ކ. ގާފަރުގައި ބިދޭސީއަކަށް ތޫނު އެއްޗަކުން ހަމަލާދީ ޒަހަމް ކޮށްލި މައްސަލައިގައި އެ ރަށޫ މީހަކު ހައްޔަރު ކޮށްފިއެވެ.
ފުލުހުން ބުނީ، މި ހަމަލާ ދީފައި ވާ މައްސަލަ ރިޕޯޓްކޮށްފައި ވަނީ މިއަދު ހެނދުނު 7:05 ހާއިރު ކަމަށެވެ. އެ ރަށު މަގުމަތިން ހިންގާފައި ދިޔަ ބަންގްލަދޭޝް ފިރިހެނަކަށް ތޫނު އެއްޗަކުން ހަމަލާދީ ޒަހަމް ކޮށްލާފައިވާ މައްސަލައާ ގުޅިގެން ހައްޔަރު ކޮށްފައި ވަނީ ދިވެހި ފިރިހެނެކެވެ.
އެއީ އެ ރަށު ގުލްދަސްތާގެ، ޖާޒިމް ޖައުފަރެވެ.
ސޯޝަލް މީޑިއާގައި ދައުރުވަމުންދާ ފޮޓޯތަކަށް ބަލާއިރު، އެ ބިދޭސީ މީހާއަށް ހަމަލާ ދީފައި ވަނީ ވަޅިއަކުން އޭނާގެ ބުރަކައްޓަށެވެ. ބެލެވޭ ގޮތުގައި ހަމަލާ ދޭން ގެންގުޅުނު ވަޅިގެ ތިލައިގައި 5 ވަރަކަށް އިންޗި ހުންނާނެއެވެ.
މި މައްސަލަ ދަނީ އިތުރަށް ތަހުގީގު ކުރަމުން ކަމަށް ފުލުހުން ބުނެއެވެ.
