ރާއްޖޭގެ ފަތުރުވެރިކަމާއި ވިޔަފާރީގެ ދާއިރާގައި ބާއްވާ އެންމެ ބޮޑު އެއް މައުރަޒު ކަމަށްވާ "ހޮޓެލް އޭޝިއާ އެގްޒިބިޝަން 2026" ގައި ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ) އިން ގިނަ ހަރަކާތްތަކަކާއި ޕްރޮމޯޝަންތަކަކާއެކު ބައިވެރިވެއްޖެއެވެ.
މި އެގްޒިބިޝަން ކުރިއަށްދާނީ މާދަމާއިން ފެށިގެން މި މަހުގެ 30 ވަނަ ދުވަހުގެ ނިޔަލަށް، ހުޅުމާލޭ ސިންތެޓިކް ޓްރެކްގައެވެ.
އެސްޓީއޯއިން މައުލޫމާތު ދޭ ގޮތުގައި، މިއަހަރުގެ އެގްޒިބިޝަންގައި އެ ކުންފުނީގެ ސްޓޯލް ހާއްސަކޮށްފައި ވަނީ އެސްޓީއޯ ޖެނެރަލް ޓްރޭޑިން، އެސްޓީއޯ ޕީޕަލްސް ޗޮއިސް އަދި އެސްޓީއޯ އެނާޖީ އަށެވެ.
މި މައުރަޒުގައި އެސްޓީއޯގެ ސްޓޯލުން އެސްޓީއޯ ޕީޕަލްސް ޗޮއިސް ސުޕާމާކެޓުން ލިބެން ހުންނަ ބައެއް އުފެއްދުންތައް ބޭނުންކޮށްގެން ވަގުތުން ލުއިކާނާ ތައްޔާރުކުރާ ސްޓޭޝަނެއް ހުންނާނެއެވެ. އަދި އެގްޒިބިޝަން ކުރިއަށްދާ 3 ދުވަހުވެސް "ކޮފީ ސްޓޭޓް" ގެ ވަކި ހާއްސަ ބުއިންތަކެއް ހިލޭ ލިބޭނެ އިންތިޒާމު ވަނީ ހަމަޖައްސާފައެވެ.
މީގެއިތުރުން، އަސާސީ ކާބޯތަކެތީގެ ގޮތުގައި ލިސްޓުކޮށްފައިވާ ބާވަތްތަކާއި އެސްޓީއޯ އިލެކްޓްރޯނިކްސްގެ ބައެއް ސާމާނުތައް ސްޓޯލްގައި ދައްކާލުމަށް ބަހައްޓާފައިވާ އިރު، އެސްޓީއޯއިން އެތެރެކުރާ އެކި އުފެއްދުންތަކާ ބެހޭ މައުލޫމާތު ވެސް ފޯރުކޮށްދޭނެއެވެ. ހަމައެއާއެކު މާދަމާ މުޅިން އާ ބްރޭންޑެއް ތައާރަފްކުރުމަށް ހަމަޖެހިފައިވާ އިރު، މި އާ ޕްރޮޑަކްޓް ބޭނުންކޮށްގެން ތައްޔާރުކުރާ އައިސްކްރީމާއި ފޮނިކާތަކެތީގެ ރަހަ ބަލައިލުމުގެ ފުރުސަތުވެސް ޒިޔާރަތްކުރާ ފަރާތްތަކަށް ލިބިގެންދާނެއެވެ.
އެސްޓީއޯ އެނާޖީގެ ފަރާތުން މިއަހަރުގެ އެގްޒިބިޝަންގައި ހާއްސަ ސަމާލުކަމެއް ދެނީ ރިޒޯޓު ކަސްޓަމަރުންނަށް ކަމަށް އެ ކުންފުނިން ބުނެއެވެ. އެގޮތުން ރިޒޯޓުތަކަށް ތެޔޮ އުފުލައިދިނުމުގައި އެސްޓީއޯއިން ފޯރުކޮށްދޭ ހިދުމަތްތަކުގެ މައުލޫމާތު ހިއްސާކޮށް، މި މާކެޓުގައި ކަސްޓަމަރުންގެ ޑިމާންޑުތައް ހުރި މިންވަރު ބެލުމުގެ މަސައްކަތް ކުރިއަށް ގެންދާނެ ކަމަށް އެސްޓީއޯ އިން ބުނެއެވެ.
މި އެގްޒިބިޝަންގައި ސްޓޯލަށް ޒިޔާރަތްކުރާ ފަރާތްތަކަށް ހާއްސަކޮށްގެން ޝައުގުވެރި ޕްރޮމޯޝަނަލް ހަރަކާތްތަކެއްވެސް ވަނީ ރާވާފައި ކަމަށް އެސްޓީއޯ އިން ބުނެއެވެ. އޭގެ ތެރޭގައި އެސްޓީއޯ ސްޓޯލްގައި ރަޖިސްޓްރީކުރާ ފަރާތްތަކުގެ މެދުގައި ކުރިއަށްދާ "ރެޖިސްޓާ އެންޑް ވިން" ހަރަކާތުން، ކޮންމެ ދުވަހަކު ގުރުއަތުން ހޮވޭ ނަސީބުވެރި އެއް ފަރާތަކަށް އަގުހުރި އިނާމެއް ދިނުމަށް ވަނީ ހަމަޖެހިފައެވެ. އަދި އެސްޓީއޯ ޕީޕަލްސް ޗޮއިސް ޕޭޖް ފޮލޯކޮށްގެން ކުރިއަށްދާ "ފޮލޯ އެންޑް ވިން" ހަރަކާތުގެ ތެރެއިން ނަސީބުވެރި ފަރާތަކަށް ޑިޝްވޮޝާ އެއް ހޯދުމުގެ ފުރުސަތުވެސް ވަނީ ހުޅުވާލާފައެވެ.
