އއ. ހިމަންދޫގެ ފަޅު ތެރޭގައި އޮތް ލޯންޗެއްގައި ރޯވެ، އަނދާ ހުލިވެއްޖެއެވެ.
'ކައެލް ވިންގް' ނަމަކަށް ކިޔާ އެ ލޯންޗުގައި ރޯވެފައި ވަނީ މިއަދު ފަތިހުއެވެ. އެ ރަށުން ވާހަކަ ދެއްކި މީހަކު ބުނީ އެއީ އެ އަތޮޅު ފެރިދޫ، މާޅޮސް އަދި ހިމަންދޫ އާއި މާލެ އާ ދެމެދު ދަތުރުކުރާ ފެރީ ލޯންޗެއް ކަމަށެވެ.
ގާތް ގަނޑަކަށް 50 ހަކަށް މީހުންގެ ޖާގައިގެ މި ލޯންޗުގައި ރޯވީ މިއަދު ހެނދުނު ފުރަން ތައްޔާރުވެފައި ވަނިކޮށް ކަމަށް އެ ރަށުން ވާހަކަ ދެއްކި މީހާ ބުންޏެވެ.
އެ ލޯންޗު އެކީގައި ރޯވެ، އަނދަމުންދާ މަންޒަރު ފެންނަ ވީޑިއޯތަކެއް ސޯޝަލް މީޑިޔާގައި ދައުރުވަމުންދާއިރު އެ ވީޑިއޯ އިން ފެންނަ ގޮތުގައި ލޯންޗު އަނދާ އަޅިއަށްވީ މަދު ވަގުތު ކޮޅެއްގެ ތެރޭގައެވެ. އަދި އެވަގުތު ވަރަށް ބާރަށް އެއްޗިސްތަކެއް ގޮވާ އަޑުވެސް އިވެމުން ދިޔައެވެ.
މި ނޫހަށް މައުލޫމާތު ދިން މީހާ ބުނި ގޮތުގައި ލޯންޗުގައި ރޯވި ވަގުތު އެ ލޯންޗުގައި ކްރޫއިން ހަރަކާތްތެރިވިއެވެ. ނަމަވެސް އެއީ ކިހާ އަދަދެއްގެ މީހުންނެއް އަދި އެ މީހުންނަށް އަނިޔާވި ކަމެއް ނުވަތަ ނުވާ ކަމެއް ސާފެއް ނުވެއެވެ. މިކަމާ ގުޅޭ ގޮތުން މިހާތަނަށް އެއްވެސް އިދާރާއަކުން އެއްޗެއް ބުނެފައި ނުވެއެވެ.
މިދިޔަ ބުދަ ދުވަހުގެ ރޭ ވެސް ވަނީ ދަތުރު ކުރަމުންދިޔަ މުދާ އުފުލާ ބޯޓެއްގައި ރޯވެ އަނދާ އަޅިއަށްވެފައެވެެ. 'ހޮޅުދޫ ބޯޓު' ނަމަކަށް ކިޔާ އެ ބޯޓުން ދަތުރު ކުރި 18 މީހުންގެ ތެރެއިން 17 މީހުން ސަލާމަތް ކުރެވުނު ނަމަވެސް އެކަކު ވަނީ ގެއްލިފައެވެ. އޭނާ ހޯދުމުގެ މަސައްކަތް ކަމާ ބެހޭ އިދާރާތައް ގުޅިގެން ދަނީ ކުރަމުންނެވެ. އެ ހާދިސާގައި ގެއްލުނީ ލ. މާވަށަށް ނިސްބަތްވާ އަލީ މުޝްފިގް މުހައްމަދު ޝަރީފް، 25، އެވެ.
އެ ބޯޯޓުގައި އަލިފާން ރޯވީ ކަނޑޫދުއަށް ވަދެ މުދާ އަރުވައިގެން ހިރިލަންދުއަށް ގޮސް، އެ ރަށުން ފުރި ފަހުންނެވެ. ނަމަވެސް ބޯޓުގައި ރޯވާން ދިމާވި ސަބަބެއް މިހާތަނަށް އެއްވެސް އިދާރާއަކުން ހާމަކޮށްފައި ނުވާއިރު ބޯޓުގައި ހުރި މުދަލާ ގުޅޭ ތަފްސީލެއް ވެސް ލިބިފައި ނުވެއެވެ.
