ސްޓެލްކޯގެ ޓްރާންސްފޯމަރުން ވައްކަން ކުރަން އުޅުނު މީހާ ހުއްޓުވުމުގައި ހަރަކާތްތެރިވި ސްޓެލްކޯގެ މުވައްޒަފުންނަށް އެ ކުންފުނިން މެޑަލްއާއި ހަދާނީ ލިޔުން ދީފިއެވެ.
ޓްރާންސްފޯމަރުން ވައްކަން ކުރަން އުޅުނު މީހާ އަތުލައިގަތުމުގައި ހަރަކާތްތެރިވި ސްޓެލްކޯގެ މުވައްޒަފު ގައިގައި ވައްކަން ކުރަން އުޅުނު މީހާ ރެންޗަކުން ޖަހައި ވަނީ މާރާމާރީ ހިންގާފައެވެ.
އެކްސްގައި ކުރެއްވި ޕޯސްޓެއްގައި ސްޓެލްކޯގެ މެނޭޖިން ޑިރެކްޓަރު ހުސައިން ފަހުމީ ވިދާޅުވީ ރޭގެ ވަގުތެއްގައި ޓްރާންސްފޯމަރަކުން ވައްކަންކުރަން އުޅުނު ބަޔަކު ހުއްޓުވުމަށް މަސައްކަތްކަތްކުރި މުވައްޒަފުންގެ އަގުވަޒަން ކުރުމުގެ ގޮތުން އެއް މުވައްޒަފަކަށް ސްޓެލްކޯގެ "މެޑަލް އޮފް ބްރޭވަރީ" އަރުވާފައިވާ ކަމަށެވެ.
އެ ކަމުގައި ދެން ހަރަކާތްތެރިވި މުވައްޒަފަށް ހަނދާނީ ލިޔުމެއް އަރުވާފައިވާކަން ފާހަގަ ކުރައްވާ ފަހުމީ ވިދާޅުވީ އެ މުވައްޒަފުންގެ އަގުވަޒަންކޮށްފައި ވަނީ ހިރާހާއި ނުރައްކަލުގެ ވަގުތުގައި ދައްކުވައިދިން ހިތްވަރާއި ކެރުންތެރިކަން ފާހަގަކުރުމުގެ ގޮތުން ކަމަށެވެ.
ފަހުމީ ވިދާޅުވީ މުވައްޒަފުންގެ ސަލާމަތާއި ރައްކާތެރިކަން ކަށަވަރުކުރުމަށް ސްޓެލްކޯއިން އަބަދުވެސް މަސައްކަތް ކުރާނެ ކަމަށެވެ. އަދި މިފަދަ ހާދިސާތަކަށް ހާއްސަ ސަމާލުކަމެއް ދީގެން ވަރަށް ހައްސާސް މައްސަލަތަކެއްގެ ގޮތުގައި ބަލައި، ފިޔަވަޅުއަޅަމުން ދާނެކަމުގެ ޔަގީންކަން ފަހުމީ ވަނީ ދެއްވާފައެވެ.
ޓްރާންސްފޯމަރުން ވައްކަންކޮށް، ސްޓެލްކޯގެ މުވައްޒަފަށް ހަމަލާދިން މައްސަލައާއި ގުޅިގެން ފުލުހުން ވަނީ ށ. ބިލަތްފަހި، ޗަނބޭލީގޭ އިބްރާހިމް ޒާލިފް ހައްޔަރުކޮށްފައެވެ. އަދި ފުލުހުން ބުނެފައި ވަނީ އެ މައްސަލަ އިތުރަށް ތަހުގީގު ކުރަމުންދާ ކަމަށެވެ.
