މޯލްޑިވްސް ބްރޯޑްކާސްޓިން ކޮމިޝަން (ބްރޯޑްކޮމް) ގެ ނާއިބު ރައީސް މުހައްމަދު ފަޒީންގެ މައްޗަށް ތުހުމަތުކުރެވޭ ޖިންސީ ފުރައްސާރައިގެ މައްސަލައެއް ރައްޔިތުންގެ މަޖިލީހުގެ މިނިވަން މުވައްސަސާތަކާއި ބެހޭ ކޮމިޓީއިން ބަލަން ފަށައިފިއެވެ.
މިމައްސަލަ ބަލަން ފަށާފައިވަނީ އިއްޔެ ބޭއްވި މިނިވަން މުވައްސަސާތަކާބެހޭ ކޮމިޓީގެ 5 ވަނަ ބައްދަލުވުމުގައި ނަމަވެސް އެ ކޮމީޓީ ވަނީ ސިއްރުކޮށްފައެވެ. އަދި މައްސަލައިގެ މައުލޫމާތުތައް ސިއްރުކޮށްފައިވަނީ ދެ މީހެއްގެ ޒާތީ މައުލޫމާތުތައް ހިމެނޭތީކަމަށް ކޮމިޓީން ބުނެފައި ވެއެވެ.
"ދަ ޕްރެސް" އަށް އެނގިަފއިވާ ގޮތުގައި ފަޒީންގެ މައްޗަށް ކުރަނީ ބްރޯޑްކޮމްގެ އަންހެން މުވައްޒަފަކަށް ޖިންސީ ފުރައްސާރަ ކުރި ކަމުގެ ތުހުމަތެވެ. މަޖިލީހުގެ ކޮމިޓީއިން މައްސަލައެއް ބަލަމުންދާކަން ފަޒީން ކަށަވަރުކޮށްދިން ނަމަވެސް މައްސަލައާއި ގުޅޭ އިތުރު ތަފްސީލަކަށް އޭނާ ދާކަށް ބޭނުމެއް ނުވެއެވެ.
ކުރިން ރާއްޖެ ޓީވީގައި ނޫސްވެރިއެއްގެ ގޮތުގައި މަސައްކަތް ކުރެއްވި ފަޒީން, ބްރޯޑްކޮމްއަށް އައްޔަންކުރީ މާޗް 7، 2021 ގައެވެ. އަދި ކޮމިޝަނުގެ ނައިބު ރައީސްގެ މަގާމަށް އޭނާ އައްޔަންކޮށްފައިވަނީ 2023 ވަނަ އަަހަރުގެ ޖެނުއަރީ މަހުއެވެ.
ފަޒީންގެ މައްސަލައެއް ބަލަމުންދާ އިރު، ބްރޯޑްކޮމްގެ ހުސްވެފައިވާ ދެ މަގާމަށް މުހައްމަދު އަބްދުﷲ (މުހައްމާ) އާއި އައިމިނަތު ސަރާހަތު އިއްޒަތު މިއަދު ވަނީ އައްޔަންކޮށްފައެވެ. މުހައްމާއާއި ސަރާހަތު އެ މަގާމަށް އައްޔަންކުރުމަށް މަޖިލީހުން ރުހުންދީ ފާސްކުރީ މިދިޔަ ބުރާސްފަތި ދުވަހުއެވެ. މުހައްމާ އާއި ސަރާހަތުގެ އިތުރުން އެ މަގާމަށް ވާދަ ކުރީ ނޫސްވެރިޔާ އަދި ޕްރެޒެންޓަރު ޝިފްޒާ މުސްތަފާއެވެ.
