ކޮންމެހެން ހެލްމެޓު އަޅައިގެން އުޅެން ނުޖެހޭ ސަރަހައްދުތަކުގައި ހެލްމެޓު އަޅައިގެން އުޅޭ މީހުން ހުއްޓުވައި ފާސްކުރަން ފަށާފައިވާ ކަމަށް ފުލުހުން ބުނެފިއެވެ.
ރޭ ނެރުނު ބަޔާނެއްގައި ފުލުހުން ބުނީ، ހެލްމެޓު އެޅުން ލާޒިމް ނޫން ސަރަހައްދުތަކުގައި ކާކުކަން ނޭނގޭ ގޮތަށް ކުށްކުށަށް އަރައިގަތުމުގެ ނިޔަތުގައި ބައެއް މީހުން އުޅޭ ކަމަށާއި، އެފަދަ ބައެއް މީހުން ވިޔަފާރިކުރާ ތަންތަނަށާއި ހިދުމަތް ދޭ ތަންތަނަށް ވަންނަކަން ފާހަގަކުރެވިފައިވާ ކަމަށެވެ.
ފުލުހުން ބުނީ، ސައިކަލު ދުއްވަން އިންނަ މީހާ އާއި އޭނާގެ ފަހަތުގައި އިންނަ މީހާ ހެލްމެޓު އެޅުމަށް ލާޒިމްކުރަނީ 30 ކިލޯމީޓަރަށް ވުރެ ބާރަށް އެއްގަމު އުޅަނދުފަހަރު ދުއްވަން ހުއްދަކޮށްފައިވާ ސަރަހައްދުތަކުގައި ކަމަށާއި، އެ ސަރަހައްދުތަކުގައި އެކަން އަންގައިދޭ ބޯޑެއް ހަރުކޮށްފައި ހުންނާނެ ކަމަށެވެ.
އެހެންކަމުން އެ ސަރަހައްދުތައް ފިޔަވައި އެހެން ސަރަހައްދުތަކުގައި ހެލްމެޓު އަޅައިގެން ސައިކަލު ދުއްވާ މީހުންނަށް ފާރަވެރިވެ، ކުށްކުރަން އުޅޭ ކަމަށް ތުހުމަތުކުރެވޭ މީހުން ބަލައި ފާސްކުރާނެ ކަމަށް ފުލުހުން ބުންޏެވެ.
