ރާއްޖޭގެ އެންމެ ބޮޑު ވިޔަފާރި ކުންފުނި، ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ) ގެ ޖެނެރަލް ޓްރޭޑިންގްގެ ފަރާތުން އިންޑިއާގެ މަޝްހޫރު ކިރުގެ އުފެއްދުންތަކަށް ހާއްސަ ބްރޭންޑެއް ކަމަށްވާ "އަމުލް" ގެ އުފެއްދުންތައް ރާއްޖޭގެ ބާޒާރަށް މިއަދު ރަސްމީކޮށް ތައާރަފްކޮށްފިއެވެ.
މި އުފެއްދުންތައް ތައާރަފްކޮށްފައިވަނީ ހުޅުމާލޭ ސިންތެޓިކް ޓްރެކުގައި މިހާރު ކުރިއަށްދާ ހޮޓެލް އޭޝިއާ އެގްޒިބިޝަންގައި ހުންނަ އެސްޓީއޯގެ ސްޓޯލްގައި މިއަދު ބޭއްވި ޚާއްސަ ހަފްލާއެއްގައެވެ. މި ޕްރޮޑަކްޓްތައް ރަސްމީކޮށް ތައާރަފުކޮށްދެއްވީ އެސްޓީއޯގެ އެގްޒެކެޓިވް ކޮމިޓީ (އެކްސްކޯ) ގެ މެންބަރުންނެވެ.
މި ތައާރަފާއެކު، މިއަދުން ފެށިގެން އަމުލް ބްރޭންޑްގެ މައިގަނޑު އުފެއްދުންތައް ކަމުގައިވާ ކިރާއި، ބަޓަރު، ޗީޒް އަދި އައިސްކްރީމްގެ އެކި ބާވަތްތައް އެސްޓީއޯ ޕީޕަލްސް ޗޮއިސް މެދުވެރިކޮށް އާންމުންނަށް ލިބެން ހުންނާނެ ކަމަށް އެ ކުންފުނިން މަޢުލޫމާތު ދެއެވެ. މީގެއިތުރުން، އެގްޒިބިޝަންގައި ހުންނަ އެސްޓީއޯގެ ސްޓޯލަށް ޒިޔާރަތްކުރާ ފަރާތްތަކަށް އަމުލްގެ އުފެއްދުންތައް ބޭނުންކޮށްގެން ތައްޔާރުކޮށްފައިވާ ތަފާތު ފޮނިކާތަކެއްޗާއި އައިސްކްރީމްގެ ރަހަ ބަލާލުމުގެ ފުރުސަތުވެސް ވަނީ ހުޅުވާލާފައެވެ.
"ދަ ޓޭސްޓް އޮފް އިންޑިއާ" ގެ ގޮތުގައި މުޅި ދުނިޔޭގައިވެސް މަޝްހޫރުވެފައިވާ "އަމުލް" އަކީ އާނަންދު މިލްކް ޔޫނިއަން ލިމިޓެޑްގެ ކުރު ނަމެކެވެ. މިއީ ކިރުގެ ބާވަތްތައް އުފެއްދުމުގައި ދުނިޔޭގެ ފެންވަރުގައިވެސް ފާހަގަކޮށްލެވޭ އިތުބާރު ހޯދާފައިވާ ބޮޑު ބްރޭންޑެކެވެ.
ހޮޓެލް އޭޝިއާ އެގްޒިބިޝަންގައި އެސްޓީއޯގެ ސްޓޯލަށް ޒިޔާރަތްކުރާ ފަރާތްތަކަށް ކޮފީ ސްޓޭޓްގެ ހޮވާލެވޭ ތަފާތު ބުއިންތަކާއެކު ހާއްސަ ޕްރޮމޯޝަނަލް ހަރަކާތްތަކެއްވެސް ވަނީ ރާވާފައެވެ. އެގޮތުން ސްޓޯލުގައި ރަޖިސްޓްރީކުރާ ފަރާތްތަކުގެ މެދުގައި ކުރިއަށްގެންދާ "ރެޖިސްޓަރ އެންޑް ވިން" ހަރަކާތުން ކޮންމެ ދުވަހަކުވެސް ނަސީބުވެރި އެއްފަރާތެއް ގުރުއަތުން ހޮވައި އިނާމު ދިނުމަށް ވަނީ ހަމަޖެހިފައެވެ. އަދި އެސްޓީއޯ ޕީޕަލްސް ޗޮއިސް ޕޭޖް ފޮލޯކޮށްގެން ކުރިއަށްދާ "ފޮލޯ އެންޑް ވިން" ހަރަކާތުގެ ތެރެއިން ނަސީބުވެރި ފަރާތަކަށް ޑިޝްވޮޝަރެއް ލިބުމުގެ ފުރުސަތުވެސް ވަނީ ފަހިކޮށްދީފައެވެ.
މިމަހުގެ 28 އިން ފެށިގެން މިމަހުގެ 30 ގެ ނިޔަލަށް ކުރިއަށްދާ ހޮޓެލް އޭޝިއާ އެގްޒިބިޝަނަށް ޒިޔާރަތްކޮށް، މި އައު އުފެއްދުންތަކުގެ މައުލޫމާތު ހޯދުމުގެ ފުރުސަތު އާންމުންނަށް މިހާރު ވަނީ ހުޅުވާލެވިފައެވެ.
