އިޒްރޭލުން ގާޒާއަށް ދެމުން ގެންދާ އުދުވާނީ ހަމަލާތައް ހުއްޓާލަން އެއްބަސްވި މުއާހަދާގެ ދެވަނަ މަރުހަލާ ފެއިލް ކޮށްލާނެ ކަމުގެ އިޝާރާތާއެކު އަލުން ހަމަލާ ދޭނެ ކަމަށް ނަތަންޔާހޫ ބުނެފިއެވެ.
އަބަދުވެސް އަހުދާ ހިލާފުވާ އިޒްރޭލުގެ ޔަހޫދީ ބޮޑުވަޒީރު މި ގޮތަށް އިޝާރާތް ކުރީ، ސުލްހައިގެ ވާހަކަތަކުގެ ދެވަނަ ބުރު ފެއިލް ވެއްޖެ ނަމަ ހަމަލާތައް އަލުން ފަށާނެ ކަމަށް އިންޒާރު ދެމުން އިޒްރޭލުގެ ޓީވީތަކުން ދުރައް ފޮނުވި ބަޔާނެއްގައެވެ. އޭނާ ބުނީ، ހަމަލާތައް ހުއްޓާލުމަކީ ވަގުތީ ކަމެއް ކަމަށާއި ހަމަލާތައް އަލުން ފެށުމުގެ ފުރިހަމަ އިހުތިޔާރު އިޒްރޭލަށް އެބަ އޮތް ކަމަށެވެ. އަދި އެކަމުގައި ކުރިއަށް ދިޔުމަށް އެމެރިކާގެ ރައީސް ކަމަށް އަލަށް އިންތިހާބުވި ޑޮނާލްޑް ޓްރަމްޕްގެ ފުރިހަމަ ތާއީދު އޮތް ކަމަށް ވެސް އޭނާ ބުނެފައި ވެއެވެ.
މި ބަޔާނުގައި ނަތަންޔާހޫ ވަނީ، ފާއިތުވި 15 މަހެއްހާ ދުވަހަށް އިޒްރޭލުން ހިންގި ގަތުލުއާންމުގެ ކާމިޔާބީ ފާހަގަ ކޮށް ހަމާސްގެ ލީޑަރު ޔަހްޔާ ސިންވާރު އަވަހާރަ ވެސް ކޮށްލެވިފައި ވާ ކަމަށް ބުނެ އެ ޖަރީމާ ދިފާއުވެސް ކޮށްފައެވެ.
"މެދުއިރުމަތީގެ މޫނުމަތި ބަދަލު ކޮށްލައިފިން، މިހާރު ހަމާސް އެކަނި ވެއްޖެ"
އިޒްރޭލާއި ހަމާސް އާ ދެމެދު ގާއިމުކުރި ސުލްހައިގެ އެއްބަސްވުމަށް މިއަދުން ފެށިގެން އަމަލު ކުރަން ފަށާފައި ވާ އިރު ހަމާސްގެ އަތްދަށުގައި ތިބި ރަހީނުންގެ ތެރެއިން ދޫކޮށްލާ މީހުންގެ ނަންތައް ނުލިބެނީސް އެއްބަސްވުމަށް އިހުތިރާމް ނުކުރާނެ ކަމަށް ވެސް ނަތަންޔާހޫ ވަނީ ބުނެފައެވެ.
އިޒްރޭލާއި ހަމާސް އާ ދެމެދު އެއްބަސް ވި މުއާހަދާ ބުނާ ގޮތުން، ފުރަތަމަ މަރުހަލާގައި 33 ރަހީނުން މިނިވަން ކުރަން ޖެހެއެވެ. ބަދަލުގައި އިޒްރޭލުގެ އަތްދަށުގައި ތިބި ފަލަސްތީނުގެ ރަހީނުންގެ ތެރެއިން 1890 މީހުން ދޫކޮށްލަން ޖެހެއެވެ. އޭގެ ތެރޭގައި ދިގު މުއްދަތަށް ޖަލަށް ލައިފައި ތިބި 200 މީހަކު ވެސް ހިމެނެއެވެ.
ރަހީނުންގެ ލިސްޓުގެ ވާހަކަ ނަތަންޔާހޫ ދެއްކި އިރު އެ 33 މީހުންގެ ނަން ކަމަށް ބުނެ އިޒްރޭލު މީޑިއާތަކުގައި މިހާރުވެސް ވަނީ 33 ނަމެއް ހިމަނާ އާންމު ކޮށްފައެވެ.
ހަމަލާތައް ހުއްޓާލުމަށް އިޒްރޭލުން އެއްބަސް ވީ މިދިޔަ ބުދަ ދުވަހުއެވެ. އެއްބަސް ވުމަށް އަމަލު ކުރަން މިއަދު ފެށުމާ ހަމައަށް އައި އިރު އިޒްރޭލުން ވަނީ، ހަމާސް އާއި އިސްލާމިކް ޖިހާދުގެ ތަންތަން ކަމަށް ބުނެ އެކި ތަންތަނަށް ހަމަލާ ދީ 120 މީހަކު ޝަހީދު ކޮށްލާފައެވެ.
ވީމާ އެއްގޮތަކަށްވެސް ރަހީނުން ދޫކުރެވޭކަށް ނެތެއްނު……؟