އަދުގެ ބަވަނަވެފައިވާ ދުނިޔޭގައި، ގިނަ މީހުން ދަނީ އެމީހުންގެ ދުވަހުގެ ޝެޑިއުލްގައި ވަރަށް ބިޒީކޮށެވެ. މަސައްކަތާއި، އާއިލީ ޒިންމާތަކާއި އަދި އެހެނިހެން އިޖްތިމާއީ ހަރަކާތްތަކުގެ ތެރޭގައި އަމިއްލަ ސިއްހަތަށް އަޅާލުމަށް ވަގުތު ހޯދުމަކީ ގޮންޖެހުމަކަށް ވަނީ ވެފައެވެ. ނަމަވެސް ސިއްހަތު ރަނގަޅު ހަށިގަނޑެއް ދެމެހެއްޓުމަކީ ޖިސްމާނީ އަދި ނަފްސާނީ ދުޅަހެޔޮކަމަށްވެސް ވަރަށް މުހިންމު ކަމެކެވެ. އެހެންކަމުން ދުވަހުގެ ބިޒީ ތާވަލާއެކުވެސް ދުޅަހެޔޮ ސިއްހަތެއްގައި ހުރުމަށް ކުރެވިދާނެ ކަންކަން ދެނެގަނެ އެފަދަ ކަންކަން ކުރުމަކީ މުހިންމު ކަމެކެވެ.
އެގޮތުން ދުވަހުގެ ތެރޭގައި ކުދިކުދި ވޯކްއައުޓްތައް ހިމެނުމަކީ ވެސް ކުރެވިދާނެ ކަމެކެވެ. މިސާލަކަށް ހެނދުނު އޮފީހަށް ދާއިރު 10 މިނެޓް އަވަސްކޮށް ހިނގުމާއި، މެންދުރު ކެއުމުގެ ހުސްވަގުތުގައި 5 މިނެޓެއް ހާއިރު ސްޓްރެޗިން ކޮށްލުމާއި، އަދި ހަވީރު ގޭގައި 15 މިނެޓް ބޮޑީވެއިޓް ކަސްރަތުތައް ކުރުންފަދަ ކަންކަން ހިމެނިދާނެއެވެ. މިގޮތަށް ކުދިކުދި ވޯކްއައުޓްތައް ކުރުމުން ދުވަހުގެ ތެރޭގައި ޖުމްލަ 30 މިނެޓް ނުވަތަ އެއަށްވުރެ ގިނަ ވަގުތު ކަސްރަތު ކުރުމުގެ ތެރޭގައި ހޭދަވެގެން ދާނެއެވެ. ދުވަހުގެ ތާވަލުގައި ވަކި ވަގުތެއް ކަނޑައަޅައި، އެ ވަގުތު އެހެން ކަންކަމަށް ނުދީ ކަސްރަތު ކުރުމަށް ހުސްކުރުމަކީވެސް ކުރެވޭނެ މުހިންމު ކަމެކެވެ.
މިހާރަކަށްއައިސް ކުރިމަތީ ޖެހިފަ ހުންނަ ގެއަކަށްވެސް ސައިކަލެއްގައި ނޫނީ ނުއެއް ދެވެއެވެ. ފަސޭހަ ކުރުމުގެ ގޮތުން ނުވަތަ އަވަސް ކުރުމުގެ ގޮތުން ވިއަސް ކުރެވޭ މިފަދަ ކަންކަމުން ދުރުވާން އެބަ ޖެހެއެވެ. އޭގެ ބަދަލުގައި ދާން ބޭނުންވާ މަންޒިލަކަށް ހިނގާފައި ދިއުމަކީވެސް ހަށިގަނޑަށް ކަސްރަތު ލިބިގެންދާނެ ކަމެކެވެ. މިފަދަ ކަންކަމުގެ އިތުރުން ގޭތެރޭގައި އަބަދު ޓީވީ ބަލަން އޮތުމުގެ ބަދަލުގައިވެސް ޖިސްމާނީ ދުޅަހެޔޮކަން އިތުރުވާފަދަ މަސައްކަތްތަކެއް ކުރެވިދާނެއެވެ. އޭގެތެރޭގައި ގޯތިތެރެ ސާފްކުރުމާއި، ގަސް އިންދުން ފަދަ ކަންކަމަކީ ވެސް ރަނގަޅު ޖިސްމާނީ ހަރަކާތްތަކެކެވެ. މިފަދަ މަސައްކަތްތައް ކުރާއިރު އިތުރަށް ހަށިގަނޑު ހަރަކާތްކުރުވުމަށް ބާރަށް ހިނގުން ފަދަ ކަންކަން ކުރެވިދާނެއެވެ.
މީގެއިތުރުން ޓެކްނޮލޮޖީގެ ބޭނުންވެސް މިކަމުގައި ހެޔޮ ގޮތުގައި ހިފިދާނެއެވެ. އެގޮތުން ފިޓްނެސް އެޕްތަކާއި ސްމާޓް ވޮޗްތަކުން ކުރު މުއްދަތުގެ ވޯކްއައުޓްތަކާއި، ހަރަކާތްތައް ޓްރެކްކުރުމާއި އަދި މޮޓިވޭޝަން ދިނުމަށް އެހީތެރިވެދެއެވެ. އަދި އޮންލައިން ފިޓްނެސް ކްލާސްތަކުގައި ބައިވެރިވުމަކީ ވެސް ގޭގައި ތިބެގެން ކުރު މުއްދަތެއްގެ ތެރޭގައި އެކަށީގެންވާ ވޯކްއައުޓެއް ކުރެވިދާނެ ގޮތެކެވެ.
ހަމައެއާއެކު ދަރިންނާއި އާއިލާއާއެކުވެސް ވަގުތު ހޭދަކުރާއިރު ކަސްރަތު ކުރުމަށް ނުވަތަ ވޯކްއައުޓެއް ކޮށްލެވިދާނެއެވެ. މިގޮތުން ޕާކަށް ގޮސް ކުޅުމާއި، ރައްޓެހިންނާއެކު ބީޗް ވޮލީ ކުޅުމާއި، އަދި އާއިލާއާއެކު ދަތުރުތަކަށް ދިއުމަކީ ވެސް ޖިސްމާނީ ހަރަކާތްތަކެކެވެ. މިފަދަ ހަރަކާތްތަކުން އިޖްތިމާއީ ގުޅުންތައް ބަދަހިވުމުގެ އިތުރުން ހަށިގަނޑަށް ވެސް ފައިދާ ކުރާނެއެވެ.
ގިނަ ބަޔަަކަށް ބިޒީ ޝެޑިއުލްއަކަށް ފިޓްނެސް ރޫޓީނެއް ވެއްދުމަކީ ގޮންޖެހުމެކެވެ. ގަވާއިދުން ކަސްރަތުކޮށް ހަރަކާތްތެރިވެ އުޅުމުގެ ނިޔަތުގައި އެ މަސައްކަތް ފެށި ނަމަވެސް ކޮންމެވެސް ސަބަބަކާ ހެދި އެކަމަށް ފަރުވާކުޑަ ކުރެވޭ ގޮތް މެދުވެރިވެއެވެ. ނަމަވެސް މިފަދަ ދަނޑިވަޅުތަކުގައި ކަސްރަތުގެ ސަބަބުން ލިބޭ ފައިދާތައް ވިސްނާލުން މުހިންމެވެ. ހާއްސަކޮށް ޑިޕްރެސް ވުމާއި ކަންކަމާއި ހާސްވެ ނުތަނަވަސްވާނަމަ ކަސްރަތު ކުރުމަކީ މީހާގެ ސިކުނޑި ތާޒާވެގެން ދާ ކަމެއްކަމަށް ސައިންޓިފިކް ގޮތުން ވަނީ ސާބިތުވެސް ކުރެވިފައެވެ.
