އަވަށްޓެރި ގައުމުތަކުން އީރާނަށް ހަމަލާއެއް ނުދޭހާ ހިދަކު، އަވައްޓެރި ގައުމުތަކަށް ދޭ ހަމަލާތައް ހުއްޓާލުމަށް އިރާނުގެ ވަގުތީ ލީޑަޝިޕް ކައުންސިލުން ރުހުން ދީފައިވާ ކަމަށް އެ ގައުމުގެ ރައީސް މަސޫދު ޕެޒެޝްކިއަން ވިދާޅުވެއްޖެއެވެ.
އިރާނުން މިއަދު މިކަން އިއުލާންކޮށްފައިވަނީ އެ ގައުމަށް ޔަހޫދީ އިޒްރޭލާއި އެމެރިކާ އިސްވެ އޮވެ ދިން ހަމަލާއަށްފަހު، އަވައްޓެރި ގައުމުތަކުގައި ހުރި އިޒްރޭލު އަދި އެމެރިކާގެ އަސްކަރީ މަރުކަޒުތައް އިރާނުން ހަމަލާދީފައިވާ ދަނޑިވަޅެއްގައެވެ.
އެމެރިކާ އާއި އިޒްރޭލުން އީރާނަށް ދޭން ފެށި ހަމަލާތަކާ އެކު ފެށިފައިވާ ހަނގުރާމަ ހުއްޓުމަކަށް ގެނެވޭތޯ ބައެއް ގައުމުތައް މެދުވެރިންގެ ގޮތުގައި މަސައްކަތް ފަށާފައިވާއިރު އެކްސްގައި ކުރެއްވި ޕޯސްޓެއްގައި މަސޫދު ޕެޒެޝްކިއަން ވިދާޅުވީ ސަރަހައްދުގައި ދާއިމީ ސުލްހައެއް އޮތުމަށް ފުރިހަމަ ތާއީދާއި އެއްބާރުލުން އޮންނާނެކަމަށެވެ. އެހެން ނަމަވެސް ގައުމުގެ މިނިވަންކަމާ ސިޔާދަތު ދިފާއުކުރަން ފަސްނުޖެހޭނެ ކަމަށްވެސް ރައީސް ވިދާޅުވިއެވެ.
އީރާނުން މީގެ ކުރިން ވަނީ ކިތަންމެ ދުވަހަކު ހަނގުރާމަ ކުރަން ޖެހުނަސް އެކަމަށް ތައްޔާރުކަން ހާމަކޮށްފައެވެ. އީރާނުގެ އަސްކަރިއްޔާއިން ބުނީ ހޮރްމޫޒް ކަނޑު އޮޅި ހުޅުވާފައި އޮތް ނަމަވެސް އެތަނުން ދަތުރުކަރަން މަސައްކަތްކުރާ އެމެރިކާ އަދި އިޒްރޭލުގެ ބޯޓުތަކަށް ހަމަލާދޭނެ ކަމަށެވެ.
