ގާނޫނުގައި ބުނާ އަދަދަށް މެންބަރުން ހަމަނުވާތީ ސިޔާސީ ޕާޓީތަކުގެ ދަފްތަރުން މޯލްޑިވްސް ރިފޯމް މޫވްމަންޓް (އެމްއާރްއެމް) އުނިކުރަން ނިންމާފައިވާ ކަމަށް އިލެކްޝަންސް ކޮމިޝަން (އީސީ) އިން ބުނެފިއެވެ.
އީސީ އިން ބުނީ، ސިޔާސީ ޕާޓީގެ ގާނޫނުގެ 30 ވަނަ މާއްދާގެ (ހ)ގެ 1 ވަނަ ނަންބަރުގައި ވާ ގޮތުގެ މަތިން ސިޔާސީ ޕާޓީއެއް ދެމިއޮތުމަށް ގާނޫނު ލާޒިމުކުރާ 3000 މެންބަރުން ހަމަކުރުމަށް އެމްއާރްއެމްއަށް ދިން މުއްދަތުގައި 3000 މެންބަރުން ހަމަވެފައިނުވާ ކަމަށެވެ. އެހެންކަމުން މިއަދުން ފެށިގެން އެ ޕާޓީ އުވާލައި ސިޔާސީ ޕާޓީގެ ދަފްތަރުން އުނިކުރަން ނިންމާފައިވާ ކަމަށެވެ.
މީގެ ކުރިން ވެސް 3000 މެންބަރުން ހަމަ ނުވުމާ ގުޅިގެން އީސީއިން އެ ޕާޓީ އުވާލަން ދެ ފަހަރެއްގެ މަތިން ނިންމިއެވެ. ނަމަވެސް އެމްއާރްއެމްގައި 3000 މެންބަރުން ހަމަވާނެ ކަމަށް އެ ޕާޓީއިން އޭރު ވަނީ ބުނެފައެވެ.
އެގޮތުން ފެބްރުއަރީ 22، 2023 ގައި ތިން މަހުގެ ނޯޓިސްއެއް އީސީން ދީފައި ވާ އިރު. އެ ނިންމުމަކީ ގަވާއިދާ ހިލާފަށް ނިންމި ނިންމުމެއް ކަމަށް މިދިޔަ އަހަރުގެ ފެބްރުއަރީ 12 ގައި ސިވިލް ކޯޓުން ވަނީ ހުކުމް ކޮށްފައެވެ. އެހެން ނަމަވެސް އީސީން ވަނީ އެ މައްސަލަ ހައިކޯޓުގައި އިސްތިއުނާފު ކޮށްފައެވެ.
މިދިޔަ އަހަރުގެ އޮގަސްޓުމަހުގެ 25ގައި ވެސް އީސީން ވަނީ އެމްއާރުއެމް އުވާލުމަށް ނިންމާފައިވާކަން ހާމަކޮށްފައި ވާ އިރު، އޭގެ ފަހުން އޮކްޓޯބަރުގައި ވެސް އެމްއާރުއެމް އުވާލުމުގެ މަސައްކަތް ފަށާފައިވާ ކަން، އީސީން ވަނީ އިއުލާންކޮށްފައެވެ.
ގާނޫނު ބުނާ ގޮތުން، ސިޔާސީ ޕާޓީއެއް ރަޖިސްޓާ ކުރުމަށްޓަކައި 3،000 މެންބަރުން ހަމަވާން ޖެހޭނެއެވެ. އަދި ދައުލަތުން ޕާޓީތަކަށް ފައިސާ ދޭނީ 10،000 މެންބަރުން ހަމަވެއްޖެ ނަމައެވެ. 3000 މެންބަރުން ހަމަކޮށް ރަޖިސްޓްރީކޮށްފައި ވީނަމަވެސް އެކި ސަބަބުތަކާ ގުޅިގެން މެންބަރުންގެ އަދަދު 3000 އަށް ވުރެ މަދުވެއްޖެނަމަ ޖެހޭނީ އެ ޕާޓީއެއް އުވާލާށެވެ.
