބަލައިބޮޑުކުރީ އަހުރެން ނޫންހެއްޔެވެ؟ އަދި ކަލޭނގެފާނު އަމުރުފުޅުން އެތަށް އަހަރެއްވަންދެން އަހަރުމެންގެ ތެރޭގައި ކަލާނގެފާނު ހުންނެވީމުއެވެ. (ސޫރަތުލް އައްޝުއާރާ، 18)
ފިރިއުނުގެ މި ވާހަކަތަކަށް ޖަވާބު ދެއްވާ މޫސާގެފާނު ވިދާޅުވީ، އެއީ އެކަލޭނގެފާނަށް ވިސްނުންފުޅު ނުދެއްވާ އިރު ކަމަށާ އެކަލޭނގެފާނަކީ މިހާރު އާލަމްތަކުގެ ވެރި ރަސްކަލާނގެ ފޮނުއްވި ރަސޫލެއްކަމަށް ވިދާޅުވިއެވެ.
މިކަމާ އެ ހުދުމުހުތާރު ފިރައުނު ވަރަށް ރުޅިއައެވެ. އަދި އާލަމްތަކުގެ ވެރިރަސްކަލާނގެއަކީ ހަގީގަތެއް ނެތް ބާރެއް ކަމަށާ އޭނާ ނޫން އެހެން މީހަކަށް އަޅުކަން ނުކުރުމަށް މިސްރުގެ މީހުންނަށާ ބަނީ އިސްރާއިލުގެ ބާގާގެ މީހުންނަށް ފިރައުން އެންގިއެވެ.
މާތް ﷲގެ ކުޅަދުންވަންތަކަމުގެ މުއިޖިޒާތްތައް މޫސާގެފާނު ތަކުރާރުކޮށް ދެއްކެވުމުން ވެސް އެބޯހަރު ފިރައުން އޭނާއަށް ވުރެ ބާރުގަދަ ފަރާތެއް ވާ ކަމަށް ގަބޫލެއް ނުކުރިއެވެ.
ބަދަލުގައި ފިރުއަނު މޫސާގެފާނާ އެކަލޭނގެފާނަށް ތަބާވި މީހުންނަށް އެކި ގޮތް ގޮތުން އުނދަގޫތައް ކޮށް އަނިޔާތައް ދެމުން ގެންދިއެވެ. ބަނީ އިސްރާއީލުގެ މީހުން މިސްރުން ފައިބަން ފިރުއަނު ހުއްދަ ނުދިނީ، އެގައުމުގެ ހުރިހާ އަޅު މަސައްކަތްތަކާ ބުރަ މަސައްކަތްތައް ކުރަނީ ބަނީ އިސްރާއީލުގެ މީހުން ކަމަށްވާތީއެވެ.
ފިރުއަނުގެ އަނިޔާތަކާ އެކު ވެސް މޫސާގެފާނަށް ތަބާވަމުންދާ މީހުންގެ އަދަދު ދުވަހުން ދުވަހަށް އިތުރުވަމުންދާތީ އެކަމާ ރުޅިގަދަވެ ފިރުއައުނު މިސްރުގެ މީހުންނާ ބާނީ އިސްރާއީލުގެ މީހުން އެއްކުރިއެވެ. އަދި މޫސާގެފާނަކީ ދޮގުވެރިއެއް ކަމަށް ބުނެ ފިރުއަނު އޭނާގެ ހުރިހާ މުދަލާ ބާރެއް ދެއްކިއެވެ.
ބަލާ ބެލުމަށް މީގެ ތެރެއިން ބާރުގަދައީ ފިރައުން ކަމަށް މިސްރުގެ މީހުންނަށް ހީވިއެވެ. އެހެން ނަމަވެސް އެ އެއްވުމަށް ފަހު ދެން އެގައުމަށް އައި މާތް ﷲގެ ކޯފާއާއެކު އެމީހުންގެ މެދުގައި ސުވާލުތައް އުފެދުނެވެ. މިގޮތުން، ފުރަތަމަ މިސްރުގެ ހުރިހާ ދަނދުބިންތަކަށް ފެން ދޭ ނީލަ ކޯރު ހިކިގެން ދިޔަތަން ގައުމުގެ މީހުންނަށް ފެނިގެން ދިޔައެވެ. ދުނިޔޭގެ އެންމެ ބޮޑު އެއް މި ކޯރު މުޅިން ހިކުމުގައި މީގެ ކުރިން ވެފައިވާ ކަމެއް ނޫނެވެ.
ދެން އެއްއަށް ފަހު އައި ހިކި ފަސް ދަނޑުވެރިކަން މުޅިން ދަށްވެގެން ދިޔަ އަހަރުތަކެކެވެ. އެއަށް ފަހު ދަނޑުބިންތައް ފެންބޮޑުވެ ހަލާކުވާ ވަރަށް ވާރޭ ވެހުނެވެ.
މިސްރުގެ މީހުންނާ ދެކޮޅަށް މާތް ﷲގެ ކޯފާއެއް އައިސްދާނެ ކަމަށް ވިދާޅުވެ މޫސާގެފާނު ދެއްވި އިންޒާރު އެބައިމީހުންގެ ހަނދާނަށް އައެވެ. އަދި އެކަލޭނގެފާނު އަރިހަށް ގޮސް ތިމަންމެން މޫސާގެފާނުގެ އިލާހަށް އިމާންވީ ކަމަށް ބުނެ މާތް ﷲގެ ކޯފާ އެނބުރި ގެންދިއުމަށް އެކަލާނގެއަށް ދުއާކޮށް ދިނުމަށް މޫސާގެފާނު ގާތު އެދުނެވެ.
ގައުމުގެ މީހުންގެ އެދުމުގެ މަތިން މޫސާގެފާނު މާތް ﷲގެ ކޯފާ ހުއްޓާލުމަށް އެދި ދުއާ ދެންނެވިއެވެ. އެހިނދު މާތް ﷲ އެބިމުގައި އުފެދިފައިވާ ބޮޑު ފެންގަނޑު ހިންދަވާލައްވާ އެބިމުގައި ވާ ގަސްތަކަށް ދިރުންދެއްވިއެވެ. އެހެން ނަމަވެސް، މިސްރުގެ މީހުންވީ ދޮގުވެރި ނުބައި ބަޔަކަށެވެ.
މާތް ﷲގެ ކޯފާ ހަމަ ގެންދެވުމާއެކު އަލުން އެމީހުންގެ ޝިރުކާ ނުބައި އަމަލުތަކުގައި މަސްއޫލުވެގެން އުޅެން ފެށިއެވެ. އަނެއްކާވެސް މާތް ﷲގެ ކޯފާއެއް އެގައުމަށް އައުމުން މޫސާގެފާނު އަރިހަށް ގޮސް ކޯފާ އެނބުރި ގެންދިއުމަށް ދުއާ ކުރުމަށް އެކަލޭނގެފާނު އަރިހުން އެމީހުން އާދޭސްކުރެއެވެ. މާތް ﷲގެ ކޯފާ އަނބުރާ ގެންދެވުމާއެކު މިސްރުގެ މީހުން އެމީހުން ބުނި ބަސް ދޫކޮށްލާ ކެހިވެރި ބައަކަށްވެއެވެ.
މިކަމާ ބެހޭ ގޮތުން ސޫރަތުލް އަލް އަރާފްގައި މާތް ﷲ ވަހީކުރައްވާފައިވެއެވެ.
فَأَرْسَلْنَا عَلَيْهِمُ ٱلطُّوفَانَ وَٱلْجَرَادَ وَٱلْقُمَّلَ وَٱلضَّفَادِعَ وَٱلدَّمَ ءَايَـٰتٍۢ مُّفَصَّلَـٰتٍۢ فَٱسْتَكْبَرُوا۟ وَكَانُوا۟ قَوْمًۭا مُّجْرِمِينَ
މާނައީ: ދެން ކަނޑައެޅިގެން ބަޔާންވެގެންވާ އާޔަތްތަކެއް ކަމުގައި (ފެންބޮޑުވުމުގެ) ތޫފާނާއި، ގޮއްފުޅަންގާއި، އުކުނާއި، ބޮކާއި، ލޭ، ތިމަންރަސްކަލާނގެ އެއުރެންގެ މައްޗަށް ފޮނުއްވީމެވެ. ދެންވެސް އެއުރެން ބޮޑާވެ ގަތޫއެވެ. އަދި އެއުރެން ކުށްވެރި ބަޔަކު ކަމުގައިވޫއެވެ.
މާތް ﷲ އާއި އެކަލާނގެ ރަސޫލާއަށް މިސްރުގެ މީހުން ކިޔަމަންނުވާނެކަން މޫސާގެފާނަށް ވިސްނިވަޑައިގެންނެވިއެވެ. އަދި ބަނީ އިސްރާއީލު ބާގާގެ މީހުންނާ ދެކޮޅަށް މިސްރުގެ މީހުން ކުރަމުން ދިޔަ އަނިޔާތައް ހުއްޓާ ނުލާނެ ކަން ވެސް އެކަލޭނގެފާނަށް ވިސްނިވަޑައިގެންނެވިއެވެ. އެހެން ކަމުން އެކަލޭނގެފާނާ ބާނީ އިސްރާއީލު ބާގާގެ މީހުން ނިންމީ ސިއްރިޔާތުގައި މިސްރު ދޫކޮށް ދިއުމަށެވެ.
ރަށުން ބޭރުގައި އޮތް ކުޅިވަރުތަކެއްގައި ބައިވެރިވުމަށް ދާން ކަމަށް ބުނެ ބަނީ އިސްރާއީލު ބާގާގެ މީހުން ފިރުއަނުގެ ކިބައިން ހުއްދަ ހޯދިއެވެ. އެހުއްދަ ލިބުމާއެކު ރޭގަނޑުގެ ކަނު އަނދިރީގެ ހިމާޔަތުގައި މިސްރު ދޫކޮށް މޫސާގެފާނާ ބަނީ އިސްރާއީލު ބާގާގެ މީހުން ދިޔައެވެ.
މި ހަބަރު ފިރުއަނަށް ލިބުނީ އެމީހުން ދިޔަތާ އެތަށް އިރެއްވީ ފަހުންނެވެ. އޭނާއަށް ވިސްނުނީ މީ ހަމައެކަނި އަޅު މަސައްކަތް ކުރާނެ މީހުންތައް ހުސްވުން ނޫން ކަމަށާ މިއީ އޭނާގެ ބާރަށާ ނުފޫޒު އަދި އެއްކައުވަންތަކަމަށް ޖެހި ގޮންޖެހުމެއް ކަމަށެވެ. މިސްރުގެ އަސްކަރިއްޔާގެ މުޅި ލަޝްކަރު އެއްކޮށް މޫސާގެފާނާ އެކަލޭނގެފާނުގެ ގައުމުގެ މީހުންގެ ފަހަތުން ފިރައުން އަވަސްވެގަތެވެ.
މޫސާގެފާނު އެކަލޭނގެފާނުގެ ގައުމުގެ މީހުންނާއި އެކު ފައިމަގުގައި ހިންގަމުން ދިޔައެވެ. އިސާހިތަކު ފަހަތުން ބޮޑު ލަޝްކަރެއް އަންނަ އަޑު އިވުނެވެ. ގައުމުގެ މީހުން ބިރުން ތެޅިގަތެވެ. އެހެން ނަމަވެސް މޫސާގެފާނު އެމީހުންނަށް ނަސޭހަތްތެރިވީ އެކަލޭނގެފާނުގެ އިލާހުގެ އިރުޝާދާއެކު ކުރިއަށް ދިއުމަށެވެ.
ބޮޑު ލަޝްކަރު ލޮލުގެ ކޮޅާ ހަމައަށް ފެނުނު އިރު މޫސާގެފާނާ އެކަލޭނގެފާނުގެ ގައުމުގެ މީހުން މިވަނީ މިސްރުގެ އައްސޭރި ފަށަށް އާދެވިފައެވެ. ކުރިމަތީގައި އޮތީ ރަތް ކަނޑެވެ. ފަހަތުގައި އަނިޔާވެރި ފިރައުނާ އޭނާގެ ބިޔަ ލަޝްކަރެވެ. ގައުމުގެ މީހުން އެކަލޭނގެފާނަށް އިތުބާރުކުރުމަށް މޫސާގެފާނު އެދުނު ނަމަވެސް ފިރައުނާގެ އަތް ދަށަށް ދިއުމަށް އެމީހުން ތައްޔާރުވިއެވެ.
އިސާހިތަކު މާތް ﷲގެ އަމުރާއެކު ކަނޑުގެ ލޮނުގަނޑުގައި މޫސާގެފާނު އެކަލޭނގެފާނުގެ އަސާކޮޅުން ޖެއްސެވިއެވެ. މަދު ސިކުންތުކޮޅެއްގެ ތެރޭގައި ކަނޑު ދެފަޅިވެގެން ދިޔައެވެ. އަދި ކަނޑުގެ އެންމެ އަޑި އެބައިމީހުންނަށް އަނެއް ފަރާތެއް ދެވޭނެ މަގެއް އުފެދިގެން ދިޔައެވެ. މޫސާގެފާނު އެކަލޭނގެފާނުގެ ގައުމުގެ މީހުންނާއެކު އެމަގުން އަނެއް ފަރާތަށް ދިއުމަށް އަވަސްވެގަތެވެ.
ކަނޑުގެ އަނެއް އައްސޭރިއަށް އެބައި މީހުންނަށް ދެވުނު އިރު ފިރުއަނާ އޭނާގެ ލަޝްކަރު އަނެއް އައްސޭރިން ކަނޑުގައި އުފެދިފައިވާ މަގަށް ވަދެއްޖެއެވެ. ކަނޑު ކުރިން އޮތް ގޮތަށް ހެދުމަށް މޫސާގެފާނުގެ ގައުމުގެ މީހުން އެކަލޭނގެފާނުގެ އަރިހުގައި ބުންޏެވެ. އެހެން ނަމަވެސް މާތް ﷲގެ އަމުރާއެކު ފިރައުނާ އޭނާގެ ލަޝްކަރު ގޮސް ކަނޑުގެ މެދާ ހަމައަށް ދެވެން ދެން މޫސާގެފާނު މަޑުކުރެއްވިއެވެ.
ފިރުއަނު އެހިސާބަށް ދިއުމުން މޫސާގެފާނު ކަނޑުގެ ލޮނުގަނޑުގައި އަނެއްކާވެސް އަސާކޮޅުން ޖެއްސެވިއެވެ. ލޮނުގަނޑު ކުރިން އޮތް ގޮތަށް ރުޖޫއަވާން ފެށުމުން އަނިޔާވެރި ފިރައުންގެ ހިތަށް ބިރުވެރިކަން ވަނެވެ. އަދި މޫސާގެފާނުގެ ކަލާނގެ އަށް އިމާންވެއްޖެ ކަމަށް ބުނެ ރޮން ފެށިއެވެ. އެހެން ނަމަވެސް އަނިޔާވެރިންގެ ތެރޭގައި ހިމެނޭ އެކަލޭނގެ މާތް ﷲ ގަރަގުކުރެއްވިއެވެ. ފިރައުނާ ބެހޭ ގޮތުން ސޫރަތުލް ޔޫނުސްގެ 92 ވަނަ އާޔަތުގައި އެކަލާނގެ ވަހީ ކުރެއްވިއެވެ.
فَٱلْيَوْمَ نُنَجِّيكَ بِبَدَنِكَ لِتَكُونَ لِمَنْ خَلْفَكَ ءَايَةًۭ ۚ وَإِنَّ كَثِيرًۭا مِّنَ ٱلنَّاسِ عَنْ ءَايَـٰتِنَا لَغَـٰفِلُونَ
މާނައީ:ފަހެ، ތިމަންރަސްކަލާނގެ، މިއަދު ކަލޭގެ (ފުރާނަނެތް) ހަށިގަނޑު ސަލާމަތްކުރައްވާހުށީމެވެ. އެއީ، ކަލޭގެފަހުން އަންނަބަޔަކަށް، ޢިބްރަތެއް ކަމުގައި ކަލޭ ވުމަށެވެ. ހަމަކަށަވަރުން، މީސްތަކުންގެ ތެރެއިން ގިނަމީހުންވަނީ ތިމަންރަސްކަލާނގެ އާޔަތްތަކާމެދު (އެބަހީ: ތިމަންރަސްކަލާނގެ ޤުދުރަތްތެރިކަމުގެ މައްޗަށް ދަލީލު ކުރާ ހެކިތަކާމެދު) ޣާފިލު ވެގެންކަން ކަށަވަރެވެ.
