ސައޫދީ އަރަބިއްޔާގެ ހާރިޖީ ވަޒީރު ޕްރިންސް ފައިސަލް ބިން ފަރުހާން އައްސައޫދުގެ ދައުވަތަކަށް ހާރިޖީ ވަޒީރު ޑރ. އަބްދުﷲ ޚަލީލް އެ ގައުމަށް ފުރާވަޑައިގެންފިއެވެ.
ފޮރިން މިނިސްޓްރީން ބުނީ ޚަލީލްގެ މި ދަތުރުގައި ސައޫދީގެ ހާރިޖީ ވަޒީރުގެ އިތުރުން އެ ގައުމުގެ ކޮމާސް މިނިސްޓަރު މާޖިދު ބިން އަބްދުﷲ އަލްޤަސަބީ އާ ބައްދަލުކުރައްވަން ހަމަޖެހިފައިވާ ކަމަށެވެ.
މި ދަތުރުގައި ރާއްޖެ އާއި ސައޫދީގެ ޒަމާންވީ ގުޅުން ވަރުގަދަކުރެވޭނެ ގޮތްތަކާއި އިތުރު ދާއިރާތަކުން ދެ ގައުމުން ގުޅިގެން މަސައްކަތްކުރުމަށް ހުރި ފުރުސަތުތަކާ ގުޅޭ ގޮތުން މަޝްވަރާކުރެއްވުމަށާއި، ވިޔަފާރީގެ ދާއިރާގެ ގުޅުން ވަރުގަދަކޮށް ރާއްޖޭގައި ސައޫދީގެ އިންވެސްޓްމެންޓްތައް އިތުރުކުރެވޭނެ ގޮތްތަކާ ގުޅޭގޮތުން މަޝްވަރާކުރެއްވުމަށް ހަމަޖެހިފައިވާ ކަމަށް ވެސް މިނިސްޓްރީން ބުންޏެވެ.
ޚަލީލްގެ މި ދަތުރުގައި ބައިލެޓަރަލް ސެކްރެޓަރީ ޑރ. ހާލާ ހަމީދާއި ޖޮއިންޓް ސެކްރެޓަރީ ޚަދީޖާ ނަޖީހާ ބައިވެރިވެވަޑައިގަންނަވާނެ ކަމަށް ވެސް މިނިސްޓްރީން މައުލޫމާތު ދެއެވެ.
