ކ. ތިލަފުށި ސައިޓެއްގައި މަސައްކަތްކުރާ ބިދޭސީއަކު ނިޔާވެފައިވަނީ މިދިޔަ ހޯމަ ދުވަހު ކަމަށް ފުލުހުން ބުނެފިއެވެ.
ތިލަފުށި ސައިޓެއްގައި މަސައްކަތްކުރާ ބިދޭސީއަކު ގެއްލުނު ކަމަށް ފުލުހުންނަށް ރިޕޯޓުކޮށްފައި ވަނީ އިއްޔެއެވެ. ބަންގްލަދޭޝް ރައްޔިތެއް ކަމަށްވާ އަމީން މިއާ (24އ) ގެއްލިފައި ވަނީ މިދިޔަ ހޯމަ ދުވަހު ކަމަށާއި އޭނާ ހޯދަމުންދާ ކަމަށް އިއްޔެ ފުލުހުން ވަނީ މައުލޫމާތު ދީފައެވެ.
އޭނާ ހޯދަމުންދަނިކޮށް ނިޔާވެފައި އޮއްވާ ފެނިފައި ވަނީ ރޭގެ ވަގުތެއްގައެވެ. އަދި މީޑިއާތަކަށް މިއަދު ހިއްސާ ކުރި މެސެޖެއްގައި ފުލުހުން ބުނީ، މިހާތަނަށް ބެލި ބެލުމުން، އަމީން މިއާ ނިޔާވުމުގެ ހާދިސާ ހިނގާފައިވަނީ 2026 ޖެނުއަރީ 26 ވަނަ ދުވަހުކަން އެނގިފައިވާ ކަމަށެވެ. ނަމަވެސް އެކަމާ ގުޅޭ އިތުރު ތަފްސީލެއް އެ އިދާރާއިން ހިއްސާކޮށްފައި ނުވެއެވެ.
މި ނޫހަށް އެނގިފައިވާ ގޮތުގައި އޭނާ ފެނިފައި ވަނީ ތިލަފުށީގެ ކުނިތަކެއްގެ ތެރެއިންނެވެ. ނަމަވެސް ފުލުހުން އެކަން ކަށަވަރުކޮށްދީފައި ނުވެއެވެ. ފުލުހުން ވަނީ އިތުރު މައުލޫމާތު ލިބެމުންދާވަރަކަށް ހިއްސާ ކުރަމުން ދާނެ ކަމަށް ބުނެފައެވެ.
ދާދި ފަހުން ކ. ކާށިދޫގެ މުދާ އުފުލާ ބޯޓެއް އެ ރަށު ފަރަށް އަރައި، ބޯޓުން ދަތުރުކުރަމުން ދިޔަ ބިދޭސީއަކު ވެސް ގެއްލިގެން ހޯދަމުން ދަނިކޮށް މަރުވެފައި އޮއްވާ ފެނިފައި ވެއެވެ. މި ހާދިސާގައި މަރުވެފައި އޮއްވާ ފެނުނީ ބަންގްލަދޭޝަށް ނިސްބަތްވާ އެމްޑީ އަލަމްގީރް (30އ) އެވެ.
