އިޒްރޭލާއި ހަމާސް އާ ދެމެދު ބަދަލު ކުރި ހަމަލާތައް ހުއްޓާލަން ވެފައި ވާ އެއްބަސްވުމާ ހިލާފަށް އިޒްރޭލުން ގާޒާގެ ރައްޔިތުންގެ ބަޔަށް ބަޑިޖަހާ މީހަކު ޝަހީދު ކޮށްލައިފިއެވެ.
މިކަން ހިނގާފައި ވަނީ ހަނގުރާމައިގެ އަސީރުން ދެފަރާތުން ދޫކުރަމުން ގޮސް އިއްޔެ ދޫކުރި މީހުންނާއެކު ގާޒާގެ ރައްޔިތުން ގާޒާގެ އުތުރުގެ ސަރަހައްދުތަކަށް ވަންނަން އުޅެން ފެށުމުން އިޒްރޭލުން ބަޑިޖެހުމުންނެވެ.
އިޒްރޭލުގެ ޔަހޫދީ ބޮޑުވަޒީރު ބުނަނީ، ބަޑިޖެހީ ހަމާސް އިން އެއްބަސްވުމާ ހިލާފުވަމުން ދާތީ ކަމަށާއި، ހަމާސްގެ އަތްދަށުގައި ހުރި އިޒްރޭލުގެ އާންމު ރައްޔިތެއް ކަމަށް ވާ އަރްބެލް ޔެހޫދު މިނިވަން ކޮށްފައި ނުވާ ކަމަށެވެ.
މި މައްސަލައާ ގުޅިގެން ހަމާސް އިން ބުނެފައި ވަނީ، އެއްބަސްވުމުގައި ބުނާ ކަންކަން ތަންފީޒު ކުރުމުގައި އިޒްރޭލުން ލަސް ކުރަމުން ގެންދާ ކަމަށާއި، އިޒްރޭލުން ބުނާ އަރްބެލް އަންނަ ހަފްތާގައި ދޫކޮށްލާނެ ކަމަށެވެ. އަދި އޭނާ އިނީ ހެޔޮ ހާލުގައި ކަމަށް ވެސް ހަމާސް އިން ބުނެއެވެ.
އިޒްރޭލުން ގާޒާގެ އުދުވާން ހިންގާތާ 15 ހަފްތާ ފަހުން ގާއިމު ކުރެވުނު ސުލްހަ އައި އިރު ގާޒާގެ އުތުރުގައި ކޮޅަށް ހުރި އިމާރާތެއް ނެތެވެ. ދިރި ހުރި މީހަކު ނެތެވެ. އެންމެން ގެދޮރުން ނެރެ އެކި ސަރަހައްދުތަކަށް ވިއްސި ވިހާލި ކޮށްލާފައި ވަނިކޮށް ގާއިމުވި ސުލްހަ އާއެކު ގިނަ ބަޔަކު އެމީހުންގެ ގެދޮރުގެ ހާލަތު ދެނެގަތުމަށް އުތުރަށް ދާން މަސައްކަތް ކުރީއެވެ.
ގާޒާގެ އުތުރުތާއި ދެކުނު ވަކިކޮށްލާން އެއްކޮޅުން އަނެއް ކޮޅަށް ހުރަހަށް ބޮޑު މަގެއް އިޒްރޭލުން ހަދާފައި ވާ އިރު، އެ މަގު ހުރަސް ކުރުމަށް އާންމުން ވަނީ މަސައްކަތް ކޮށްފައެވެ. އެއީ ގާޒާގެ އުތުރާއި މެދުތެރެއިން އޮންނަ އަލް ރާޝިދު ރޯޑާ ހަމައިގައި ހަދާފައި އޮންނަ މަގެކެވެ. އެހާ ހިސާބަށް އާންމުން އެއްވި ވަގުތު އިޒްރޭލުން ވަނީ ބަޑިޖަހާފައެވެ. އަދި އާންމުންނާ އަމާޒުކޮށް ބަޑިޖެހުމުގެ ސަބަބުން ވަޒަން އަރާ އެކަކު ޝަހީދު ވިއެވެ.
އިއްޔެ އަކީ ގާޒާއަށް ތާރީހީ ދުވަހެކެވެ. އިއްޔެ ހަމާސް އިން އިޒްރޭލުގެ 4 ސިފައިން ދޫކޮށްލުމުގެ ބަދަލުގައި އިޒްރޭލުން ވަނީ 200 މީހަކު ދޫކޮށްލާފައެވެ.
ގާޒާގެ ހަމަލާތައް ހުއްޓާލައި މީހުން މިނިވަން ކުރަމުން ދާ މި ދަނޑިވަޅުގައި އިޒްރޭލުން ގެންދަނީ ހިފާފައިވަ ހުޅަނގު އައްސޭރީގެ ޖެނީންގައި ވަރުގަދަ އޮޕަރޭޝަނެއް ހިންގަމުންނެވެ. ވައިގެ މަގުން ޑްރޯންގެ އެހީގައާއި އެއްގަމު މަގުން ބަރުހަތިޔާރާއެކު ސިފައިން އަރާ ދެމުން ގެންދާ ހަމަލާތަކުގައި ގެދޮރުގައި ރޯކޮށް އެތައް ގެއްލުމެއް ދެމުން ގެންދާ އިރު، ހަމަލާތަކުގައި މިހާތަނަށް 14 މީހަކު ވަނީ މަރުވެފައެވެ.
