ހއ. ހޯރަފުށީ އެއާޕޯޓް، އިންޓަނޭޝަނަލް އެއާޕޯޓަކަށް ބަދަލުކޮށް ދިނުމަށް އެ ރަށު ކައުންސިލުން ރައީސް ޑރ.މުހައްމަދު މުއިއްޒު އަރިހުގައި އެދިވަޑައިގެންފިއެވެ.
ހޯރަފުށީ ކައުންސިލާއި، އަންހެނުންގެ ތަރައްގީއަށް މަސައްކަތްކުރާ (އތމ) ކޮމިޓީއާއި މުއައްސަސާތަކުގެ އިސްވެރިންނާއި ބައްދަލުކުރައްވައި ހޯރަފުށީގެ ތަރައްގީއަށް އެންމެ ބޭނުންވާ ކަންކަމާ ގުޅޭގޮތުން ބޭއްވި މަޝްވަރާ ބައްދަލުވުމުގައި ކައުންސިލުން ވަނީ ހޯރަފުށީ އެއާޕޯޓު އިންޓަނޭޝަނަލް ކުރުމާއި ގުޅޭ ގޮތުން މަޝްވަރާ ކުރައްވާފައެވެ.
މީގެ އިތުރުން ހޯރަފުށި ކައުންސިލުން ވަނީ، ހޮސްޕިޓަލްގެ މަސައްކަތް އަވަސްކޮށްދެއްވުމަށާއި ރަށުގެ ކުނީގެ މައްސަލައަށް ހައްލެއް ހޯދައިދިނުމަށް އެދިފައެވެ. އަދި ބޯހިޔާވަހިކަމުގެ މައްސަލައަށް ހައްލެއް ހޯދުމަށް ޓަކައި އެ ރަށުގެ ބިން ހިއްކުމާއި ގުޅޭ ގޮތުންވެސް ވަނީ މަޝްވަރާތައް ކުރިއަށް ގެންގޮސްފައެވެ.
މީގެ އިތުރުން ހޯރަފުށީ ރައްޔިތުންނާއި ބައްދަލުކޮށް ދެއްކެވި ވާހަކަފުޅުގައި ރައީސް ވަނީ ހޯރަފުށީގެ ރައްޔިތުންނަށް ފެނިގެންދާނީ، ފުރިހަމަކަމާއެކު ހަލުވި ދުވެލީގައި ތަރައްގީގެ ކަންކަން ހާސިލުވެގެންދާ މަންޒަރު ކަމުގައެވެ.
ހޯރަފުށީ އެއާޕޯޓު ރަސްމީކޮށް ހުޅުވާފައިވަނީ 2019 ވަނަ އަހަރު ނޮވެމްބަރު މަހުގެ 19 ވަނަ ދުވަހުއެވެ.
