ޝައްކު އުފެދޭ ގޮތަކަށް މަރުވާ މީހުން އިތުރުވަމުން ދާތީ ރާއްޖޭގައި ޕޯސްޓްމޯޓަމް ހެދޭނެ ގޮތް ހަމަޖައްސައި ދިނުމަށް ގަލޮޅު އުތުރު ދާއިރާގެ އެމްޑީޕީ މެންބަރު މުހައްމަދު އިބްރާހިމް (ކުޑޫ) އެދިވަޑައިގެންފިއެވެ.
ހެލްތު މިނިސްޓަރު އަބްދުﷲ ނާޒިމް އިބްރާހިމަށް ފޮނުއްވި ސިޓީއެއްގައި ކުޑޫ ވިދާޅުވީ، މިދިޔަ ދެ މަސް ދުވަހުގެ ތެރޭގައި ހަތް މީހުން މަރުވެފައިވާ ކަމަށާއި ޝައްކު އުފެދޭ ގޮތަށް މަރުވާ މީހުންގެ ޕޯސްޓްމޯޓަމް ހެދުމަށް ރާއްޖެ އިން ބޭރަށް އެމީހުންގެ ހަށިގަނޑުތައް ފޮނުވާކަން ކަން އެނގިވަޑައިގަންނަވާ ކަމަށެވެ. އެފަދަ ގޮތް ނޭނގޭ މަރުތަކަކީ އާންމުންގެ ކަންބޮޑުވުން އިންތިހާއަށް އޮތް ކަމެއް ކަމަށާއި ރާއްޖޭގައި ޕޯސްޓްމޯޓަމް ހެދޭނެ ނިޒާމެއް ގާއިމުކޮށް، އެ މަރުތަކުގެ ހަގީގަތް އާންމުންނަށް އޮޅުންފިލުވައި ދިނުމަކީ ކޮންމެހެން ކުރަންޖެހޭ ކަމެއް ކަމަށް ކުޑޫ ވިދާޅުވިއެވެ.
އަދި ޕޯސްޓްމޯޓަމް ހެދޭނެ އިންތިޒާމު ރާއްޖޭގައި ގާއިމްކުރުމަކީ ދައުލަަތަށް ފައިދާ ކުރާނެ ކަމެއް ކަމަށް ވެސް ކުޑޫ ފާހަގަ ކުރެއްވިއެވެ. އެގޮތުން ހަށިގަނޑު ބޭރަށް ފޮނުވުމާއި އެކަމަށް ދައުލަތުގެ ބަޖެޓުން ކުރަންޖެހޭ ހޭދަ ކުޑަވާނެ ކަމަށް އޭނާ ވިދާޅުވިއެވެ.
ހަމައެއާއެކު ރާއްޖޭގައި ޕޯސްޓްމޯޓަމް ހެދޭނެ އިންތިޒާމް ހަމަޖައްސަން ޖެހޭ ކަމަށް ދެކެވަޑައިގަންނަވާ އިރު ގާނޫނުގައި ވެސް ޕޯސްޓްމޯޓަމް ހެދުމަށް ލާޒިމް ކުރާ ހަލަތްތަކެއް އޮންނަ ކަމަށް އޭނާ ވިދާޅުވިއެވެ. އެގޮތުން ޖިނާއީ އިޖުރާއަތުގެ ގާނޫނުގައި ބަޔާންކޮށްފައިވާ ގޮތުގައި ޖިނާއީ ކުށަކާ ގުޅިގެން މަރުވެފައިވާ މީހަކު މަރުވި ސަބަބު ދެނެގަތުމަށް އަދި ގޮތް ނޭނގޭ މަރުތަކުގެ ހަގީގަތް ދެނެގަތުމަށް މަރުވެފައިވާ މީހާގެ ހަށިގަނޑުގެ ޕޯސްޓްމޯޓަމް ހެދުމުގެ އިހްތިޔާރު ފުލުހުންނަށް ދީފައިވެއެވެ.
ފުލުހުން އެކުލަވާލާފައިވާ "މަރުގެ މައްސަލަތައް ތަހުގީގު ކުރުމަށް ޕޯސްޓްމޯޓަމް ހެދުމުގައި އަމަލުކުރާނެ އިޖުރާއަތު" ތަކުގެ ގަވާއިދުގައި "ނޭޝަނަލް ސްޓޭންޑާޑް ފޯ ފޮރެންސިކް މެޑިކަލް ސާވިސް އިން މޯލްޑިވްސް" ގައި ވާ ގޮތުގައި ސިއްހީ ހިދުމަތް ދިނުމުގެ ގާނޫނުގެ 69 ވަނަ މާއްދާގައި ސިއްހީ ހިދުމަތުގެ ގައުމީ ނިޒާމުގެ ތެރޭގައި ފޮރެންސިކް ތަހުލީލާއި ޕޯސްޓްމޯޓަމް ފަދަ ތަހުލީލުތައް ކުރާނެ ސިއްހީ ހިދުމަތްދޭ މަރުކަޒެއް ނުވަތަ އިދާރާއެއް ކަނޑައަޅާނީ ހެލްތް މިނިސްޓަރު ކަމަށް ބަޔާންކޮށްފައި ވާ ކަމަށް ކުޑޫ ވިދާޅުވިއެވެ.
އެހެންކަމުން ރާއްޖޭގައި ޕޯސްޓްމޯޓަމް ހެދުމުގައި ގާނޫނީ ހުރަހެއް ނެތް ކަމަށާއި މި ކަން ވީ އެންމެ އަވަސް މުއްދަތެއްގެ ތެރޭގައި ފެއްޓުމަށް އެދިވަޑައިގަންނަވާ ކަމަށް ކުޑޫ ވިދާޅުވިއެވެ.
