ކުށުގެ މާހައުލަށް ހުށައެޅޭ ކުދިން ރީހެބިލިޓޭޓްކުރުމަށް ހަދާ "ހޯޕް އައިލެންޑް" ގިރާވަރު ފަޅަށް ބަދަލުކުރުމަށް ނިންމާފައިވާކަމަށް ހޯމް މިނިސްޓަރީގެ ސްޓޭޓް މިނިސްޓަރު އަހްމަދު ސިއްދީގު ވިދާޅުވެއްޖެއެވެ.
'ޕީއެސްއެމް' އަށް މައުލޫމާތު ދެއްވަމުން ސިއްދީގު ވިދާޅުވީ ހޯޕް އައިލެންޑް ދ. ވާނީގައި ތަރައްގީކުރުމަށް، ކުރެހުންތަކާ ކޮންސެޕްޓްތައްވެސް ތައްޔާރުކޮށް ނިންމާފައިވާކަމަށެވެ. އެހެންނަމަވެސް އެ ރަށުގައި އެތަން ތަރައްގީކޮށްފިނަމަ ހަރަދުގެ ގޮތުންވެސް ބޮޑެތި ގޮންޖެހުންތަކެއް ކުރިމަތިވާނެތީ މާލެ ކައިރި ތަނަކަށް ހޯޕް އައިލެންޑް ބަދަލުކުރަން ނިންމާފައިވާކަމަށެވެ. އެގޮތުން މާލެ ކައިރި ގިރާވަރު ފަޅު ހިއްކައިގެން "ހޯޕް އައިލެންޑް" އެތަނަށް ބަދަލުކުރުމަށް ސަރުކާރުން މިހާރު ނިންމާފައިވާކަމަށް އޭނާ ވިދާޅުވިއެވެ.
ހޯޕް އައިލެންޑް ހެދުމާއެކު ކުށަށް އަރައިގަތުމުގެ ނުރައްކަލުގައިވާ ކުދިންނަށް ބޭނުންވާ ފަރުވާ ފޯރުކޮށްދެވޭނެކަން ފާހަގަކޮށް ސިއްދީގު ވިދާޅުވީ އެތަނުގައި މުދައްރިސުންނާއި ފުލުހުންގެ އިތުރަށް ކުޅިވަރުތައް ކުޅޭއިރު ބޭނުންވާ އިންސްޓްރަކްޓަރުންނަށް ބޭނުންވާނެ ވަސީލަތްތައް ގާއިމުކުރެވިގެންދާނެކަމަށެވެ. 700 އެއްހާ މީހުންގެ ޖާގައިގެ އެތަން ތަރައްގީކުރުމަށް ނިންމާފައިވަނީ ކުދިންނަށް ކިޔަވައިދޭނެ ސްކޫލާއި ސިއްހީ ހިދުމަތް ދޭނެ ތަންތަނާއެކުގައި ކަމަށް ސިއްދީގު ވިދާޅުވިއެވެ.
ހޯޕް އައިލެންޑްގައި ތިބޭ ކުދިންގެ ގާތަށް ބެލެނިވެރިންނަށްވެސް ޒިޔާރަތް ކުރެވޭނެގޮތަށް ތަރައްގީކުރުމަށް ނިންމާފައިވާ މިތަނުގެ މަޝްރޫއަށް ބޭނުންވާ 15 ހެކްޓަރުގެ ބިން، ކ. ގިރާވަރު އުތުރުފަޅުން ހިއްކުމަށް ވަނީ ނިންމާފައެވެ. މީގެ ކުރިން ސަރުކާރުން ވަނީ މި ތަނުގައި 18 އަހަރު ވަންދެން ކުދިންނަށް އުޅެވޭނެކަމަށް ބުނެފައެވެ. އަދި އެއަށްފަހު ދިވެހި ފުލުހުން ނުވަތަ ދިވެހި ސަފައިންގެ ހިދުމަތުންކުރެ ތަނެއްގައި ވަކި މުއްދަތެއް ވަންދެން އެކުދިން ހިދުމަތްކުރަންޖެހެއެވެ.
