އެންޓިކޮރަޕްޝަން ކޮމިޝަން (އޭސީސީ) ގައި ހުސްވެފައިވާ ދެ މަގާމަށް އައްޔަން ކުރާ މެންބަރުންނަށް ރުހުން ހޯދުމުގެ މައްސަލަ މިނިވަން މުއައްސަސާތަކާ ބެހޭ ކޮމިޓީއަށް ފޮނުވައިފި އެވެ.
ދައުރުން ބޭރުން މިއަދު ބާއްވާ ރައްޔިތުންގެ މަޖިލީހުގެ ޖަލްސާގައި، އޭސީސީއަށް މެންބަރުން އައްޔަން ކުރެއްވުމަށް ރައީސް ޑރ. މުހައްމަދު މުއިއްޒު ފޮނުއްވާފައިވާ ސިޓީފުޅު ވަނީ އިއްވާފައެވެ. އާންމުކޮށް ހުޅުވާލައިގެން ކުރިމަތިލި މީހުންގެ ތެރެއިން މަޖިލީހަށް ރުހުން ހޯދަން ފޮނުވާފައި ވަނީ ރައީސަށް ފެނިވަޑައިގެންނެވި ދެ ނަމެވެ.
އެއީ މއ. ގޯލްޑަން މޫން، އަހުމަދު ނާޝިދު އާއި ރ. ހުޅުދުއްފާރު، ރޯޒްވިލާ، އާސިޔާ އަޒީމާއެވެ.
އޭސީސީއަށް އައްޔަން ކުރަން ފޮނުވި ނާޝިދަކީ 2021 ވަނަ އަހަރުން ފެށިގެން ޕޮލިސް ބޯޑުގެ މެންބަރުކަން ކުރެއްވި ބޭފުޅެކެވެ. ޕޮލިސް ބޯޑުން ނާޝިދު ވަކިކޮށްފައި ވަނީ މި ސަރުކާރުންނެވެ.
ގާނޫނީ ދާއިރާއިން މަތީ ތައުލީމް ހާސިލް ކުރައްވާފައިވާ އާސިޔާ ވަނީ ވިޔަފާރިވެރިންގެ ޖަމިއްޔާގެ ނައިބު ރައީސްކަން ކުރައްވާފައެވެ. އޭނާ ވަނީ މީގެ ކުރިން މަޖިލީހުގެ ޑެޕިއުޓީ ޑިރެކްޓަރުގެ މަގާމު ވެސް އަދާ ކުރައްވާފައެވެ.
އޭސީސީން ދެ މެންބަރުން ހުސްވީ، ކޮމިޝަންގެ ނައިބު ރައީސް އަބްދުލްސަލާމާއި މެންބަރު ތޯހާ މުހައްމަދު މިދިޔަ ނޮވެމްބަރު މަހު އިސްތިއުފާ ދެއްވުމުންނެވެ. އެ ދެ މެންބަރުން އިސްތިއުފާ ދެއްވީ ކޮރަޕްޝަންގެ ގިނަ ތުހުމަތުތަކެއް ކުރެވި، ވަކިކުރަން މަޖިލީހުގެ ކޮމިޓީން ފާސްކޮށްފައި ވަނިކޮށެވެ.
