އޭޓީއެމް މެދުވެރިކޮށް ކަސްޓަމަރަކަށް މަހެއްގެ މައްޗަށް ނަގުދު ފައިސާގެ ގޮތުގައި ޑޮލަރު ނެގޭނެ އެންމެ މަތީ އަދަދަކީ 3,500 ޑޮލަރު ކަމުގައި ބޭންކް އޮފް މޯލްޑިވްސް (ބީއެމްއެލް) އިން ހަމަޖައްސައިފިއެވެ.
މިއަދުން ފެށިގެން މި ބަދަލު ގެނެއުމަށް ނިންމާފައިވާއިރު ބީއެމްއެލް އިން ބުނި ގޮތުގައި މި ބަދަލު ގެނައި ނަމަވެސް، މިހާރުވެސް ކާޑަކުން ދުވާލަކަށް ނެގޭ 1,600 ޑޮލަރުގެ ލިމިޓަށް އެއްވެސް ބަދަލެއް ނާންނާނެއެވެ.
ބީއެމްއެލްއިން ބުނީ މިއީ ދިވެހިރާއްޖޭގައި ޒަމާނީ، 'ޑިޖިޓަލް-ފަސްޓް' ބޭންކިންގް ހިދުމަތްތައް އިތުރަށް ފުޅާކުރުމަށް ކުރަމުންދާ މަސައްކަތްތަކުގެ ދަށުން ގެނެވުނު ބަދަލެއް ކަމަށެވެ.
މި ނިންމުމަކީ ނަގުދު ފައިސާއަށް ބަރޯސާވާ މިންވަރު ކުޑަކޮށް، އަވަސް، ރައްކާތެރި އަދި ލުއިފަސޭހަ ޑިޖިޓަލް މާލީ ނިޒާމެއް ކުރިއެރުވުމަށް ބީއެމްއެލް އިން ގެންގުޅޭ ދުރުރާސްތާގެ ސިޔާސަތުގެ ދަށުން ނިންމާފައިވާ މުހިންމު ނިންމުމެއް ކަމަށް ވެއެވެ.
ނަގުދު ފައިސާ ބޭނުންކުރަން ނުޖެހި، ދުވަހުން ދުވަހަށް ބޭނުންވާ ބޭންކިންގް ހިދުމަތްތައް ފަސޭހަކަމާއެކު ހޯދޭނެ ޑިޖިޓަލް ވަސީލަތްތައް ގާއިމުކުރުމަށްޓަކައި ބޭންކުން ވަނީ ފާހަގަކޮށްލެވޭ ބޮޑެތި އިންވެސްޓްމަންޓްތަކެއް ކޮށްފައެވެ. އެގޮތުން ބީއެމްއެލް މޮބައިލް ބޭންކިންގް އަދި އިންޓަނެޓް ބޭންކިންގް މެދުވެރިކޮށް، ކޮންމެ ވަގުތަކު އަދި ކޮންމެ ތަނެއްގައި ހުރެގެންވެސް ބިލްތަކަށް ފައިސާ ދެއްކުމާއި، ފައިސާ ޓްރާންސްފާ ކުރުމުގެ އިތުރުން އެކައުންޓްގެ އެންމެހައި މުއާމަލާތްތައް ފަސޭހަކަމާއެކު ބަލަހައްޓައި މެނޭޖްކުރުމުގެ ފުރުސަތު ކަސްޓަމަރުންނަށް ވަނީ ފަހިކޮށްދީފައެވެ.
މީގެ އިތުރުން، ރާއްޖެއާއި ރާއްޖެއިން ބޭރުގެ ވިޔަފާރިތަކަށް ކާޑު މެދުވެރިކޮށް އަދި ކޮންޓެކްޓްލެސްކޮށް ފައިސާ ދެއްކުމާއި، އެކައުންޓްތަކަށް ވަގުތުން ވަގުތަށް ފައިސާ ފޮނުވުމުގެ ޒަމާނީ ހިދުމަތްތައްވެސް ބީއެމްއެލްގެ ކަސްޓަމަރުންނަށް މިހާރު ލިބެމުންދެއެވެ.
2020 ގައި ބީއެލްއެމްއިން ކަނޑައެޅީ މަހަކު ނެގޭނީ 2000 ޑޮލަރު ކަމަށެވެ. އޭގެ ފަހުން ފެބްރުއަކީ 1، 2023 ގައި ނިންމީ ދުވާލަކު 1600 ޑޮލަރު ނެގޭނެ ކަމަށެވެ.
