މަހުގެ އަގު ފްލޯޓްކޮށް ހުރިހާ އެންމެނަށްވެސް އޭގެ އުފާވެރިކަން ލިބޭނެ ނިޒާމް މިސަރުކާރުން ގާއިމުކޮށްފައި ވާކަމަށް ފިޝަރީޒް މިނިސްޓަރު ޝިޔާމް ވިދާޅުވެއްޖެއެވެ.
މިފްކޯއިން ކަޅުބިލަ މަހުގެ އަގު ކަނޑައަޅާފައިވާ ގޮތާ ބެހޭގޮތުން މިއަދުގެ ނޫސްވެރިންގެ ބައްދަލުވުމުގައި ވާހަކަ ދައްކަވަމުން މިނިސްޓަރު ވިދާޅުވީ މިފްކޯ ހަރުދަނާ ކުރުމަށް މަސައްކަތްތަކެއް މިހާރުވެސް ކުރަމުންދާކަމަށާއި، ހަމައެއާއެކު ރައީސުލްޖުމްހޫރިއްޔާ އިއުލާންކުރެއްވި ގޮތަށް މަހުގެ އަގު 16 ރުފިޔާއަށްވުރެއް ދަށް ނުވާގޮތަށް މަހުގެ އަގު ގެންގުޅުމަށް މަސައްކަތް ކުރަމުންދާކަމަށެވެ.
މިނިސްޓަރު ވިދާޅުވީ މަހުގެ އަގު މިހާރު ފްލޯޓް ކުވެފައިވުމުން އެހެން ޕްރައިވެޓް ކުންފުނިތަކާއެކު މިފްކޯއިންވެސް ކޮމްޕެޓިޝަނެއްގެ ތެރެއަށް ވަދެވިފާވާކަމަށެވެ. މިހެންކަމުން މާކެޓަށާއި، މިފްކޯގެ ސަޕްލަޔަރުންގެ ޑިމާންޑަށް ބަލާފައި ބައެއް ދުވަސް ދުވަހު 17 ރުފިޔާ އަށް، 18 ރުފިޔާ އަދި 18.50 އަށްވެސް މިފްކޯއިން މަސްގަނެފައި ވާކަމަށެވެ.
ޝިޔާމް ވިދާޅުވީ 20 ރުފިޔާ އަށް ވުރެއް ދަށް ނުވާނެ އަގަކަށް މަސް ގަތުމަކީ ސަރުކާރުގެ ވައުދެއް ކަމަށާއި، އެކަން ހާސިލު ކުރުމަށް މަސައްކަތް ކުރަމުންދާކަމަށެވެ. އެގޮތުން ފުރަތަމަ ކަމަކަށް ދިވެހި މަސްވެރިން ބާނާ މަސް މިފްކޯއަށް ކިރުވައި، އެއަށް ފައިސާ ދިނުމުގެ އިންތިޒާމްތައް ހަމަޖެއްސުމަށް މަސައްކަތް ކުރެވުނުކަމަށާއި، އަދި ދިވެހިރާއްޖޭގެ މަސްވެރިކަމުގެ ސިނާއަތުގައި ހަރަކާތްތެރިވާ ފަރާތްތައް، މިސިނާއަތުން ބޭރުވިޔަ ނުދީ ތިބެވޭނެ މާހައުލެއް ގާއިމުކުރުމަށް މަސައްކަތް ކުރަމުންދާކަމަށް ޝިޔާމް ވިދާޅުވިއެވެ.
މީގެއިތުރުން މިފްކޯގެ މަސައްކަތްތައް ހަރުދަނާ ކުރުމަށް މިހާރު ކުރިއަށްގެންދާ މަޝްރޫއުތައް ފުރިހަމަ ވުމުން، ރައީސުލްޖުމްހޫރިއްޔާގެ ވައުދު ހާސިލު ވެވޭނެކަމަށް ޝިޔާމް ވިދާޅުވިއެވެ. ޝިޔާމް ވިދާޅުވީ މަސްވެރިކަމުގެ ސިނާއަތުގައި އެންމެން ބާރުވެރިކޮށް އެއް ކޮމްޕެޓިޝަންއަކަށް ވަދެ، ހުރިހާ އެންމެނަށްވެސް އޭގެން އުފާވެރިކަން ލިބޭނެ މެކޭނިޒަމެއް މިހާރު ގާއިމުކޮށްފަވާކަމަށެވެ.
ޔެލޯފިން ޓޫނާގެ މަސްވެރިކަމަށް ރިއާޔަތްކޮށް މިނިސްޓަރު ވިދާޅުވީ މަސްވެރިކަމުގަ އެންމެ ބޮޑު ހޭދައެއް ކުރަން ޖެހޭ ތެޔޮ، އެސްޓީއޯ ރޭޓުން ހުރިހާ އަތޮޅަކުން ލިބެން ފެށުމުން، ތެލަށް ކުރާ ހޭދަ ކުޑަވުމުން ލިބޭ އާމްދަނީ ބޮޑުވެގެންދާނެކަމަށެވެ. އެގޮތުން މި އެޕްރީލް މަހު އެސްޓީއޯ ރޭޓުން ހުރިހާ އަތޮޅަކުން ތެޔޮ ލިބޭނެ އިންތިޒާމުތައް ހަމަޖައްސަން މަސައްކަތް ކުރަމުންދާކަމަށް މިނިސްޓަރު ވިދާޅުވިއެވެ.
