އެކި ކަހަލަ މަސައްކަތްތައް ކުރުމަށް ބޭނުންކުރާ 'މަކިޓާ' ބްރޭންޑުގެ ފޭކު އުފެއްދުންތައް ރާއްޖޭގެ ބާޒާރުގައި ދައުރުވަމުންދާ ކަމަށާއި އެ ކަމަށް ސަމާލުވުމަށް 'މަކިޓާ'ގެ އުފެއްދުންތައް އެތެރެކުރާ އެސްޓީއޯއިން އިލްތިމާސްކޮށްފިއެވެ.
މިއަދު ނެރުނު ބަޔާނެއްގައި އެސްޓީއޯއިން ބުނީ، މަކިޓާގެ ބާވަތްތައް އެކި ގޮތްގޮތަށް ރާއްޖެ އެތެރެކުރާ މިންވަރު އިތުރުވެފައިވާ ކަމަށާއި، ރާއްޖޭގެ ބާޒާރުގައި މަކިޓާގެ ފޭކު އުފެއްދުންތައް ދައުރުވަމުންދާކަން ފާހަގަކުރެވިފައިވާ ކަމަށެވެ.
މިފަދަ އުފެއްދުންތަކަކީ ކަސްޓަމަރުންނަށް އޭގެ ބޭނުން އެދެވޭ ގޮތެއްގައި ހިފޭނެ ކަމާއި ރައްކާތެރިކަމުގެ ޔަގީންކަން ނެތް އުފެއްދުންތަކެއް ކަމަށްވާތީ ދިމާވެދާނެ ނުރައްކާތެރި ހާލަތަކުން ރައްކާތެރިވުމަށް ޓަކައި އެ ގަންނަ އުފެއްދުން ގަތުމުގެ ކުރިން އެއީ އަސްލު އުފެއްދުމެއްތޯ ކަށަވަރުކުރުމަށް އެސްޓީއޯއިން އިލްތިމާސްކުރެއެވެ.
އެސްޓީއޯއިން ބުނީ އެ ކުންފުނީގެ ފިހާރަތަކާއި އެ ކުންފުނީގެ ހުއްދަ ލިބިފައިވާ ވިޔަފާރިތައް މެދުވެރިކޮށް ކަސްޓަމަރުންނަށް މަކިޓާގެ އަސްލު ބާވަތްތައް ފޯރުކޮށްދެމުންދާ ކަމަށާއި، އެ އުފެއްދުންތަކުގެ ފެންވަރު ހިފެހެއްޓުމަށްޓަކައި އެސްޓީއޯގެ ސާވިސް ސެންޓަރުން ހިދުމަތް ފޯރުކޮށްދެމުން ދާނީ އެ އުފެއްދުންތަކަށް އެކަނި ކަމުގައި ކަމަށެވެ.
އެހެންކަމުން މަކިޓާގެ ފޭކް އުފެއްދުންތަކާ މެދު ސަމާލުވުމަށް އިލްތިމާސްކޮށް އެ އުފެއްދުންތަކުގެ އަސްލު ކަށަވަރުކުރުމަށްޓަކައި އެއްވެސް އެހީތެރިކަމެއް ބޭނުންވާ ނަމަ އެސްޓީއޯގެ މަކިޓާ ޝޯރުމަށް އައުމަށް ކަސްޓަމަރުންގެ ގާތު އެސްޓީއޯއިން އެދެއެވެ.
