ފުލުހުން ޓޯކޮށްފައިވާ އުޅަނދުތަކުގެ ތެރެއިން 446 އުޅަނދެއް ނައްތާލައިފިއެވެ.
ފުލުހުން ބުނީ ޓޯކޮށްފައިވާ އެއްގަމު އުޅަނދުތަކުގެ ތެރެއިން ވެރިފަރާތުން ނުގެންގޮސް ހުރި 446 އުޅަނދެއް ގަވާއިދުގައިވާ ގޮތުގެ މަތިން އިއްޔެ ނައްތާލާފައިވާ ކަމަށެވެ.
ފުލުހުން މައުލޫމާތު ދިން ގޮތުގައި ނައްތާލެވިފައިވަނީ ދެ ފުރޮޅުލީ 378 އުޅަނދާއި ހަތަރު ފުރޮޅުލީ 40 އުޅަނދު އަދި 28 ބައިސްކަލެވެ.
ފުލުހުން މީގެކުރިން އާންމުކޮށްފައިވާ ތަފާސްހިސާބުތަކުން ދައްކާ ގޮތުގައި ނިމިދިޔަ 2024 ވަނަ އަހަރު ފުލުހުން ހިންގި އޮޕަރޭޝަންތަކުގައި 15،514 އުޅަނދު ޓޯކޮށް، 7،606 އުޅަނދާ މެދު ވަނީ ފިޔަވަޅު އަޅާފައެވެ.
ތަފާސްހިސާބުތަކުން ހާމަވާގޮތުގައި ފުލުހުން ވަނީ ޖުމްލަ 73،953 އުޅަނދު ޗެކްކޮށް، 66،347 މީހަކަށް ނަސޭހަތްދީފައެވެ. ފުލުހުން ބުނީ ނުރައްކާތެރިކޮށް ދުއްވި ކަމުގެ 293 މައްސަލައެއް މިދިޔަ އަހަރު ފުލުހުން ބަލާފައިވާ ކަމަށާއި އެއީ ދެ ފުރޮޅުލީ 271 އުޅަނދު އަދި ހަތަރު ފުރޮޅުލީ 22 އުޅަނދު ކަމަށެވެ.
މީގެއިތުރުން ފުލުހުން ބުނީ ލައިސެންސް ނެތި ދުއްވި 2138 އުޅަނދެއްވެސް ހިފަހައްޓާފައިވާކަމަށެވެ.
