މަސްވެރިކަމުގެ މޫސުމުގައި އައިސް ހޯދުމަށް ހުށައެޅޭ ގޮންޖެހުންތައް މަދު ކުރުމުގެ ގޮތުން މިސަރުކާރުން 6 ރަށެއްގައި އައިސް ޕްލާންޓް ގާއިމުކޮށް ހިދުމަތްދޭން ފަށާފައިވާކަމަށް މިނިސްޓާ އޮފް ފިޝަރީޒް އެންޑް އޯޝަން ރިސޯސަސް އަހްމަދު ޝިޔާމް ވިދާޅުވެއްޖެއެވެ.
ޝިޔާމް މިހެން ވިދާޅުވެފައިވަނީ މިއަދު ނޫސްވެރިންނާ ބައްދަލު ކުރައްވާ ވާހަކަ ދައްކަވަމުންނެވެ.
އެގޮތުން ޝިޔާމް ވިދާޅުވީ މިސަރުކާރު އައި އިރު މަސްވެރި ސިނާޔަތުގަ ހުރި މައިގަނޑު ގޮންޖެހުންތަކުގެ ތެރޭގަ ރަނގަޅު މަސްވެރިކަމެއްގަ އައިސް ނުލިބޭ ވާހަކަ އާއި، އެކި ރަށްރަށުންނާއި، މަސްވެރިކަން އިތުރަށް ކުރިއަރުވަން ބޭނުންވާ އެކި ސަރަހައްދުތަކުން އައިސް ޕްލާންޓް ގާއިމުކުރުމުގެ ރިކުއެސްޓް ކޮށްފައިވާކަމަށެވެ. މިއާއެކު، ރައީސުލްޖުމްހޫރިއްޔާގެ މެނިފެސްޓޯގަ އަހައްމިއްޔަތުކަމެއް ދެއްވާފަވާފަދައިން، މިސަރުކާރުން އެންމެ މުހިންމުކަމެއްގެ ގޮތުގައި މަސްވެރިކަމުގެ މޫސުމުގައި އައިސް ހޯދުމަށް ހުށައެޅޭ ގޮންޖެހުންތައް މަދު ކުރުމަށް މަސައްކަތް ކުރަމުންދާކަމަށް ޝިޔާމް ވިދާޅުވިއެވެ.
ޝިޔާމް ވިދާޅުވީ އައިސް ހޯދުމަށް ހުށައެޅޭ ގޮންޖެހުންތައް މަދު ކުރުމުގެ ގޮތުން މިސަރުކާރުން މިހާރު 6 ރަށެއްގަ އައިސް ޕްލާންޓްތަކެއް ގާއިމުކޮށް ހިދުމަތްދޭން ފަށާފައިވާކަމަށެވެ. މީގެތެރޭގައި ގއ. ގެމަނަފުށި، ގއ. ދެއްވަދޫ، ށ. ފުނަދޫ، ދ. މީދޫ، އަދި ދ. ބަނޑިދޫގައި އައިސް ޕްލާންޓް ގާއިމުކޮށް ހިދުމަތްދޭން ފަށާފައިވާކަމަށް މިނިސްޓަރު ވިދާޅުވިއެވެ. މިއާއެކު މަސްވެރިކަމުގެ ސިނާއަތަށް ވަރަށް ބޮޑު ލުޔެއް އަދި ހައްލެއް ލިބިގެންދާނެކަމަށް މިނިސްޓަރު ފާހަގަކުރެއްވިއެވެ.
މީގެއިތުރުން އިތުރު 9 އައިސް ޕްލާންޓެއް ގާއިމު ކުރުމުގެ މަސައްކަތް ފެށިފައިވާކަމަށް މިނިސްޓަރު ވިދާޅުވިއެވެ. މީގެ ތެރޭގައި ލ. މާބައިދޫ، މ. ވޭވަށް، ޅ. ނައިފަރު، ށ. ކޮމަންޑޫ، މ. މުލަށް، ލ. މާވަށް، ލ. ހިތަދޫ، ހދ. ކުޅުދުއްފުށި، އަދި ދ ހުޅުދެލީގައި ގާއިމު ކުރާ އައިސް ޕްލާންޓައް ހިމެނޭކަމަށް މިނިސްޓަރު ވިދާޅުވިއެވެ.
ޝިޔާމް އިތުރަށް ވިދާޅުވީ ސައުދީ ފަންޑުގެ އެހީ އާއެކު ގދ. ރަތަފަންދޫ، އއ. ރަސްދޫ، ހއ. ދިއްދޫ، ގއ. ދާންދޫ، ކ. ގާފަރުގައި އައިސްޕްލާންޓް އެޅުމަށްޓަކައި އިއުލާންކުރެވިފައިވާކަމަށެވެ. އަދި ސަރުކާރުގެ ބަޖެޓުންވެސް މިއަހަރު އައިސް ޕްލާންޓް ގާއިމުކުރުމަށް ހަމަޖެހިފައިވާކަމަށް ޝިޔާމް ވިދާޅުވިއެވެ. މީގެތެރޭގައި ގއ. ނިލަންދޫ، ގއ. ވިލިނގިލި، ގއ. މާމެންދޫ އައިސް ޕްލާންޓް ހިމެނެއެވެ.
ޝިޔާމް ވިދާޅުވީ އައިސް ޕްލާންޓަތައް ގާއިމުކޮށް ހިދުމަތް ދޭން ފެށުމުން މަސްވެރިކަމުގެ މޫސުމުގައި އައިސް ހޯދުމަށް ހުށައެޅޭ ގޮންޖެހުންތައް ނައްތާލެވޭނެކަމަށެވެ.
