މާލޭގެ މޭޔަރު ކަަމަށް ޕީއެންސީގެ ޓިކެޓްގައި ވާދަކުރައްވާ ކެންޑިޑޭޓް ރިޓަޔާޑް މުސާ އަލީ ޖަލީލު ހޮވަން ވީ ސަބަބަކީ އެ ބޭފުޅާއަކީ ގައުމަށް ގައްދާރު ވާނެ ބޭފުޅެއް ނޫން ކަމަށް ރައީސުލްޖުމްހޫރިއްޔާގެ އަނބިކަނބަލުން މެޑަމް ސާޖިދާ މުހައްމަދު ވިދާޅުވެއްޖިއެވެ.
މެޑަމް ސާޖިދާ މިހެން ވިދާޅުވީ، ޕީއެންސީގެ މާފަންނު ދެކުނު ދާއިރާގެ ކެމްޕެއިން ޖަގަހަ ހުޅުވުމަށް މިރޭ ބޭއްވި ރަސްމިއްޔާތުގައި ވާހަކަފުޅު ދައްކަވަމުންނެވެ.
ސާޖިދާ ވިދާޅުވީ، ނޮވެމްބަރު 10ގައި ރާއްޖެއަށް ކުރިމަތިވި ހާދިސާ ހިނގި އިރު އެކަމަނާގެ އުމުރުފުޅު އޭރު ވާނީ 10 އަހަރު ކަމަށެވެ. އެ ދުވަސްވަރު ވާހަކަތައް އެކަމަނާގެ މަންމާފުޅު ދައްކަވާ އިރު މޫސާ އަލީ ޖަލީލްގެ ވާހަކަތައް ދައްކަވަނީ ވަރަށް ފަހުރުވެރި ކަމާއެކުގައި ކަމަށް ސާޖިދާ ވިދާޅުވިއެވެ. އެފަދަ ނުރައްކާތެރިކަމެއް ރާއްޖެއަށް ކުރިމަތިވީ ދުވަހެއްގައި ހިދުމަތް ކުރެއްވި ބޭފުޅެއްގެ ގޮތުގައި ހުންނެވި މޫސާ އަލީ ޖަލީލުގެ ހިތުގައި މި ގައުމަށް އޮންނާނެ ލޯތްބާ މެދު އަދި މި ގައުމަށް ކަންކަން ކޮށްދެއްވާނެ ގޮތް އެއްވެސް މީހަކަށް އޮޅިގެން ނުވާނެ ކަމަށް ސާޖިދާ ވިދާޅުވިއެވެ.
އެފަދަ ބޭފުޅެއްގެ ހިތުގައި ގައުމައްޓަކައި އޮންނާނެ ލޯތްބާއި އެފަދަ ބޭފުޅަކު ގައުމައްޓަކައި ކޮށް ދެއްވާނެ މަސައްކަތާ މެދު ކޮންމެ މީހަކު ވެސް ވިސްނަން ޖެހޭނެ ކަމަށް ސާޖިދާ ވިދާޅުވިއެވެ. ހަމައެއާއެކު އެ ފަދަ ބޭފުޅަކު ގައުމަށް ގައްދާރު ނުވާނެ ކަން ކޮންމެ މީހަކަށް ވެސް އެނގެން ޖެހޭ ކަމަށް ވިދާޅުވިއެވެ.
މޭޔަރު ކަމަށާއި މާފަންނު ދެކުނު ދާއިރާއަށް ޕީއެންސީގެ ކެންޑިޑޭޓުން ހޮވަން ޖެހޭ ސަބަބު ހާމަކުރައްވަމުން ސާޖިދާ ވިދާޅުވީ، އެ ދާއިރާ ކުރިން އޮތް ގޮތް އެކަމަނާއަށް ވަރަށް ރަނގަަޅަށް އެނގިވަޑައިގަންނަވާ ކަމަށާއި އަދި އެ ދާއިރާގައި ދިރިއުޅޭ ރައްޔިތުންނަށް ވެސް އެކަން މާ ރަނގަޅަށް އެނގޭނެ ކަމަށެވެ. ރަސްފަންނު އޮތް ސަރަހައްދާއި މާލޭގެ ފުޑް ކޯޓް ސަރަހައްދު އޭރު އޮތް ހާލަތާއި މިހާރު އައިސްފައިވާ ބަދަލަށް ބަލާއިރު އެ ބަދަލު އައިސްފައިވަނީ އަދުގެ ރައީސުލްޖުމްހޫރިއްޔާ، ހައުސިން މިނިސްޓަރު ކަމުގައި ހުންނެވި ދުވަސްވަރުގައި އެ މަނިކުފާނު ކުރެއްވި މަސައްކަތުން ކަމަށް ސާޖިދާ ވިދާޅުވިއެވެ.
އެމަނިކުފާނުގެ މޭޔަރު ކަމުގެ ދުވަސްވަރު ވެސް މާލެއަށް ގިނަ މަސައްކަތްތަކެއް ކޮށްދެއްވާފައިވާ ކަން ފާހަގަކުރައްވަމުން ސާޖިދާ ވިދާޅުވީ، ރައްޔިތުންނަށް ހިދުމަތް ކުރެއްވުމަށް މިހާރު ވެސް ރެއާއި ދުވާލު އެމަނިކުފާނު މަސައްކަތް ކުރައްވާ ކަަމަށެވެ. އެހެންކަމުން އެ ވެރިޔާއާ އެކު މަސައްކަތް ކުރާނެ ކައުންސިލަރުންތަކެއް، އަންހެނުންގެ ތަރައްގީއަށް މަސައްކަތް ކުރާނެ މެންބަރުންނާއި މޭޔަރުންތަކެއް ހޮވުމަކީ މުހިއްމު ކަމެއްގެ ގޮތުގައި ސާޖިދާ ސިފަފުޅު ކުރެއްވިއެވެ.
ރައްޔިތުންނަށް ހިދުމަތް ކޮށްދޭން ބޭނުންވާ ސަރުކާރަކާ ދެކޮޅަށް މަސައްކަތް ކުރާނެ ބަޔަކު ހޮވައިފި ނަމަ އެކަމުން ދެރަ ނިކަމެތިކަން ލިބޭނީ ރައްޔިތުންނަށް ކަމަށް ވެސް ސާޖިދާ ވިދާޅުވިއެވެ. ސަރުކާރުން ނިންމާ ސިޔާސަތުތަކާ ދެކޮޅަށް ނިކުންނަ ކެންޑިޑޭޓުން ހޮވައިފި ނަމަ އޭގެ ގެއްލުން ހުރިހާ ރައްޔިތުންނަށް ލިބޭނެ ކަމަށް އެކަމަނާ ވިދާޅުވިއެވެ. އެހެންކަމުން ޕީއެންސީގެ ކެންޑިޑޭޓުން، ނުވަތަ ސަރުކާރަށް ތާއީދޫ ކުރާ ސަރުކާރާއެކު މަސައްކަތް ކުރާ ކެންޑިޑޭޓުން ހޮވުމަކީ ވަރަށް މުހިއްމު ކަމެއްގެ ގޮތުގައި އެކަމަނާ ފާހަގަކުރެއްވިއެވެ.
