އެސްޓީއޯގެ މަޝްހޫރު ބްރޭންޑެއް ކަމުގައިވާ ހިޓާޗީގެ ޕަރޓްނަރޝިޕަށް 25 އަހަރު ފުރުމުގެ މުނާސަބާ ކުލަގަދަ ގޮތެއްގައި ފާހަގަ ކޮށްފިއެވެ.
މި މުނާސަބާ ފާހަގަ ކުރުމަށްޓަކައި ރޭ ބާސެލޯ ނަސަންދުރަގައި ވަނީ ވަރަށް ހާއްސަ ހަފްލާއެއް ބާއްވާފައެވެ. އެސްޓީއޯ އާއި ހިޓާޗީ އާ ދެމެދު އުފެދިފައިވާ 25 އަހަރުވީ ގާތް ގުޅުމުގެ ރަމްޒުކޮށް ދިނުމަށް ރޭ ބޭއްވި ހަފްލާގެ ޝަރަފްވެރި މެހެމާނެއްގެ ގޮތުގައި ބައިވެރިވެ ވަޑައިގެންނެވީ ޖަޕާނުން ރާއްޖެއަށް ކަނޑައަޅުއްވާފައި ހުންނަވާ ސަފީރު އިޝިގާމީ ރުމިކޯއެވެ.
މި ހަފްލާގައި ހިޓާޗީ ކުންފުނީގެ މެނޭޖިންގް ޑިރެކްޓަ އަދި ކުންފުނީގެ އިތުރު ބޭފުޅުން ވަނީ މި ޖަލްސާގައި ބައިވެރިވެ ވަޑައިގެންފައެވެ. ހަމައެއާއެކު، އެސްޓީއޯގެ ޗެއާމަން އާމިރު މަންސޫރު، އެސްޓީއޯގެ ބޯޑު މެންބަރުން، އެސްޓީއޯގެ މެނޭޖިންގް ޑިރެކްޓަރު ޝިމާދު އިބްރާހިމް އަދި މީގެ އިތުރުން އެސްޓީއޯގެ ކުރީގެ ބައެއް އިސް ބޭފުޅުން ވެސް ވަނީ މި ހަފްލާގައި ބައިވެރިވެ ވަޑައިގެންފައެވެ.
މި ހަފްލާގައި ޖަޕާނުން ރާއްޖެއަށް ކަނޑައަޅުއްވާފައި ހުންނަވާ ސަފީރު އިޝިގާމީ ރުމިކޯ، ހިޓާޗީގެ މެނޭޖިންގް ޑިރެކްޓަރު ޔޮޝިޔޫކީ ބަންޑޯ، އެސްޓީއޯގެ މެނޭޖިންގް ޑިރެކްޓަރު އިބްރާހިމް ޝިމާދު އަދި އެސްޓީއޯ ޖެނެރަލް ޓްރޭޑިންގްގެ ޑިރެކްޓަރު އިބްރާހިމް މިރްޒާގް ވަނީ މި ހަފްލާގައި ވާހަކަ ދައްކަވާފައެވެ. ވާހަކަތަކައް އަލިއަޅުވާލާ އިރު ހިޓާޗީއާއި އެސްޓީއޯ އާ ދެމެދު އުފެދިފައިވާ ގާތް ގުޅުން ފާހަގަކޮށްފައި ވެއެވެ. އަދި މީގެ އިތުރުން ހިޓާޗީ ބްރޭންޑާއެކު، ރާއްޖޭގެ ބާޒާރަށް އައިސްފައިވާ ހެޔޮ ބަދަލުތަކާއި އާންމުންގެ ދިރިއުޅުމަށް އައިސްފައިވާ ލުއިފަސޭހަތައް އަދި ކުރިއަށް ރޭވިފައިވާ ކަންކަމަށް ވަނީ އަލިއަޅުވާލާފައެވެ.
މި ހަފްލާގައި ރާއްޖޭގައި ވިއްކާ ހިޓާޗީ ބްރޭންޑްގެ އުފެއްދުންތަކުގެ ތެރެއިން ހޮވާލެވިފައިވާ ޕްރޮޑަކްޓްތައް ވަނީ ޑިސްޕްލޭ ކޮށްފައެވެ. މީގެއިތުރުން، ހިޓާޗީ އާއި އެސްޓީއޯގެ މި 25 އަހަރުވީ ޕާޓްނަޝިޕްގައި އެންމެ ގިނައިން ހިޓާޗީ ޕްރޮޑަކްޓްތައް ބައްލަވައި ގެންނެވި 4 ކަސްޓަމަރެއް އަގުވަޒަން ކޮށް ވަނީ އެވޯޑް ދީފައެވެ. އަދި އެންމެ ހާއްސަ ކަމެއްގެ ގޮތުން، މި ހަފްލާގައި ހިޓާޗީއިން އަލަށް ތައާރަފް ކުރެވުނު 'ހިޓާޗީ ނިއު އެއާ' ރޭންޖްގެ ޕްރޮޑަކްޓްތައް ވަނީ ލޯންޗުކޮށްފައެވެ.
ގަރުނަކަށް ވުރެ ގިނަ ދުވަސްވީ ހިޓާޗީ ކުންފުންޔަކީ ފެށުނީއްސުރެ ދުނިޔޭގެ ބާޒަރުގައި ނަން ވިދަމުން އަންނަ އިތުބާރު ހިފޭ ކުންފުންޔެކެވެ. މި ކުންފުނީގެ އުފެއްދުންތައް ރާއްޖެއަށް ތައާރަފް ކުރެވުމާއެކު، ދިވެހީންގެ މެދުގައި ވެސް މި ބްރޭންޑުގެ އުފެއްދުންތައް ވަނީ ބޮޑު މަގުބޫލުކަމާއި އިތުބާރެއް ހޯދާ، އަދި މިއަދާއި ހަމައަށް ވެސް އެ އިތުބާރު ދަމަހައްޓާފައެވެ. އެގޮތުން ހިޓާޗީ އޭސީތަކާއި އައިސް އަލަމާރިތައް ފަދަ ޕްރޮޑަކްޓްތަކަކީ ގިނަ ބަޔެއްގެ ގެތަކުން މިހާރު ވެސް ޖާގަ ހޯދަމުން އަންނަ އުފެއްދުންތަކެކެވެ.
