ހުޅުމާލެ ގެސްޓްހައުސްއެއްގެ ތެރޭގައި މަރުވެފައި އޮތް މީހަކު ފެނިއްޖެއެވެ.
މަރުވެފައި އޮއްވާ ފެނިފައިވަނީ ފިރިހެނެއް ކަމަށް ފުލުހުން މައުލޫމާތުދެވެ.
ފުލުހުން ބުނީ ހުޅުމާލެ ފޭސް 1 ގެސްޓް ހައުސްއެއްގެ ރޫމެއްގެ ތެރޭގައި މަރުވެފައި އޮތް މީހަކު ފެނިގެން މިއަދު މެންދުރު 12:14 ހާއިރު ފުލުހުންނަށް ރިޕޯޓްކޮށްފައިވާ ކަމަށެވެ. އަދި މި ރިޕޯޓު ލިބުމާ ގުޅިގެން ފުލުހުން ސީންގައި ހަރަކާތްތެރިވަމުންދާ ކަމަށް ވެސް ފުލުހުން ވަނީ ބުނެފައެވެ.
މަރުވެފައި އޮއްވާ ފެނިފައިވަނީ ފިރިހެނެއް ކަމަށް ފުލުހުން ބުނެފައިވީނަމަވެސް އިތުރު ތަފްސީލު ފުލުހުން ދީފައެއް ނުވެއެވެ. އެހެންކަމުން އެއީ ދިވެއްސެއް ކަމެއް ނުވަތަ ބިދޭސީއެއް ކަމެއް މިހާތަނަށް ކަށަވަރުވެފައެއް ނުވެއެވެ.
ފުލުހުން ބުނީ މި މައްސަލައާ ގުޅިގެން ބަލަންޖެހޭ ކަންކަން ފުލުހުން ބަލަމުން ގެންދާ ކަމަށެވެ.
