މަތީ ތައުލީމާއި ތަމްރީނުގެ ދާއިރާ ފުޅާކުރުމަށް ސަރުކާރުން ކުރަމުންދާ މަސައްކަތްތަކުގެ ދަށުން، ރ. އަތޮޅުގެ ދެ ރަށެއްގައި މުހިންމު މަޝްރޫއުތަކެއް ކުރިއަށް ގެންދިއުމަށް މިއަދު ސޮއިކޮށްފިއެވެ.
މިނިސްޓްރީ އޮފް ހަޔާ އެޑިޔުކޭޝަން، ލޭބާ އެންޑް ސްކިލްސް ޑިވެލޮޕްމަންޓުން ކުރިއަށްގެންދާ މި މަޝްރޫއުތަކުގެ ދަށުން، ރ. އިންނަމާދޫގައި ޓެކްނިކަލް ވޮކޭޝަނަލް އެޑިޔުކޭޝަން އެންޑް ޓްރެއިނިންގް (ޓިވެޓް) ސެންޓަރެއް ބިނާކުރުމަށާއި، ރ. ހުޅުދުއްފާރުގައި އެކަމަޑޭޝަން ފެސިލިޓީއެއް ތަރައްގީކުރުމަށް ވަނީ ހަމަޖެހިފައެވެ.
ޑިޒައިން އެންޑް ބިލްޑް އުސޫލުން ތަރައްގީކުރާ މި މަޝްރޫއުތަކަކީ ދަރިވަރުންނަށް އެ ރަށްތަކުގައި ތިބެގެން މަތީ ތައުލީމާއި ތަމްރީނު ހޯދުމުގެ ފުރުސަތު ފަހިކޮށްދިނުމަށް ފެށި މަސައްކަތްތަކެކެވެ. ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރުން އަތޮޅުތެރޭގައި ތައުލީމީ ފުރުސަތުތައް އިތުރުކުރުމަށް ގެންގުޅުއްވާ ސިޔާސަތުގެ ދަށުން ކުރިއަށްދާ މި މަޝްރޫއުތަކުގެ ދަށުން ރ. އިންނަމާދޫގައި ގާއިމު ކުރާ ޓިވެޓް ސެންޓަރު ހާއްސަކުރެވިފައިވަނީ ރާއްޖޭގެ ސަގާފީ އަދި އިގްތިސާދީ ގޮތުން މުހިންމު ދާއިރާއެއް ކަމަށްވާ ބޯޓް-ބިލްޑިންގް ނުވަތަ ދޯނިފަހަރު ބަނުމުގެ ދާއިރާއިން މީހުން ތަމްރީނު ކުރުމަށެވެ. މަސައްކަތުގެ ދުވެލި އަވަސްކުރުމުގެ ގޮތުން މި އިމާރާތް ތައްޔާރުކުރާނީ ޕްރީ-ފެބް އުސޫލުންކަމަށާއި، މި އިންސްޓިޓިއުޓްގައި ކިޔަވައިދިނުމަށް ބޭނުންވާނެ އެންމެހާ ޒަމާނީ ވަސީލަތްތައް ގާއިމުކުރެވޭނެކަމަށް މިނިސްޓްރީ އޮފް ހަޔާ އެޑިޔުކޭޝަން އިން ބުނެފައިވެއެވެ. އެވެ. މި މަޝްރޫއުގެ މަސައްކަތް ކުރިއަށް ގެންދިއުމަށް ހަވާލު ކުރެވިފައިވަނީ ސެންޓްރަލް ލައިން ޕްރައިވެޓް ލިމިޓެޑާއެވެ.
ރ. ހުޅުދުއްފާރުގަ އަޅާ އެކަމަޑޭޝަން ފެސިލިޓީ އަކީ ދަރިވަރުންނަށް ބޭނުންވާ ބޯހިޔާވަހިކަން ފޯރުކޮށްދިނުމަށް ތަރައްގީކުރާ ތަނެކެވެ. މި ފެސިލިޓީގައި ތަފާތު މޮޑެލްތަކުގެ އެކަމަޑޭޝަން ހިމެނޭނެކަމަށް މިނިސްޓްރީ އޮފް ހަޔާ އެޑިޔުކޭޝަން އިން ބުނެފައިވެއެވެ. އެގޮތުން ދަރިވަރުންގެ އާއިލާތަކަށް އެކުގައި ތިބެވޭނެ ފަދަ 2 ކޮޓަރީގެ އަދި 3 ކޮޓަރީގެ އެޕާޓްމަންޓްތަކުގެ އިތުރުން، ވަކިން ދިރިއުޅެވޭނެ ސްޓޫޑިއޯ އެޕާޓްމަންޓްތައް ހުންނާނެކަމަށް ވެސް އެ މިނިސްޓްރީން ހާމަކޮށްފައިވެއެވެ. އަދި ކޮންމެ އެޕާޓްމަންޓެއްގައިވެސް ކެއްކުމާއި ލޯންޑްރީ ފަދަ އަސާސީ ހުރިހާ ހިދުމަތްތަކެއް ލިބެން ހުންނާނެ ކަަމަށް މިނިސްޓްރީން ބުނެފައިވެއެވެ. މި މަޝްރޫއުގެ މަސައްކަތް ކުރިއަށް ގެންދިއުމަށް ހަވާލު ކުރެވުނީ އެމް.ޓީ.ސީ.ސީ އާއެވެ.
މިނިސްޓްރީން ބުނީ މި ދެ ރަށުގައި ބިނާކުރެވޭ ވަސީލަތްތަކުގެ އިތުރުން ރ. އަލިފުއްޓާއި ދުވާފަރުގައި ކުރިއަށްދާ މަޝްރޫއުތަކާއެކު، ރ. އަތޮޅު ވެގެންދާނީ މަތީ ތައުލީމު ދިނުމުގައި ފާހަގަކޮށްލެވޭ އަތޮޅަކަށެވެ. މިއީ މި ސަރަޙައްދުގެ ޒުވާނުންގެ މުސްތަގުބަލަށްޓަކައި އެޅޭ ވަރުގަދަ ބިންގަލެކެވެ.
މިއަދުގެ ރަސްމިއްޔާތުގައި މިނިސްޓަރ ޑރ. އަލީ ހައިދަރު އަޙްމަދު ގެ ވާހަކަފުޅުގައި ވިދާޅުވީ، މި މަޝްރޫއުތަކުގެ މައިގަނޑު ބޭނުމަކީ ރަށުގައި ތިބެގެން ފެންވަރު ރަނގަޅު ތައުލީމު ހޯދުމުގެ ފުރުސަތު ރައްޔިތުންނާ ވީހާވެސް ގާތުން ފޯރުކޮށްދިނުން ކަމުގައެވެ. އަދި މި މަޝްރޫއުތަކުގެ ސަބަބުން މަސައްކަތްތެރިކަމުގެ ބާޒާރަށް ބޭނުންވާ ފަންނީ އަދި ހުނަރުވެރި ދިވެހި ޒުވާނުން އުފެއްދުމަށް ބޮޑު ބާރަކަށް ވެގެންދާނެ ކަމުގައެވެ. ސަރުކާރުގެ އަމާޒަކީ ދިވެހި ކޮންމެ ކުއްޖަކަށްވެސް، އެކުއްޖަކު ހުރި ރަށަކުން ނުވަތަ ކައިރި ރަށަކުން މަތީ ތައުލީމުގެ ފުރުސަތު ހޯދައިދިނުމެވެ. މިނިސްޓަރ ވަނީ މަސައްކަތް ހަވާލުކުރެވުނު ކޮންޓްރެކްޓަރުންނަށް، ވީ އެންމެ އަވަހަކަށް ޑިޒައިންގެ މަސައްކަތްތައް ނިންމައިދެއްވާ އަމަލީ މަސައްކަތް ފެށުމަށް އިލްތިމާސްކުރައްވާފައެވެ.
