ގާނޫނުގައި ބުނާ އަދަދަށް މެންބަރުން ހަމަނުވާތީ ސިޔާސީ ޕާޓީތަކުގެ ދަފްތަރުން މޯލްޑިވްސް ރިފޯމް މޫވްމަންޓް (އެމްއާރްއެމް) އުނިކުރަން އިލެކްޝަންސް ކޮމިޝަން (އީސީ) އިން ނިންމުމާއެކު، އެކަމަށް ކުރީގެ ރައީސް މައުމޫން އަބްދުލްގައްޔޫމް ބަހުގެ ހަމަލާއެއް ދެއްވައިފިއެވެ.
އެކްސްގައި ކުރެއްވި ޕޯސްޓެއްގައި މައުމޫނު ވިދާޅުވީ އެމްއާރްއެމް ސިޔާސީ ޕާޓީތަކުގެ ދަފްތަރުން އުނި ކުރަން ނިންމާފައިވަނީ ގާނޫނާ ގަވައިދާ ހިލާފަށް ކަމަށާއި، މިފަދަ އެއްވެސް އަމަލެއް ބަލައި ނުގަންނާނެ ކަމަށެވެ.
ސިޔާސީ ޕާޓީގެ ގާނޫނުގެ 30 ވަނަ މާއްދާގެ (ހ)ގެ 1 ވަނަ ނަންބަރުގައި ވާ ގޮތުގެ މަތިން ސިޔާސީ ޕާޓީއެއް ދެމިއޮތުމަށް ގާނޫނު ލާޒިމުކުރާ 3000 މެންބަރުން ހަމަކުރުމަށް އެމްއާރްއެމްއަށް ދިން މުއްދަތުގައި 3000 މެންބަރުން ހަމަވެފައިނުވާކަމަށް އީސީ އިން ވަނީ ބުނެފައެވެ. އެއާއެކު މިއަދުން ފެށިގެން އެ ޕާޓީ އުވާލައި ސިޔާސީ ޕާޓީގެ ދަފްތަރުން އުނިކުރަން ނިންމާފައިވާ ކަމަށް އީސީ އިން ވަނީ އިއުލާނުކޮށްފައެވެ.
މީގެ ކުރިން ވެސް 3000 މެންބަރުން ހަމަ ނުވުމާ ގުޅިގެން އީސީއިން އެ ޕާޓީ އުވާލަން ދެ ފަހަރެއްގެ މަތިން ނިންމިއެވެ. ނަމަވެސް އެމްއާރްއެމްގައި 3000 މެންބަރުން ހަމަވާނެ ކަމަށް އެ ޕާޓީއިން އޭރު ވަނީ ބުނެފައެވެ.
އެގޮތުން ފެބްރުއަރީ 22، 2023 ގައި ތިން މަހުގެ ނޯޓިސްއެއް އީސީން ދީފައި ވާއިރު އެ ނިންމުމަކީ ގަވާއިދާ ހިލާފަށް ނިންމި ނިންމުމެއް ކަމަށް މިދިޔަ އަހަރުގެ ފެބްރުއަރީ 12 ގައި ސިވިލް ކޯޓުން ވަނީ ހުކުމް ކޮށްފައެވެ. އެހެން ނަމަވެސް އީސީން ވަނީ އެ މައްސަލަ ހައިކޯޓުގައި އިސްތިއުނާފު ކޮށްފައެވެ.
މިދިޔަ އަހަރުގެ އޮގަސްޓުމަހުގެ 25ގައި ވެސް އީސީން ވަނީ އެމްއާރުއެމް އުވާލުމަށް ނިންމާފައިވާކަން ހާމަކޮށްފައި ވާ އިރު، އޭގެ ފަހުން އޮކްޓޯބަރުގައި ވެސް އެމްއާރުއެމް އުވާލުމުގެ މަސައްކަތް ފަށާފައިވާ ކަން، އީސީން ވަނީ އިއުލާންކޮށްފައެވެ.
