ދެކުނުގެ ހަތަރު އަތޮޅު ސީޕްލޭން ހިދުމަތުން ގުޅާލުމަކީ ތަރައްގީގެ އަސްލު އިހުސާސް ރައްޔިތުންނަށް އިހްސާސް ކުރެވޭނެ ބަދަލެއް ކަމަށް ހޯމްލޭންޑް މިނިސްޓަރު އަލީ އިހްސާން ވިދާޅުވެއްޖެއެވެ.
ދެކުނުގެ 4 އަތޮޅު މޯލްޑިވިއަންގެ ސީ ޕްލޭންގެ ހިދުމަތުން ގުޅުވާލުމަށް މިއަދު އައްޑޫ ސިޓީ، ގަން އިންޓަނޭޝަނަލް އެއާޕޯޓުގައި ބޭއްވި ރަސްމިއްޔާތުގައި ވާހަކަ ދައްކަވަމުން އިހުސާން ވިދާޅުވީ، ދެކުނު އަތޮޅުތައް ސީޕްލޭނުން ގުޅާލުމަކީ އުމްރާނީ ވަސީލަތްތަކަށް އަންނަ ބަދަލުތަކާއެކު އެތަންތަނުގެ އަސްލު މަންފާ ރައްޔިތުންނަށް ލިބޭނެ ގޮތަށް ވެރިއެއްގެ ތަސްވުރު ހަގީގަތަކަށް ހަދައި ރައްޔިތުންނަށް މަންފާ ހޯދައި ދިނުމަށް ކުރި މަސައްކަތެއް ކަމަށެވެ.
ރާއްޖޭގައި ސީޕްލޭން އަދި އެއާޕޯޓުގައި އެފަދަ ބޯޓުތައް އޮޕަރޭޓް ކުރެވޭ ގޮތް ހުންނަތާ އެތައް ޒަމާނެއް ވެފައިވިީ ނަމަވެސް މީގެ ކުރިން އެ ހިދުމަތް ދެކުނުގައި ފެށިފައިނުވާ ކަމަށް އިހުސާން ވިދާޅުވިއެވެ. އެގޮތުން މިއަދު އެ ހިދުމަތް ފެށުމަކީ ރައްޔިތުންނަށް އެ ހިދުމަތުގެ ސަބަބުން ދިރިއުޅުމަށް ފަސޭހަ ކަމެއް ގެނެސްދޭނެ ކަމެއްގެ ގޮތުގައި އަދުގެ ރައީސް ޑރ. މުހައްމަދު މުއިއްޒު އަށް އެނގިވަޑައިގެން އެކަން މިއަދު މި ވަނީ ހަގީގަތަކަށް ހައްދަވާ ދެއްވާފައި ކަމަށް އިހުސާން ވިދާޅުވިއެވެ.
އެގޮތުން ދެކުނުގެ ރައްޔިތުންނާ ރައީސް ބައްދަލު ކުރައްވައި އެ ރައްޔިތުންގެ އިހްސާސްތައް ދެނެގަނެ ރައީސް މުއިއްޒު ވަނީ ކުނފުނިތަކަށް އިރުޝާދު ދެއްވައި މި ހިދުމަތް ފައްޓަވާފައި ކަމަށް އިހުސާން ވިދާޅުވިއެވެ. މީގެ ސަބަބުން އެއް ރަށުން އަނެއް ރަށަށް ހިދުމަތްތައް ހޯދަން ދަތުރުކުރާ ރައްޔިތުންނަށް އެތައް ލުއިތަކެއް ލިބިގެން ދާނެ ކަމަށް އިހުސާން ވިދާޅުވިއެވެ.
ފަުރުވެރި ކަމަށް ބަލާއލި ކަމުގައި ވިޔަސް ދެކުނުގެ ހަތަރު އަތޮޅަށް ސީޕްލޭން ދަތުރުތައް ފެށީގެން ދިއުމަކީ އެ ސަރައްހައްދުގައި ފަތުރުވެރިކަން ވެސް ފުޅާ ވެގެން ދާނެ ކަމެއް ކަމަށް އިހުސާން ވިދާޅުވިއެވެ. އަދި މިހާރު ފަށާފައި ވަނީ ދެކުނުގެ ގުޅިފައިވާ ޓޫރިޒަމްގެ އިކޯ ސިސްޓަމެއް ކަމަށްވެސް އިހްސާން ވިދާޅުވިއެވެ.
މޯލްޑިވިއަންގެ ދެކުނުގެ ދަތުރުތަކާއި އަގުތައް:
- ގަން - ފުވައްމުލައް - 500 ރުފިޔާ
- ފުވައްމުލައް - ކޫއްޑޫ - 650 ރުފިޔާ
- ފުވައްމުލައް - ކާޑެއްދޫ - 650 ރުފިޔާ
- ގަން - ކާޑެއްދޫ - 900 ރުފިޔާ
- ގަން - ކޫއްޑޫ - 900 ރުފިޔާ
ރާއްޖޭގެ އެންމެ ދެކުނުން އައްޑޫ އަތޮޅާއި، ފުވައްމުލަކާއި، ގއ.އަތޮޅު އަދި ގދ. އަތޮޅަށް މޯލްޑިވިއަނުން މިވަނީ ވައިގެ މަގުން ދަތުރުތައް ފަށަން ތައްޔާރުވެފައެވެ. މޯލްޑިވިއަނުން މި ދަތުރުތައް ކުރަން ހަމަޖެހިފައި ވަނީ، 5 ސެކްޓާ ނުވަތަ ރޫޓަކަށް ބަހާލައިގެންނެވެ. އެއީ އައްޑޫ ގަމުން ހުވަދު އަތޮޅުގެ ކާޑެއްދޫ އަދި ކޫއްޑޫ އެއާޕޯޓުގެ އިތުރުން ފުވައްމުލަކަށް ދަތުރު ކުރާ ގޮތަށާއި ފުވައްމުލަކުން ކާޑެއްދޫ އަދި ކޫއްޑޫއަށް ދެވޭ ގޮތަށެވެ.
މި ދަތުރުތައް ކުރުމަށް ހަމަޖެހިފައިވަނީ، މޯލްޑިވިއަންގެ އެންމެ ކުދި ސީޕްލޭން ދަތުރުތަކުގައި ބޭނުންކުރާ ޓްވިން އޮޓާ މަރުކާގެ ބޯޓުތަކުގައެވެ. މިއީ، 15 މީހުންގެ ޖާގައިގެ ކުދި ބޯޓުތަކެކެވެ.
