ނ. މަނަދޫގެ ނަރުދަމާ ނިޒާމުގެ މައްސަލަތައް ހައްލުކުރުމުގެ މަސައްކަތް ފަށާފައިވާކަމަށް ފެނަކަ ކޯޕަރޭޝަނުން ބުނެފިއެވެ.
ފެނަކައިން ބުނީ ނ.މަނަދޫ ނަރުދަމާ ނިޒާމަށް ދިމާވެފައިވާ މައްސަލައަށް ދާއިމީ ހައްލެއް ގެނައުމަށް ކުރަންޖެހޭ މަސައްކަތްތަކާ ގުޅޭ ސާވޭއެއް ކުރެވިފައިވާކަމަށެވެ. އަދި ޑިޒައިން ތައްޔާރުކޮށް، ކަމާބެހޭ އިދާރާތަކުން ނަގަންޖެހޭ ހުއްދަތައް ނެގުމުގެ މަސައްކަތް ކުރިޔަށް އޮތް ހަފުތާގެ ތެރޭގައި ކުރެވޭނެކަމަށް ފެނަކައިން ވަނީ ބުނެފައެވެ.
އިތުރަށް ފެނަކައިން ބުނީ ކުރިޔަށް އޮތް 4 މަސްދުވަހުގެ ތެރޭގައި މި މައްސަލަ އެއްކޮށް ހައްލުކުރެވިގެން ދާނެކަމަށެވެ. މަނަދޫ ނަރުދަމާގެ ނިޒާމަށް ދިމާވެފައިވާ މައްސަލަތަކަށް ހައްލެއް ނުލިބި މަގުމައްޗަށް ނަޖިސް ބޭރުވަމުންދާ މައްސަލަ މީގެ ކުރިންވެސް ވަނީ ފެންމަތިވެފައެވެ.
މަނަދޫގެ ނަރުދަމާ ނިޒާމަށް އެކި މައްސަލަތައް ދިމާވަމުން އަންނައިރު އެ ރަށުން ވާހަކަދެއްކި މީހަކު ބުނީ ނަރުދަމާގެ މައްސަލަ ދިމާވާތާ ގިނަ އަހަރުތަކެއް ދިމާވެފައިވާކަމަށެވެ. އަދި ނަރުދަމާ ނިޒާމަށް ބޭނުންވާ ސްޕެއާ ނުލިބި، އަޕްގްރޭޑިންގެ މަސައްކަތެއް އެކަށީގެންވާ ގޮތެއްގައި ކޮށްފައިނުވާކަމަށް މަނަދޫ ކައުންސިލުން ވެސް ވަނީ ފާހަގަކޮށްފައެވެ.
