މިއަދުގެ ޕްރެސް ބަދިގެ ސެގްމެންޓުގައި މި ގެނެސްދެނީ ގޭގައު އުޅޭ ތުއްތު ކުދިންނަށްވެސް ކަމުދާނެ ބާވަތެއް ކަމަށްވާ ސްޕައިސީ ޗިކަން ބަންސް ވިތް ޗީޒްއެވެ. މީގައި އެކުލެވޭ މަޑު ބަނަހާއި ޗިކަން ފިލިންގެ ސަބަބުން ރަހަ އިތުރުަށް ރަނގަޅުވެގެންދާއިރު މިއީ ތައްޔާރު ކޮށްލުމަށް ފަސޭހަވެސް ބާވަތެއް މެއެވެ.
މި ރަމަޟާން މަހު ގޭގެ ސުފުރާމަތި ފަޅު ފިލުވާލުމުގެ އިތުރުން ކުދިންގެ އިންޓަވަލްއަށް ގެންދަން ވެސް މި ރެސިޕީ ކަމުދާނެ ކަމަށް އުންމީދު ކުރަމެވެ.
ބޭނުންވާ ތަކެތި:
- ބަޓަރު (އަންސޯލްޓެޑް)
- އޮލިވް އޮއިލް
- ކަށިނެތް ކުކުޅު
- މަސްކެޔާން ޕައުޑާ
- އަސޭމިރުސް
- އޮނިއަން ޕައުޑާ
- ލޮނުމެދު ޕައުޑާ
- ޗިކަން ސީސަނިންގް
- ޕާސްލޭ
- ސްވީޓް ސޯޔާ ސޯސް
- ސޯޔާ ސޯސް
- ސާމްބަލް
- ހެވީ ކްރީމް
- ގާނާފައި ހުރި ޗީޒް
- ބަނަސް
ތައްޔާރު ކުރާނެ ގޮތް:
އެންމެ ފުރަތަމަ ބަނަސް ދެ ފަޅި ކުރުމަށްފަހު އެތެރޭގައި ހޮއި ހަދާލުމަށްފަހު އެއް ކައިރީގައި ބަހައްޓާލާށެވެ. އެއަށްފަހު ތަވަޔަކަށް ކުކުޅު މަސް، ކެޔާން ޕައުޑާ، އަސޭމިރުސް، ލޮނުމެދު ޕައުޑާ، އޮނިއަން ޕައުޑާ، ޗިކަން ސީސަނިންގް، ޕާސްލޭ، ސްވީޓް ސޯޔާ ސޯސް، ސާމްބަލް އެޅުމަށްފަހު ރޯ ފިލަންދެން ކައްކާލާނީއެވެ.
އަދި ކުކުޅު މަހުގެ ތެރެއަށް ސްވީޓް ސޯޔާ ސޯސް، ސޯޔާ ސޯސް އަދި ހެވީ ކްރީމް އެޅުމަށްފަހު އެއްކޮށްލާށެވެ. މިނެޓެއްހާއިރު ކައްކާލުމަށްފަހު މައްޗަށް ގާނާފައި ހުރި ޗީޒް ފަތުރާލުމަށްފަހު ކުރިން ތައްޔާރުކުރި ބަނަހުގެ ތެރެއަށް ކުކުޅު މަސް އެޅުމަށްފަހު ޓްރޭއެއްގައި އަތުރާލާށެވެ. އަދި އޭގެ މައްޗަަށް ގާނާފައި ހުރި ޗީޒް އަތުރާލުމަށްފަު ޗީޒްތައް މެލްޓް ވަންދެން އަވަނުގައި ފިހެލުމުން ސްޕައިސީ ޗިކަން ބަންސް ވިތް ޗީޒް ތައްޔާރުވީއެވެ.
