ހުސްވެފައިވާ ޑިމޮކްރެޓުންގެ ރައީސްގެ މަގާމަށް މާފަންނު އުތުރު ދާއިރާގެ ކުރީގެ މެންބަރު އިމްތިޔާޒް ފަހުމީ، އަދި އެ ޕާޓީގެ ނައިބު ރައީސް ކަމަށް މަޑުއްވަރީ ދާއިރާގެ ކުރީގެ މެންބަރު މުހައްމަދު ވަހީދު އިންތިހާބުކޮށްފިއެވެ.
ޑިމޮކްރެޓުންގެ ރައީސާއި ނައިބު ރައީސްގެ މަގާމުތައް ހުސްވީ އެ ޕާޓީގެ ކުރީގެ ރައީސް ހަސަން ލަތީފާއި ކުރީގެ ނައިބު ރައީސް މުހައްމަދު ޝިފާޒް ޑިމޮކްރެޓްސް ދޫކުރައްވައި މައި އިދިކޮޅު ޕާޓީ އެމްޑީޕީ އާ އަލުން ގުޅިވަޑައިގަތުމާ ގުޅިގެންނެވެ. އެހެންކަމުން އެ ދެ މަގާމަށް ކުރިމަތިލުމަށް ޑިމޮކްރެޓުން ހުޅުވާލި ފުރުސަތުގައި އެ ޕާޓީގެ ރައީސް ކަމަށް ކުރިމަތިލެއްވީ އިމްތިޔާޒް އެކަންޏެވެ. އަދި ނައިބު ކަމަށް ކުރިމަތިލެއްވީ ވަހީދު އެކަންޏެވެ.
ރޭ އެ ޕާޓީން ބޭއްވި ގައުމީ މަޖިލީހުގެ ބައްދަލުވުމުގައި ބައިވެރިވި މެންބަރުންގެ ތެރެއިން 34 މެންބަރުންގެ އިއްތިފާގުން ޑިމޮކްރެޓުންގެ ރައީސްކަމަށް އިމްތިޔާޒް، އަދި ނައިބު ރައީސް ކަމަށް ވަހީދު ވަނީ އިންތިހާބުކޮށްފައެވެ.
އެމްޑީޕީގައި އުފެދުނު ހިޔާލު ތަފާތުވުންތަކާ އެކު، ކުރީގެ ރައީސް މުހައްމަދު ނަޝީދާއި އެމަނިކުފާނަށް ތާއީދުކުރައްވާ ބައެއް މެންބަރުން އެމްޑީޕީން ވަކިވެ، 'ދަ ޑިމޮކްރެޓްސް' އުފެއްދީ ޖުލައި 11، 2023 ގައެވެ. އިލެކްޝަންސް ކޮމިޝަންގެ ދަފްތަރުން ދައްކާ ގޮތުގައި އެ ޕާޓީގައި މިވަގުތު 3،667 މެންބަރުން ހަރަކާތްތެރިވަމުން އެބަ ދެއެވެ.
