ރާއްޖެއިން ވަގަށް ބޭރު ކުރަން އުޅުނު ގިނަ އަދަދެއްގެ ބޭރު ފައިސާ ކަސްޓަމްސްއަށް ނަގައި އެ މީހާ ޖޫރިމަނާ ކުރަން ކްރިމިނަލް ކޯޓުން ހުކުމް ކޮށްފިއެވެ.
އިންޑިއާގެ ރައްޔިތެއް ކަމަށްވާ އަބްދުލް ރަގޫބު ނިސްތާރު ހަލީލް ރަހްމާންގެ މައްޗަށް ކޮށްފައި ވަނީ ރާއްޖެއިން ސިއްރުން މުދާ ބޭރު ކުރަން އުޅުމުގެ ކުށުގެ ދައުވާއެވެ.
މިދިޔަ ސެޕްޓަމްބަރު މަހުގެ 2 ވަނަ ދުވަހުގެ ރޭ ރަގޫބް ފުރަން މަސައްކަތް ކޮށްފައި ވަނީ ސްރީލަންކަން އެއާލައިނުންނެވެ. ޗެކިންގް ކުރުމަށްފަހު، ބޯޑިންއަށް ވަނުމުގެ ކުރިން ފަސެންޖަރުން ޗެކްކުރާ ސެކިއުރިޓީ ޗެކްޕޮއިންޓް ސަރަހައްދުން ރަގޫބްގެ ދަބަހުގައި ގިނަ އަދަދަކަށް ބޭރު ފައިސާ ހުރިކަން ފާހަގަވުމާއެކު ކަސްޓަމްސް އިން ވަނީ އޭނާގެ ދަބަސްތައް އިތުރަށް ބަލާ ފާސްކޮށްފައެވެ. އެއާއެކު އޭނާގެ ދެ ދަބަހުން ވަނީ އަންނައުނު އޮޅާ ފޮރުވާފައި ހުރި ޖުމްލަ 21 ސިޓީ އުރަ ފެނިފައި ވެއެވެ.
އެގޮތުން އޭނާގެ ޑަފަލް ދަބަހުން ފެނުނު 14 ސިޓީ އުރައަކުން 104،977،00 ޑޮލަރާއި، 31،585،00 ޔޫރޯއާއި، 180 ފްރޭންކް އާއި 100 ދިރުހަމް ފެނިފައި ވާއިރު ބެކްޕެކް ތެރެއިން އަންނައުނު އޮޅާފައި ފޮރުވާފައި ހުރި 7 ސިޓީ އުރައެއްގެ ތެރެއިން 32،395،00 ޑޮލާރާއި، 18،790،00 ޔޫރޯ ފެނިފައި ވެއެވެ. މީގެ އިތުރުން ވެސް އޭނާގެ ދަބަހުން ވަނީ 180 ސްވިސް ފްރޭންކް އަދި 100 ދިރްހަމް ވެސް ވަނީ ފެނިފައެވެ.
އަވަސް ނިޔާ އަޑުއެހުމެއްގެ ގޮތުގައި މި މައްސަލަ ކުރިއަށް ގެންގޮސް އޭނާއާ ޕީޖީ އޮފީހާ ދެމެދު ވަނީ އިއުތިރާފީ އެއްބަސްވުމެއްގައި ސޮއިކޮށްފައެވެ. އެއާއެކު އަބްދުލް ރަގޫބު އަދަބެއްގެ ގޮތުގައި ކަނޑައަޅާފައި ވަނީ 12،000 ރުފިޔާއިން ޖޫރިމަނާކޮށް އެއް މަސް ދުވަހުގެ ތެރޭ އެ ފައިސާ ދެއްކުމެވެ.
އަދި ދެ ދަބަހުން ފެނުނު 137،372 ޑޮލަރާއި، 50,375 ޔޫރޯގެ އިތުރުން، އެހެނިހެން ފައިސާ ކަސްޓަމްސްއަށް ނެގުމަށް އަމުރު ކޮށްފައި ވެއެވެ.
ހުސްވި އަަހަރުވެސް ބަންގްލަދޭޝްގެ ރައްޔިތަކު ބޭރުކުރަން އުޅުނު 80،000 އަށްވުރެ ގިނަ ޑޮލަރު ވަނީ ކަސްޓަމްސްއިން ހިފަހައްޓާފައެވެ. ވަކި އަދަދަކަށް ވުރެ ގިނައިން ރާއްޖެއިން ބޭރަށް ފައިސާ ގެންދާނަމަ، އެ ފައިސާ ހޯދިގޮތުގެ ތަފްސީލު ހާމަކުރަންޖެހޭ ގޮތަށް ކަސްޓަމްސްގެ އުސޫލު ދާދި ފަހުން އިސްލާހު ކޮށްފައިވާއިރު 10،000 ޑޮލަރަށް ވުރެ އިތުރަށް، ރާއްޖެއިން ބޭރަށް ފައިސާ ގެންދާނަމަ އޭގެ ތަފްސީލު ހާމަކުރަންޖެހެއެވެ.
